Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 52

Gedɛyɔn Nee Ye Mrenya 300 Ne

Gedɛyɔn Nee Ye Mrenya 300 Ne

WƆNWU mɔɔ ɛlɛkɔ zo wɔ ɛke la ɔ? Menli ɛhye mɔ kɔsɔɔti le Yizilayɛ ɛlɔnema. Menli mɔɔ ɛbutu la ɛlɛno nzule. Ndɛnebuavolɛ Gedɛyɔn a gyi bɛ nwo ɛkɛ ne la. Ɔlɛnea kɛzi bɛlɛno nzule ne la.

Nea adenle ngakyile mɔɔ menli ne lua zo ɛlɛno nzule ne la. Bie mɔ ɛva bɛ nyunlu ɛbutu nzule ne anu. Noko ko ɛlɛfa ɔ sa yeave nzule ne amaa yeanwu mɔɔ ɛlɛkɔ zo la amuala. Ɛhye hyia kpalɛ, ɔluakɛ Gyihova hanle hilele Gedɛyɔn kɛ ɔkpa menli mɔɔ bɛanlo nzule ne na mekɛ ko ne ala bɛazinza la. Menli mɔɔ ɛha la, Nyamenle se, bɛmaa bɛzia. Maa yɛnlea deɛ mɔɔ ɔti ɔrale ye zɔ la.

Yizilayɛma ɛnyia edwɛkɛ kpole bieko. Ɔboalekɛ bɛhakyi bɛ nzi bɛzi Gyihova. Medeanema ɛnyia tumi kpole ɛdɛla bɛ na bɛlɛkile bɛ nyane dɔɔnwo. Yemɔti Yizilayɛma zɛlɛle Gyihova moalɛ, na Gyihova diele bɛ ɛzunlɛ ne.

Gyihova hanle hilele Gedɛyɔn kɛ ɔkpondɛ ɛlɔnema, ɔti Gedɛyɔn boɔboale ɛlɔnema 32,000 anloa. Noko ɛlɔnema 135,000 yɛɛ ɛlɛba bɛ nee Yizilayɛma araho a. Noko akee Gyihova hanle hilele Gedɛyɔn kɛ: ‘Menli ne zonle somaa.’ Duzu ati a Gyihova hanle ye zɔ a?

Ɔboalekɛ saa Yizilayɛ di konim a bɛbaha kɛ bɛdabɛ mumua ne bɛ mɔdenlebɔlɛ ɔ. Bɛbadwenle kɛ bɛangyia Gyihova moalɛ biala. Ɔti Gyihova zele Gedɛyɔn kɛ: ‘Ka kile awie biala mɔɔ ɔsulo la kɛ ɔzia ɔhɔ sua nu.’ Gedɛyɔn yɛle ye zɔ la menli 22,000 ziale hɔle sua nu. Ɔhale mrenya 10,000 mɔɔ bɛ nee ɛlɔnema 135,000 ne a kaho a.

Noko, tie! Gyihova se: ‘Ɛlɔne mɔɔ ɛha la tɛso somaa.’ Yemɔti ɔzele Gedɛyɔn kɛ ɔmaa menli ne mɔ ɛnlo nzule wɔ azudenle ɛhye anu na ɔmaa bɛdabɛ mɔɔ bɛkɛva bɛ nyunlu bɛkɛbutu nzule ne anu la amuala ɛzia ɛhɔ sua nu. Gyihova bɔle ɛwɔkɛ kɛ: ‘Mebamaa menli 300 ne mɔɔ vale bɛ sa venle nzule ne nlonle la nee wɔ ali konim.’

Konle mekɛ ne dwule zo. Gedɛyɔn hyɛle ye menli 300 ne mɔ anu ekpunli nsa. Na ɔvale aweɛne, nee dwora mɔɔ tɛkɛ zia nu la ɔmanle awie ko biala. Ɔkɔ ne alevinli-nwiɔ-avinli la, bɛbɛngale bɛ agbɔvolɛ ne mɔ azokoɛleɛ ne anwo bɛyiale. Akee bɛwule bɛ aweɛne ne mɔ anu na bɛbobɔle dwora ne mɔ, na bɛdeanle nu kɛ: ‘Konle ne le Gyihova nee Gedɛyɔn ɛdeɛ!’ Mekɛ mɔɔ kpɔvolɛma ɛlɔne ne dwazole la bɛ ahonle dule na bɛyɛle basaa. Bɛ muala bɛguale ɛbɔ nu, na Yizilayɛma lile konim.

Maanlebuvolɛma tile 6 kɔdwu 8.