Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 40

Mosisi Bɔle Bodane Ne

Mosisi Bɔle Bodane Ne

ƐVOLƐ dɔɔnwo ɛze ɛhɔ—ɛvolɛ 10, ɛvolɛ 20, ɛvolɛ 30, ɛvolɛ 39! Na Yizilayɛma tɛbɔ fienemgbole ne anu. Noko Gyihova nleanle ye menli ne mɔ wɔ ɛvolɛ ɛhye mɔ amuala anu. Ɔmanle bɛlile mana. Ɔvale amungu pila ɔlile bɛ nyunlu alehyenlɛ nu, na ɔmanle senle pila lile bɛ nyunlu nɔɔzo. Ɛvolɛ ɛhye mɔ amuala anu bɛ adɛladeɛ nee bɛ ndanlɛ antete yɛɛ bɛ gyakɛ anyɛ nganlɛ.

Bɛvile Yigyibiti la ye siane mɔɔ lumua wɔ ɛvolɛ 40 ne anu la ɛne. Yizilayɛma ne razokoɛle Keedɛhye bieko. Ɛke yɛɛ ɛnee bɛwɔ mɔɔ busiama 12 ne hɔkpɔlale Keena azɛlɛ ne azo kɛyɛ ɛvolɛ 40 mɔɔ ɛze ɛhɔ la. Mosisi adiema raalɛ Meleam wule wɔ Keedɛhye. Na kɛmɔ ɔde ye dɛba la, eza bɛyiale ngyegyelɛ bieko wɔ ɛke.

Menli ne ɛnnyia nzule. Yemɔti bɛzele Mosisi kɛ: ‘Saa yɛwule bɔbɔ a anrɛɛ ɔle kpalɛ. Duzu ati a bɛye yɛ bɛvi Yigyibiti bɛ nee yɛ ɛra munzule azɛlɛ ɛhye mɔɔ ɛhwee ɛnfifi zolɛ la azo a? Feege, vanye anzɛɛ ma mɔɔ le kɛ akutue la biala ɛnle ɛke. Nzule bɔbɔ mɔɔ yɛno la ɛbɔ yɛ.’

Mekɛ mɔɔ Mosisi nee Aalɔn hɔle ɛzonlenlɛ sua ne anu hɔyɛle asɔne la, Gyihova zele Mosisi kɛ: ‘Boɔboa menli ne kɔsɔɔti anloa. Na wɔ bɛ nye zo ɛkɛ ne tendɛ kile bodane ne mɔɔ la bɛ nyunlu ɛkɛ ne la. Na nzule dɔɔnwo vi nu bara na wɔanyia nzule wɔamaa menli ne nee bɛ nyɛmoa anlo.’

Ɔti Mosisi boɔboale ɛlɔne ne anloa na ɔzele bɛ kɛ: ‘Bɛdie, bɛdabɛ mɔɔ bɛnlie Nyamenle bɛ nli la! Asoo bodane ɛhye anu yɛɛ me nee Aalɔn banyia nzule amaa bɛ ɔ?’ Akee Mosisi vale ye kpɔma ne bɔle bodane ne fane nwiɔ, na nzule dɔɔnwo vi nuhua rale. Menli ne nee bɛ nyɛmoa ne mɔ nyianle nzule dɔɔnwo nlonle.

Noko, Gyihova vale Mosisi nee Aalɔn anwo ɛya. Ɛze deɛ mɔɔ ɔti ɔvale ɛya la ɔ? Ɔluakɛ Mosisi nee Aalɔn hanle kɛ bɛdabɛ yɛɛ bɛbamaa nzule avi bodane ne anu ara a. Noko Gyihova a yɛle a. Ɔluakɛ Mosisi nee Aalɔn anga nɔhalɛ wɔ ɛhye anwo la ati, Gyihova zele kɛ ɔbadea bɛ. Ɔse: ‘Bɛnrɛli me menli ne ati bɛnrɛhɔ Keena.’

Yeangyɛ biala Yizilayɛma ne vile Keedɛhye. Mekɛ guale nu ekyii la bɛradwule Hɔɔ Boka ne abo. Aalɔn wule wɔ ɛke, wɔ boka ne azo. Mekɛ mɔɔ ɔwule la ɛnee yeli ɛvolɛ 123. Yizilayɛma ne lile alɔbɔlɛ na bɛzunle Aalɔn toonwo kenle kɔkɔlɛ 30. Ɔ ra Ɛlieza rayɛle Yizilayɛ maanle ne ɛsɔfo kpanyinli.

Ɛdianlɛ 20:1-13, 22-29; Mɛla ne 29:5; Nihɛmaya 9:21.