Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 3

Nrenyia Nee Raalɛ Mɔɔ Lumua

Nrenyia Nee Raalɛ Mɔɔ Lumua

DUZU a le ngakyile wɔ nvoninli ɛhye anu a? Nyɛɛ, menli mɔɔ wɔ nu la ɔ. Bɛmɛ a le nrenya nee raalɛ mɔɔ lumua a. Nwane a bɔle bɛ a? Nyamenle ɔ. Ɛze ye duma ɔ? Yemɔ a le Gyihova. Na bɛravɛlɛle nrenya ne nee raalɛ ne Adam nee Yive.

Kɛ Gyihova Nyamenle bɔle Adam la ɛne. Ɔvale azɛlɛ nwo ndɛtɛlɛ na ɔvale ɔnwonle sonlabaka mɔɔ di munli, sonla nrenya sonlabaka. Akee ɔliele ngoane ɛnwomenle ɔguale sonla ne abonyi nu, na Adam rale ngoane nu.

Gyihova Nyamenle manle Adam gyima. Ɔzele Adam kɛ ɔtoto nane ngakyile ne mɔ amuala aluma. Ɔbayɛ kɛ Adam guale ɔ nye aze nleanle nane ne mɔ mekɛ tendenle amaa yeahola yeava duma mɔɔ fɛta la yeamaa bɛ nuhua ko biala. Mɔɔ Adam ɛlɛtoto nane ne mɔ aluma la ɔbɔle ɔ bo ɔnwunle debie. Ɛze deɛ holɛ ko ɔ?

Ɛnee nane ne mɔ amuala lua ye nwiɔ nwiɔ. Ɛnee papa ɛzonle nee mame ɛzonle wɔ ɛkɛ, yɛɛ papa awenade nee mame awenade wɔ ɛkɛ. Noko ɛnee Adam ɛnlɛ awie mɔɔ bayɛ ye bokavolɛ a. Yemɔti Gyihova manle Adam lafele kpole bie, na ɔyele ɔ nvenle foa bowule ko. Gyihova vale bowule ɛhye bɔle raalɛ manle Adam, na ɔrayɛle ɔ ye.

Nea anyelielɛ mɔɔ Adam nyianle ye a! Na suzu anyelielɛ mɔɔ ɔbahola yeara ye kɛ Yive nyianle ye kɛ bɛvale ye bɛdole tola kɛnlɛma zɛhae anu la anwo nea! Ɛnee akee bɛkola bɛwo mralɛ na bɛbɔ nu bɛtɛnla anyelielɛ nu.

Ɛnee Gyihova kpondɛ kɛ Adam nee Yive tɛnla aze dahuu. Ɛnee ɔkpondɛ kɛ bɛmaa azɛlɛ ne azo amuala kɛnlɛma yɛ kɛ Yidɛn tola ne la. Nea anyelielɛ mɔɔ ɔbahola yeara ye kɛ Adam nee Yive nyianle ye mekɛ mɔɔ bɛdwenledwenle ɛhye ɛyɛlɛ nwo la! Asoo anrɛɛ ɛbahulo kɛ ɛ nee bɛ kɛbɔ nu kɛyɛ azɛlɛ ne tola kɛnlɛma ɔ? Noko Adam nee Yive anyelielɛ ne andɛnla ɛkɛ angyɛ. Maa yɛnlea deɛ mɔɔ ɔti ɔrale ye zɔ la.

Edwɛndolɛ 83:18; Mɔlebɛbo 1:26-31; 2:7-25.