Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Gebɛyɔn Nrɛlɛbɛvolɛma

Gebɛyɔn Nrɛlɛbɛvolɛma

Gebɛyɔn Nrɛlɛbɛvolɛma Ne

KEENA azuamgbole ne mɔ akee ɛziezie bɛ nwo kɛ bɛ nee Yizilayɛ kaho. Bɛsuzu kɛ bɛkɛli konim. Noko menli mɔɔ de bikye suakpole Gebɛyɔn la anzuzu zɔ. Bɛliele bɛlile kɛ Nyamenle ɛlɛko amaa Yizilayɛma, na bɛangulo kɛ bɛ nee Nyamenle kɛdwudwu. Ɔti ɛze mɔɔ Gebɛyɔnoma ne yɛle a?

Bɛbɔle kpɔkɛ kɛ bɛbamaa yɛayɛ kɛ asɛɛ bɛvi moamoa. Yemɔti mrenya ne mɔ bie wulale adɛladeɛ mɔɔ ɛtete kpasakpasa nee mgbɔlaboa dɛba mɔɔ ɛtete na bɛsosɔ bɛ la. Bɛvale ahodoku mɔɔ ɛyɛ dɛba na bɛteta nu la, nee kpanwo dɛba mɔɔ ɛyɛ reresee la bɛzoale bɛ asoaso ne mɔ. Akee bɛhɔle Dwɔhyua ɛkɛ na bɛzele ye kɛ: ‘Yɛvi moa kpalɛ a yɛra a, ɔluakɛ yɛde bɛ Nyamenle kpole, Gyihova ne nganeɛ. Yɛde ninyɛne mɔɔ ɔyɛle ɔmanle bɛ wɔ Yigyibiti la amuala. Ɔti yɛ mgbanyima ne mɔ zoanle yɛ kɛ yɛva aleɛ yɛzia yɛ nwo na yɛrayia bɛ na yɛha yɛhile bɛ kɛ: “Yɛle bɛ ngɛkɛlɛ. Bɛbɔ yɛ ɛwɔkɛ kɛ bɛ nee yɛ ɛnrɛho.” Nea kɛzi yɛ adɛladeɛ ne ɛtete ɔlua adenle ne tendenle ti na yɛ kpanwo ne mɔ ɛzi ɛyɛ reresee, bɛbɔ adubue bie ɛ.’

Dwɔhyua ne ye mgbanyima ne mɔ liele Gebɛyɔnoma ne mɔ lile. Ɔti bɛbɔle bɛ ɛwɔkɛ kɛ bɛ nee bɛ ɛnrɛho. Noko ye kenle nsa ne azo bɛdele kɛ amuanrɛɛ Gebɛyɔnoma ne de bɛ nwo ɛkɛ ne ala.

Dwɔhyua bizale bɛ kɛ: ‘Kɛmɔti yɛɛ bɛbɛlɛbɛla yɛ kɛ bɛvi moa a bɛrale ɛ?’

Gebɛyɔnoma ne buale kɛ: ‘Yɛyɛle ye zɔhane ɔboalekɛ yɛde kɛ Gyihova Nyamenle ɛze bɛ kɛ ɔbava Keena azɛlɛ ɛhye amuala yeamaa bɛ. Zɔhane ati ɛnee yɛsulo kɛ bɛkɛhu yɛ.’ Yizilayɛma ne lile bɛ ɛwɔkɛ ne azo na bɛangu Gebɛyɔnoma ne. Emomu bɛyɛle bɛ ngɛkɛlɛ.

Gyɛlusalɛm belemgbunli ne vale ɛya kpole ɔluakɛ Gebɛyɔnoma nee Yizilayɛma ɛyɛ anzondwolɛ ngyehyɛlɛ la ati. Yemɔti ɔzele arelemgbunli nna kɛ: ‘Bɛraboa me bɛmaa me nee Gebɛyɔnoma ɛhɔho.’ Na zɔhane ala yɛɛ arelemgbunli nnu ne yɛle a. Asoo nrɛlɛbɛ wɔ anzondwolɛ ngyehyɛlɛ ne mɔɔ Gebɛyɔnoma ne nee Yizilayɛma yɛle, mɔɔ ɛmaa arelemgbunli ɛhye mɔ nee bɛ ɛlɛba araho la anu? Yɛbanwu ye.

Dwɔhyua 9:1-27; 10:1-5.