ASOO ɛze menli mɔɔ Gyekɔbo nee bɛ ɛlɛtendɛ la ɔ? Mɔɔ ɛnee Gyekɔbo ɛva mekɛ tendenle ɛdu adenle la, ɔyiale bɛ wɔ bula bie azo. Ɛnee bɛlɛnea bɛ mboane. Gyekɔbo bizale bɛ kɛ: ‘Bɛvi ni?’

Bɛbuale kɛ: ‘Yɛvi Hɛlan.’

Gyekɔbo bizale kɛ: ‘Bɛze Leeban ɔ?’

Bɛyele ɔ nloa kɛ: ‘Ɛhɛe. Nea, ɔ ra raalɛ Relahyɛle a nee ye mboane ne mɔ ɛlɛba la.’ Asoo ɛnwu Relahyɛle wɔ ɛkɛ ne kɛ ɔvi moamoa nehane ɔlɛba?

Mɔɔ Gyekɔbo nwunle Relahyɛle nee ɔ wuvuanyi Leeban mboane ne mɔ la, ɔhɔle ɔhɔhundole bolɛ ne ɔyele ye wɔ bula ne azo amaa mboane ne mɔ ahola nzule ne bie no. Akee Gyekɔbo vole Relahyɛle anvoka anwo na ɔhanle sonla holɛ ko mɔɔ ɔde la ɔhilele ye. Ɔ nye liele kpalɛ, na ɔhɔle sua nu na ɔhanle ɔhilele ɔ ze Leeban.

Leeban anye liele kɛ Gyekɔbo radɛnlanle ɔ nwo ɛkɛ ne la. Na mekɛ mɔɔ Gyekɔbo hanle kɛ ɔbagya Relahyɛle la, Leeban anye liele. Noko akee, ɔzele Gyekɔbo kɛ ɔyɛ gyima wɔ ye egyinli ne anu ɛvolɛ nsuu na yeagya Relahyɛle. Ɔluakɛ ɛnee Gyekɔbo kulo Relahyɛle kpole kpalɛ la ati ɔyɛle ɛhye. Noko agyalɛ mekɛ ne dwule la, ɛze mɔɔ zile a?

Leeban anva Relahyɛle ammaa Gyekɔbo, emomu ɔvale ɔ ra raalɛ kpanyinli Liya a ɔmanle ye a. Mɔɔ Gyekɔbo liele dole nuhua kɛ ɔbazonle Leeban ɛvolɛ nsuu bieko la, Leeban eza vale Relahyɛle manle ye kɛ ɔ ye. Zɔhane mekɛ ne ɛnee Nyamenle maa adenle maa mrenya gya mraalɛ dɔɔnwo. Noko kɛkala, kɛmɔ Baebolo ne kile la, ɔwɔ kɛ nrenya biala aye yɛ ko pɛ.

Mɔlebɛbo 29:1-30.