MEKƐ mɔɔ Mosisi ziale hɔle Yigyibiti la, ɔhanle sɛkɛlɛneɛ ne mɔ amuala anwo edwɛkɛ ɔhilele ɔ diema nrenya Aalɔn. Na mɔɔ Mosisi nee Aalɔn yɛle sɛkɛlɛneɛ ɛhye mɔ hilele Yizilayɛma ne la, menli ne amuala liele lile kɛ Gyihova boka bɛ nwo.

Akee Mosisi nee Aalɔn hɔle Falo anyunlu. Bɛhanle bɛhilele ye kɛ: ‘Kɛ Gyihova, Yizilayɛ Nyamenle ne se la ɛne, “Maa me menli ne ɛhɔ kenle nsa adenle, amaa bɛahola bɛazonle me wɔ fienemgbole ne anu.” ’ Noko Falo hanle kɛ: ‘Menze Gyihova. Na menrɛmaa Yizilayɛ ɛnrɛhɔ.’

Falo vale ɛya, ɔluakɛ menli ne kpondɛ kɛ ɔmaa bɛ mekɛ bɛgyakyi gyima na bɛkɔsonle Gyihova la ati. Zɔhane ati ɔhyele bɛ mialera nu ɔmanle bɛyɛle gyima ɛsesebɛ bɛdɛlale dɛba ne. Yizilayɛma ne dendɛle tiale Mosisi wɔ atisesebɛ adenle zo mɔɔ akee Yigyibitima nee bɛ lile ye la anwo, na nyane hunle Mosisi. Noko Gyihova hanle hilele ye kɛ ɔmmamaa ɔgyegye ye. Gyihova hanle kɛ: ‘Mebamaa Falo amaa me menli ne adenle bɛahɔ.’

Mosisi nee Aalɔn hɔle Falo anyunlu bieko. Na mekɛ ɛhye anu bɛyɛle nwanwane debie. Aalɔn vuandinle ye kpɔma ne dole aze, na ɔhakyile ɛwɔlɛ kpole bie. Na Falo nrɛlɛbɛvolɛma ne noko vuandinle agbɔma guale aze, na nwɔlɛ vindele. Noko, nea! Aalɔn ɛwɔlɛ deɛ ne ɛlɛmeme nrɛlɛbɛvolɛma ne nwɔlɛ ne mɔ. Noko Falo ammaa Yizilayɛma ne angɔ.

Yemɔti mekɛ dwule kɛ Gyihova kile Falo nrɛlɛbɛ. Ɛze kɛ ɔzile ɔyɛle ye la ɔ? Ɔlua ngyegyelɛ 10, anzɛɛ anwubɛnyunlu, mɔɔ ɔmanle ɔrale Yigyibiti anwo zo la.

Mɔɔ ɛnee ngyegyelɛ ne anu dɔɔnwo ɛra la, Falo manle bɛhɔvɛlɛle Mosisi, na ɔhanle kɛ: ‘Maa ngyegyelɛ ne ɛpɛ, na mebamaa Yizilayɛ ahɔ.’ Noko saa ngyegyelɛ ne pɛ a, ɛnee Falo ɛhakyi ye adwenle. Ɔmmaa menli ne ɛngɔ. Noko, awieleɛ kolaa ne, wɔ ngyegyelɛ ne mɔɔ tɔ zolɛ 10 la anzi, Falo manle Yizilayɛma ne hɔle.

Asoo ɛze ngyegyelɛ 10 ne anu ko biala ɔ? Kɔ mukelɛ ne mɔɔ doa ye la na maa yɛzukoa nwolɛ debie.

Adendulɛ 4:27-31; 5:1-23; 6:1-13, 26-30; 7:1-13.