Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 8

Kakanyinlima Wɔ Azɛlɛ Ne Azo

Kakanyinlima Wɔ Azɛlɛ Ne Azo

SAA ɛ nee awie ɛlɛba arayia yɛɛ ahenle ne tendenle kpula sua ti zo a, anrɛɛ duzu a bara wɔ adwenle nu a? Sonla zɛhae bayɛ kakanyinli! Mekɛ bie mɔɔ ɛze ɛhɔ la ɛnee kakanyinlima wɔ azɛlɛ ne azo. Baebolo ne kile kɛ bɛ ze mɔ le anwumabɔvolɛma mɔɔ ɛnee bɛwɔ anwuma a. Noko kɛ ɛhye kola si yɛ zɔ ɛ?

Kakye kɛ, ɛnee Seetan, anwumabɔvolɛ ɛtane ne anye ɛbolo ɛlɛtwehwe edwɛkɛ ara. Ɛnee ɔlɛbɔ mɔdenle kɛ ɔkɛmaa Nyamenle anwumabɔvolɛ ne mɔ bɔbɔ kɛyɛ ɛtane. Yeangyɛ, anwumabɔvolɛ ne mɔ bie bɔle ɔ bo kɛ bɛtie Seetan. Bɛgyakyile gyima mɔɔ ɛnee Nyamenle ɛva ɛmaa bɛ kɛ bɛyɛ wɔ anwuma la. Na bɛrale azɛlɛ ye azo bɛravale sonla nwonane bɛkpolole. Ɛze deɛ mɔɔ ɔti bɛyɛle zɔhane la ɔ?

Baebolo ne ka kɛ ɔyɛle zɔ ɔluakɛ Nyamenle mra ɛhye mɔ nwunle azɛlɛ ye azo mraalɛ ngɛnlɛma ne mɔ na ɛnee bɛkpondɛ kɛ bɛ nee bɛ tɛnla. Yemɔti bɛrale azɛlɛ ye azo na bɛgyale mraalɛ ɛhye mɔ. Baebolo ne ka kɛ ɛnee ɛhye le ɛtane, ɔluakɛ Nyamenle bɔle anwumabɔvolɛ ne mɔ kɛ bɛdɛnla anwuma.

Mɔɔ anwumabɔvolɛ ne mɔ nee bɛ ye mɔ wole mralɛ la, ɛnee mralɛ ɛhye mɔ le ngakyile. Mɔlebɛbo ne ɛnee bɛnle ngakyile biala. Noko bɛhɔle zo bɛnyinyinle, bɛyɛle mgbole mgbole bie, na bɛ nwo yɛle se kpalɛ kpalɛ, hɔdwule kɛ bɛyɛle kakanyinlima la.

Ɛnee kakanyinlima ɛhye mɔ ɛnle menli mgbalɛ. Na ɔluakɛ ɛnee bɛle mgbole na bɛ nwo yɛ se la ati, bɛsisile menli. Bɛbɔle mɔdenle kɛ bɛmaa awie biala ayɛ ɛtane kɛ bɛdabɛ la.

Ɛnee Yinɔko ɛwu, noko ɛnee nrenya ko wɔ azɛlɛ ne azo mɔɔ le sonla kpalɛ a. Nrenya ɛhye a le Nowa. Dahuu ɔyɛle mɔɔ Nyamenle kpondɛ kɛ ɔyɛ la.

Kenle ko Nyamenle hanle hilele Nowa kɛ mekɛ ɛdwu kɛ Ɔsɛkye ɛtanevolɛma kɔsɔɔti. Noko ɛnee Nyamenle balie Nowa, ye abusua ne yɛɛ nane nane dɔɔnwo ngoane. Maa yɛnlea kɛ Nyamenle zile yɛle ɛhye la.

Mɔlebɛbo 6:1-8; Dwuudu 6.