NEA kɛ Samoɛle ɛlɛwola nwole agua nrenya ne ati zo ɛ. Zɛhae yɛɛ ɛnee bɛyɛ bɛkile kɛ bɛkpa awie kɛ belemgbunli a. Gyihova a hanle hilele Samoɛle kɛ ɔwola nwole ne ɔgua Sɔɔlo ati zo a. Ɔle nwole titile bie mɔɔ bɔ evuanlɛ kpalɛ.

Sɔɔlo ɛnee suzu kɛ ɔnfɛta kɛ ɔkɛyɛ belemgbunli. Ɔzele Samoɛle kɛ: ‘Mevi Bɛngyaman abusua nu, Yizilayɛ abusua ekpunli ne anu mɔɔ ɔle ekyi kpalɛ a. Duzu ati a ɛse mebayɛ belemgbunli a?’ Gyihova kulo Sɔɔlo edwɛkɛ ɔluakɛ ɔnyɛ ɔ nwo kɛ asɛɛ ɔle sonla kpole mɔɔ ɔ nwo hyia somaa a. Ɛhye ati a Ɔkpale ye kɛ belemgbunli a.

Noko Sɔɔlo ɛnle ehyianli anzɛɛ sonla ekyi. Ɔvi abusua mɔɔ bɛlɛ ezukoa la anu, na ɔle nrenya tendenle mɔɔ ɔ nwo yɛ fɛ kpalɛ. Ɔwale ɔtɛla awie biala mɔɔ wɔ Yizilayɛ la! Sɔɔlo anwo yɛ se kpalɛ, na eza ɔ nwo yɛ ndɛ wɔ ɛnriandilɛ nu. Menli ne anye liele kɛ Gyihova ɛkpa Sɔɔlo kɛ belemgbunli. Menli ne kɔsɔɔti deanle nuhua kɛ: ‘Belemgbunli ne ɛnyi ɛhyɛ!’

Yizilayɛ agbɔvolɛ anwo yɛ se kɛ bolɛ. Na bɛtɛgyegye Yizilayɛma kpalɛ. Bɛziele Sɔɔlo belemgbunli bɛwiele la, yeangyɛ fee yɛɛ Amɔnoma rale kɛ bɛ nee bɛ baho a. Sɔɔlo boɔboale ɛlɔnema dɔɔnwo anloa na ɔlile Amɔnoma ne mɔ anwo zo konim. Ɛhye manle menli ne anye liele belemgbunli Sɔɔlo anwo.

Mekɛ hɔle ɔ nyunlu la, Sɔɔlo lile Yizilayɛma anyunlu ɔmanle bɛlile konim dɔɔnwo wɔ bɛ agbɔvolɛ nwo zo. Ɛnee Sɔɔlo lɛ ralɛ nrenya akɛnrasesebɛ bie mɔɔ bɛfɛlɛ ye Dwɔnatan a. Na Dwɔnatan boale manle Yizilayɛ lile konim dɔɔnwo wɔ konle nu. Ɛnee Filisitiama ne tɛde Yizilayɛma agbɔvolɛ. Kenle ko Filisitiama dɔɔnwo rale kɛ bɛ nee Yizilayɛma baho.

Samoɛle hanle hilele Sɔɔlo kɛ ɔhendɛ kɔdwu kɛ ɔbara na yeabɔ afɔle anzɛɛ yeava ahyɛlɛdeɛ yeamaa Gyihova. Noko Samoɛle hyɛle somaa. Sɔɔlo ɛnee sulo kɛ Filisitiama ne mɔ bava konle ne adoa bɛ, ɔti ɔdaye mumua ne ɔbɔle afɔle ne. Awieleɛ kolaa ne mɔɔ Samoɛle rale la ɔhanle ɔhilele Sɔɔlo kɛ yeyɛ anzosesebɛ. Samoɛle zele kɛ: ‘Gyihova bakpa awie fofolɛ amaa yeali Yizilayɛ anwo zo belemgbunli.’

Amozii Sɔɔlo yɛle anzosesebɛ bieko. Yemɔti Samoɛle zele ye kɛ: ‘Ɔle kpalɛ kɛ ɛkɛdie Gyihova tɛla kɛ ɛkɛva boane mɔɔ ɛwie kye la ɛkɛmaa ye. Ɔluakɛ wɔandie Gyihova ane la ati, Gyihova ɛnrɛmaa ɛnrɛli Yizilayɛ azo belemgbunli bieko.’

Yɛkola yɛzukoa debie kpalɛ yɛfi ɛhye anu. Ɔkile kɛzi ɔhyia kɛ yɛtie Gyihova dahuu la. Eza yeanga ye zɔ, ɔkile kɛ sonla kpalɛ, kɛmɔ ɛnee Sɔɔlo de la, kola kakyi yɛ sonla ɛtane. Yɛngulo kɛ yɛkɛyɛ sonla ɛtane, ɔnle zɔ ɔ?

1 Samoɛle tile 9 kɔdwu 11; 13:5-14; 14:47-52; 15:1-35; 2 Samoɛle 1:23.