Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 46

Gyɛleko Bane Ne

Gyɛleko Bane Ne

DUZU a ɛlɛmaa Gyɛleko bane ne ade agua a? Ɔle kɛ asɛɛ bɛdo bɔmbo kpole bie bɛzi nu. Noko zɔhane mekɛ ne ɛnee bɔmbo ɛnle ɛkɛ ne; ɛnee bɛnlɛ etu bɔbɔ. Gyihova nwanwane gyima bieko ɛne! Maa yɛzukoa kɛzi ɔzile la anwo edwɛkɛ.

Tie mɔɔ Gyihova hanle hilele Dwɔhyua la: ‘Ɛ nee wɔ ɛlɔnema ne mɔ ɛdia kilikili ɛbɔ suakpole ne anwo mgbɔlɛka. Bɛbɔ nwolɛ mgbɔlɛka kenle nsia, kenle ko biala ko. Bɛzoa ngyekyeleɛ ɛlɛka ne bɛboka bɛ nwo. Ɔwɔ kɛ ɛsɔfo nsuu di bɛ nyunlu na bɛbɔ bɛ aweɛne ne mɔ.

‘Kenle ne mɔɔ tɔ zolɛ nsuu la, ɔwɔ kɛ bɛtia kilikili bɛbɔ suakpole ne anwo mgbɔlɛka fane nsuu. Akee bɛbɔ bɛ aweɛne ne mɔ tendenle ko na awie biala ɛdea nu kpole kpalɛ. Na bane ne bade agua aze gɔɔ!’

Dwɔhyua nee ye ɛlɔnema ne yɛle kɛmɔ Gyihova zele bɛ la. Mekɛ mɔɔ bɛlɛtia kilikili la, ɛnee bɛyɛ ngongoonwu. Awie biala amkpo ɛdahonlɛ. Mɔɔ ɛte ala a le aweɛne ne nee bɛ gyakɛ abo kilikili ne. Ɔbayɛ kɛ ɛnee ɛzulolɛ ɛha Nyamenle menli ne agbɔvolɛ ne mɔ mɔɔ wɔ Gyɛleko la. Ɛnwu nyɛma kɔkɔlɛ ne mɔɔ ɔhenda nvɛnzɛlɛ ne anu la? Nwane nvɛnzɛlɛ ɔ? Ɛhɛe, Releehabe ɛyɛ mɔɔ busiama nwiɔ ne hanle hilele ye kɛ ɔyɛ la. Ɔ nee ye abusua ne amuala wɔ sua ne anu bɛlɛnea mɔɔ ɛlɛkɔ zo la.

Awieleɛ kolaa ne, kenle nsuu ne azo, mekɛ mɔɔ bɛdia kilikili bɛbɔ suakpole ne anwo mgbɔlɛka fane nsuu bɛwie la, bɛwule aweɛne ne anu, ɛlɔnema ne deanle nuhua, na bane ne dele guale aze. Akee Dwɔhyua zele kɛ: ‘Bɛzɛkye suakpole ne na bɛhu awie biala mɔɔ wɔ zo la. Bɛyela debie biala. Dwɛtɛ fufule, ezukoa nvutuke, kɔbele, nee bulalɛ ala a bɛgyakyi a, na bɛva bɛhɔgua Gyihova gya ne anu wɔ ɛdanlɛ sua ne anu.’

Dwɔhyua zele busiama nwiɔ ne kɛ: ‘Bɛhɔ Releehabe sua nu, bɛhɔva ye nee ye mbusua ne bɛvinde.’ Bɛliele Releehabe nee ye abusua ne ngoane, kɛmɔ busiama ne bɔle ye ɛwɔkɛ la.

Dwɔhyua 6:1-25.