Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 27

Belemgbunli Atisesebɛ Bie Sie Yigyibiti

Belemgbunli Atisesebɛ Bie Sie Yigyibiti

MRENYA ne mɔ mɔɔ bɛwɔ ɛke la ɛlɛtinlitinli menli ne mɔ anwo zo bɛamaa bɛayɛ gyima. Nea nrenya ne mɔɔ ɛlɛfa empele ne agua gyimayɛvoma ne anu ko la! Gyimayɛvoma ne vi Gyekɔbo abusua nu, na bɛfɛlɛ bɛ Yizilayɛma. Na mrenya ne mɔ mɔɔ ɛlɛmaa bɛayɛ gyima ne la le Yigyibitima. Yizilayɛma ɛrayɛ Yigyibitima ngɛkɛlɛ. Kɛ ɛhye zile rale ɛ?

Gyekɔbo abusua kpole ne dɛnlanle anzondwolɛ nu wɔ Yigyibiti wɔ ɛvolɛ dɔɔnwo anu. Dwosefi mɔɔ ɛnee le sonla kpole mɔɔ anwo hyia wɔ Yigyibiti mɔɔ belemgbunli Falo ɛnle ɛkɛ a ɔdaye a ɔwɔ ɛkɛ ne la, nleanle bɛ. Noko akee Dwosefi wule. Na Falo fofolɛ mɔɔ ɛnee ɔngulo Yizilayɛma ne la, rayɛle belemgbunli wɔ Yigyibiti.

Yemɔti Falo ati ɛsesebɛ ɛhye manle Yizilayɛma yɛle ngɛkɛlɛ. Na ɔmanle menli mɔɔ ati yɛ se na bɛnze anwunvɔne la nleanle bɛ nwo zo. Bɛhyele Yizilayɛma mialera nu bɛmanle bɛyɛle gyima mɔɔ bo bɛ nwo zo la bɛsisile azuamgbole bɛmanle Falo. Noko Yizilayɛma ne hɔle zolɛ yɛle dɔɔnwo. Mekɛ hɔle bie la Yigyibitima razulole kɛ Yizilayɛma ne barayɛ dɔɔnwo somaa na bayɛ maanle ɛsesebɛ kpalɛ.

Ɔti ɛze mɔɔ Falo yɛle a? Ɔdendɛle ɔhilele mraalɛ mɔɔ die Yizilayɛ mraalɛ awolɛ la, na ɔhanle kɛ: ‘Bɛhu adɔma biala mɔɔ le nrenya mɔɔ bɛkɛwo ye la.’ Noko ɛnee mraalɛ ɛhye mɔ le menli mgbalɛ, na bɛangu adɔma ne mɔ.

Na akee Falo yɛle mɛla ɛhye manle ye menli ne amuala kɛ: ‘Bɛhu Yizilayɛ adɔma biala mɔɔ le nrenya la. Adɔma mɔɔ le raalɛ la ala a bɛmmaku ye a.’ Asoo ɛhye ɛnle atisesebɛ mɛla ɔ? Maa yɛnlea kɛzi bɛliele ngakula mrenya adɔma ne mɔ anu ko la.

Adendulɛ 1:6-22.