Bɛdo Dwosefi Efiade

MEKƐ mɔɔ bɛvale Dwosefi bɛhɔle Yigyibiti la ɛnee yenyia ɛvolɛ 17 pɛ. Bɛdɔnenle ye bɛmanle nrenya bie mɔɔ bɛfɛlɛ ye Pɔtefaa la wɔ ɛkɛ. Ɛnee Pɔtefaa yɛ Yigyibiti belemgbunli ne mɔɔ bɛfɛlɛ ye Falo la gyima.

Dwosefi yelele ɔ nwo kpalɛ yɛle gyima manle ɔ menle Pɔtefaa. Yemɔti mekɛ mɔɔ Dwosefi nyinle la, Pɔtefaa vale ye sua nu ɛkɛ ne debie biala wulale ɔ sa nu. Ɛnee, akee, duzu ati a Dwosefi la efiade ɛke a? Ɔlua Pɔtefaa aye ne anwo zo a ɛmaa yera ye zɔ a.

Dwosefi nyinle rayɛle nrenya kɛnlɛma kpalɛ, na ɛnee Pɔtefaa aye ne kpondɛ kɛ ɔ nee ye da. Noko ɛnee Dwosefi ze kɛ ɛhye le ɛtane, ɔti yeanyɛ. Pɔtefaa aye ne vale ɛya kpole. Yemɔti mɔɔ ɔ hu rale la, ɔzele ye kɛ: ‘Wɔ sonvolɛ ɛtane ne, Dwosefi, kpondɛ kɛ ɔ nee me da!’ Pɔtefaa liele ɔ ye lile, na ɔvale Dwosefi anwo ɛya kpalɛ. Ɔti ɔmanle bɛvale ye bɛdole efiade.

Yeangyɛ biala nrenya ne mɔɔ nea efiade ne azo la nwunle ye kɛ Dwosefi le sonla kpalɛ. Yemɔti ɔvale bɛdabɛ mɔɔ bɛwɔ efiade ɛkɛ ne la amuala ɔwulale ɔ sa nu. Nzinlii Falo vale ye sonvolɛ ne mɔɔ nea nza zo nee mɔɔ to kpanwo la anwo ɛya, na ɔvale bɛ ɔguale efiade. Kenle ko nɔɔzo, bɛ nuhua ko biala hanle ɛlalɛ ngakyile bie, noko ɛnee bɛnde mɔɔ ɛlalɛ ne kile la abo. Aleɛ hyenle la Dwosefi zele kɛ: ‘Bɛha bɛ ɛlalɛ ne mɔ bɛhile me.’ Na bɛhanle la, Nyamenle boale Dwosefi, manle ɔhilele bɛ ɛlalɛ ne mɔ abo.

Dwosefi zele sonvolɛ ne mɔɔ nea nza zo la kɛ: ‘Ɛnɛ anwo zo kenle nsa bɛbaraye wɔ wɔ efiade ɛke, na ɛbazia wɔayɛ Falo nza zo neavolɛ bieko.’ Yemɔti Dwosefi hanle zɔle zolɛ kɛ: ‘Saa bɛye wɔ a, bɔ me duma kile Falo, na boa maa ɔye me ɔvi ɛke.’ Na sonvolɛ ne mɔɔ to kpanwo la ɛdeɛ, Dwosefi zele ye kɛ: ‘Ɛnɛ anwo zo kenle nsa Falo bamaa bɛapɛ ɛ ti.’

Ye kenle nsa ne azo ɔzile kɛmɔ Dwosefi hanle ye la ala. Falo manle bɛpɛle sonvolɛ ne mɔɔ to kpanwo ne la ati. Sonvolɛ ne mɔɔ nea nza zo la ɛdeɛ, bɛyele ye bɛvile efiade na ɔbɔle ɔ bo ɔzonlenle belemgbunli ne bieko. Noko nza zo neavolɛ ne angakye Dwosefi! Yeambɔ ye duma yeangile Falo, na Dwosefi hɔle zo lale efiade.

Mɔlebɛbo 39:1-23; 40:1-23.