Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 37

Ɛzonlenlɛ Ɛdanlɛ Sua

Ɛzonlenlɛ Ɛdanlɛ Sua

ASOO ɛze mɔɔ bɛfa sua ɛhye bɛyɛ la ɔ? Ɔle ɛdanlɛ sua titile bie mɔɔ bɛfa bɛsonle Gyihova a. Eza bɛfɛlɛ ye ɛzonlenlɛ sua. Menli ne vile Yigyibiti la ye ɛvolɛ ko anzi yɛɛ bɛwiele ye si a. Asoo ɛze ahenle mɔɔ ɔmanle bɛzile a?

Gyihova ɔ. Mekɛ mɔɔ Mosisi wɔ Saenae Boka ne azo la, Gyihova hilele ye kɛzi ɔzi ye la. Ɔhanle kɛ ɔyɛ ye mɔɔ bɛtudu a bɛnvɛ nwolɛ a. Wɔ zɛhae adenle ye azo bɛbahola bɛadudu na bɛazoa bɛahɔ ɛleka fofolɛ na bɛazi ye wɔ ɛkɛ ne. Yemɔti Yizilayɛma ne mɔ zoale ɛdanlɛ sua ne hɔle ɛleka biala mɔɔ bɛdule bɛhɔle, wɔ mekɛ mɔɔ ɛnee bɛwɔ fienemgbole ne anu la.

Saa ɛnea ekpumgbunli ekyi ne mɔɔ wɔ sua ne ati lɔ la anu a, ɛbanwu ɛlɛka bie wɔ ɛkɛ. Bɛfɛlɛ ye ngyekyeleɛ ɛlɛka. Bɛva ezukoa nvutuke bɛyɛ anwumabɔvolɛ nwiɔ anzɛɛ kyɛlɛbo bɛzie nduazo ne ati nee ɔ ti. Nyamenle eza hɛlɛle Mɛla Bulu ne mɔɔ Mosisi bubule ye la bieko guale awolɛ ndɛbandɛba nwiɔ azo. Na bɛvale awolɛ ɛhye mɔ bɛziele ngyekyeleɛ ɛlɛka ne anu. Eza noko bɛvale mana ne bie bɛguale dwora nu bɛziele nu. Asoo ɛkakye mana ne deɛ holɛ ɔ?

Gyihova kpale Mosisi adiema nrenya Aalɔn kɛ ɛsɔfo kpanyinli. Ɔdi menli ne anyunlu ɔmaa bɛzonle Gyihova. Na ɔ mra mrenya ne mɔ noko le ɛsɔfoma.

Akee nea ɛdanlɛ sua ne ekpumgbunli kpole ne. Ye kpole le ekpumgbunli ekyi ne mɔnwo nwiɔ. Ɛnwu ɛlɛka ekyi ne mɔɔ esike vi nu la ɔ? Ɛhye a le afɔlemokyea ne mɔɔ ɛsɔfo ne mɔ yela ayile evuanlɛ ne mɔɔ bɛfɛlɛ ye ɛyɛlɛ la wɔ zolɛ a. Akee kɛnlaneɛ baka mɔɔ kɛnlaneɛ ngoko nsuu wɔ zolɛ la wɔ ɛkɛ ne. Debie mɔɔ tɔ zo nsa wɔ ekpumgbunli ne anu la a le ɛkponle. Bɛfa kpanwo 12 bɛgua zolɛ.

Kyɛnze kpole mɔɔ nzule wɔ nuhua la wɔ ɛzonlenlɛ sua ne alie nwo. Ɛsɔfo ne mɔ fa wowo bɛ nwo. Afɔlemokyea kpole ne noko wɔ ɛkɛ. Ɛke a bɛyela nane ne mɔ mɔɔ bɛhu bɛ la bɛfa bɛbɔ afɔle bɛmaa Gyihova a. Ɛdanlɛ sua ne wɔ azokoɛleɛ ne avinli, yɛɛ Yizilayɛma ne mɔ dede bɛ ɛdanlɛ azua ne mɔ anu ɛbɔ nwolɛ mgbɔlɛka ɛyia.

Adendulɛ 25:8-40; 26:1-37; 27:1-8; 28:1; 30:1-10, 17-21; 34:1, 2; Hibuluma 9:1-5.