Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 48

Bɛdwazole Kunlavolɛ Raalɛ Bie Ara

Bɛdwazole Kunlavolɛ Raalɛ Bie Ara

Mekɛ mɔɔ ɛnee ezule ne ɛndɔ la, Gyihova zele Yilaegya kɛ: ‘Kɔ Zalefate. Kunlavolɛ raalɛ bie bamaa wɔ aleɛ.’ Mɔɔ Yilaegya dwule sua ne anlenkɛ kpole ne anloa la, ɔyiale kunlavolɛ raalɛ bie mɔɔ ɔlɛsesa ɛyɛne la. Ɔhanle kɛ ɔmaa ye nzule ɔmaa ɔnlo. Mɔɔ raalɛ ne ɛlɛkɔ la, Yilaegya eza hanle kɛ: ‘Mesɛlɛ wɔ anrɛɛ bɛlɛ me paano ekyi.’ Noko kunlavolɛ raalɛ ne buale ye kɛ: ‘Menlɛ paano. Yeha me esamo ekyi nee me nwole ekyi mɔɔ me nee me ra ne bali a.’ Yilaegya hanle kɛ: ‘Gyihova se saa ɛto paano ne bie ɛmaa me a, wɔ esamo ne nee wɔ nwole ne ɛnrɛwie too ezule ne adɔ bieko.’

Yemɔti kunlavolɛ raalɛ ne hɔle sua nu na ɔdonle paano ne bie ɔmaanle Gyihova ngapezonli ne. Kɛ mɔɔ Gyihova hanle la, amgba raalɛ ne nee ɔ ra nrenyia ne nyianle aleɛ lile wɔ ɛhɔne mekɛ ne anu. Ye esamo ne nee ye nwole ne anwie ɛlɛ.

 Noko alɔbɔlɛ edwɛkɛ bie zile. Kunlavolɛ ne ara nrenyia ne anwo dole ye na ɔwule. Ɔkpale Yilaegya kyɛlɛ kɛ ɔboa ye. Yemɔti Yilaegya vale kakula ne dole ɔ sa zo hɔle sua ne ati zo ekpumgbunli bie anu. Ɔvale ye ɔdole ɛkpa zo na ɔyɛle asɔne kɛ: ‘Gyihova, mesɛlɛ wɔ maa kakula ne ɛzia ɛrɛla ngoane nu bieko.’ Ɛhye bayɛ nwanwane debie kpalɛ! Ɛze deɛmɔti ɔ? Ɔluakɛ ɛnee bie ɛtɛsile ɛlɛ. Yɛɛ ɛnee kunlavolɛ raalɛ ne nee ɔ ra ne ɛnle Yizilayɛma bɔbɔ.

Noko kakula ne rale ngoane nu bieko na ɔbɔle ɔ bo kɛ ɔdie ɛnwomenle! Yilaegya zele raalɛ ne kɛ: ‘Nea! Ɛ ra ne ɛra ngoane nu bieko.’ Ɔ nye liele kpole na ɔzele Yilaegya kɛ: ‘Amgba ɛle Nyamenle sonla. Menwu kɛ edwɛkɛ biala mɔɔ ɛka la vi Gyihova ɛkɛ.’

“Bɛnlea ahɔhɔsɛlɛ: Bɛnlua yɛɛ bɛmbu; bɛnlɛ bonwolo anzɛɛ ɛleka mɔɔ bɛfa aleɛ bɛsie; noko Nyamenle maa bɛ aleɛ. Asoo bɛ nwo ɛngyia ɛndɛla nloma ɔ?”​—Luku 12:24