Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 12

Menli Si Tawa Kpole Bie

Menli Si Tawa Kpole Bie

ƐVOLƐ dɔɔnwo pɛle nu. Nowa amra ne mɔ wole mralɛ dɔɔnwo. Na bɛ mra ne mɔ nyinle na bɛwole mralɛ dɔɔnwo. Yeangyɛ biala yɛɛ azɛlɛ ne azo yɛle menli ngome a.

Menli ɛhye mɔ anu ko mɔɔ bɛfɛlɛ ye Nemelɔdo la le Nowa alɔnra kansoa. Ɛnee ɔle sonla ɛtane mɔɔ lile bɔlɛ hunle nane nee menli muala a. Nemelɔdo eza yɛle ɔ nwo belemgbunli lile menli nwo zo. Nyamenle angulo Nemelɔdo edwɛkɛ.

Ɛnee menli mɔɔ wɔ ɛkɛ mekɛ zɔhane la amuala ka aneɛ ko. Na ɛnee Nemelɔdo kpondɛ kɛ ɔka bɛ ɔbɔ nuhua na ɔdi bɛ nwo zo. Ɔti ɛze mɔɔ ɔyɛle a? Ɔhanle ɔhilele menli ne kɛ bɛkyekye suakpole ko na bɛzi tawa tendendenlenle ko wɔ nuhua. Nea kɛ bɛwɔ nvoninli ne anu mɔɔ bɛlɛpɛ belekese ɛ.

Gyihova Nyamenle anye anlie suakpole ne ɛkyekyelɛ ne anwo. Ɛnee Nyamenle kpondɛ kɛ menli ne tɛlɛ na bɛtɛnla azɛlɛ ne azo ɛleka biala. Noko menli ne mɔ hanle kɛ: ‘Bɛrɛla! Bɛmaa yɛkyekye suakpole ko na yɛzi tawa tendendenlenle ko mɔɔ kɔ anwuma kpalɛ kpalɛ la. Na yɛva yɛlie duma!’ Ɛnee menli ne kpondɛ duma amaa bɛ nwo, na tɛ Nyamenle ɔ.

Yemɔti Nyamenle manle menli ne gyakyile tawa ne ɛzilɛ. Ɛze kɛzi ɔyɛle ye la ɔ? Kɛ anrɛɛ bɛkɛha aneɛ ko la ɔmanle bɛ aneɛ ne hakyile yɛle ngakyile ngakyile arɛlevilɛ nu. Suazivoma ne ande bɛ nwo aneɛ bieko. Ɛhye ati a bɛravɛlɛle bɛ suakpole ne Babelɔn, mɔɔ ɔ bo a le “Basabasayɛlɛ” la.

Menli ne akee bɔle ɔ bo dule vile Babelɔn hɔle. Ekpunli ekpunli mɔɔ te bɛ nwo aneɛ la hɔdɛnlanle ɛleka ko wɔ azɛlɛ ne foa bie azo.

Mɔlebɛbo 10:1, 8-10; 11:1-9.