Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 9

Nowa Bobɔ Ɛlɛne

Nowa Bobɔ Ɛlɛne

ƐNEE Nowa aye ko yɛɛ ɔ mra mrenya nsa. Ɔ mra ne mɔ aluma a le Hyɛm, Ham yɛɛ Gyeefɛte. Na ɛnee mralɛ mrenya nsa ɛhye mɔ ko biala aye ko. Yemɔti ɛnee menli mɔtwɛ a wɔ Nowa abusua ne anu a.

Akee Nyamenle manle Nowa yɛle debie mɔɔ ɔtɛyɛle bie ɛlɛ la. Ɔhanle ɔhilele ye kɛ ɔbobɔ ɛlɛne kpole ko. Ɛnee ɛlɛne ɛhye tɛlɛ kɛ meli la, noko ɛnee ɔle kɛ ɛlɛka tendenle, kpole bie. Nyamenle hanle kɛ: ‘Bobɔ ye nzɛzo nsa, na kyɛ nuhua ekpumgbunli ekpumgbunli.’ Ɛnee Nowa nee ye abusua ne yɛɛ nane ne mɔ, nee aleɛ mɔɔ bɛ kɔsɔɔti bɛbahyia la a bahɔ ekpumgbunli ne mɔ anu a.

Nyamenle eza hanle hilele Nowa kɛ ɔbobɔ ɛlɛne ne mɔɔ nzule ɛnrɛhɔ nu a. Nyamenle hanle kɛ: ‘Mebamaa ezule kpole bie adɔ toonwo abu aze, yeazɛkye aleɛabo amuala. Debie anzɛɛ awie biala mɔɔ ɛnle ɛlɛne ne anu la bawu.’

Nowa nee ɔ mra ne mɔ diele Gyihova na bɛbɔle ɔ bo kɛ bɛbobɔ ɛlɛne ne. Na menli mɔɔ ɛha la ɛdeɛ bɛzelele ala. Bɛhɔle zolɛ bɛyɛle ninyɛndane. Mekɛ mɔɔ Nowa hanle mɔɔ Nyamenle ɛlɛba arayɛ la hilele bɛ la, bɛanlie bɛanli.

Ɔhyɛle kpalɛ na ɛlɛne ɛbobɔlɛ ne awie ɔluakɛ ɛnee ɔle kpole kpalɛ. Awieleɛ kolaa ne, wɔ ɛvolɛ dɔɔnwo anzi, bɛwiele. Akee Nyamenle hanle hilele Nowa kɛ ɔva nane ne mɔ ɔhɔ ɛlɛne ne anu. Nyamenle hanle kɛ ɔva nane ne bie mɔ nwiɔ, nyinli nee belɛ. Na nane ne bie mɔ ɛdeɛ, Nyamenle hanle hilele Nowa kɛ ɔva nsuu nsuu ɔrɛla. Eza Nyamenle hanle hilele Nowa kɛ ɔva nloma ngakyile ne amuala bie ɔhɔ ɛlɛne ne anu. Nowa yɛle mɔɔ Nyamenle zele ye la pɛpɛɛpɛ.

Ɛhye mɔ anzi, Nowa nee ye abusua ne hɔle ɛlɛne ne anu. Akee Nyamenle dole anlenkɛ ne anu. Nowa nee ye abusua ne hendɛle ɛlɛne ne anu. Fa ye kɛ ɛwɔ ɛlɛne ne anu bie, yɛɛ ɛ nee bɛ ɛlɛkendɛ a. Asoo azuyilɛ ne bara amgba kɛmɔ Nyamenle hanle la?

Mɔlebɛbo 6:9-22; 7:1-9.