Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 37

Gyihova Dendɛle Hilele Samoɛle

Gyihova Dendɛle Hilele Samoɛle

Ɛsɔfo Kpanyinli Yilae lɛ ɔ mra mrenyia nwiɔ mɔɔ bɛsonle wɔ ɛdanlɛsua nu ɛkɛ ne a. Bɛfɛlɛ bɛ Hɔfenae nee Fenɛhaze. Bɛandie Gyihova mɛla ne mɔ yɛɛ bɛ nee menli ne lile ye atisesebɛ zo. Saa Yizilayɛma fa nane ba kɛ bɛfa bɛabɔ afɔle a, Hɔfenae nee Fenɛhaze sa bɛ die nane ne ɛleka kpalɛ ne. Yilae dele mɔɔ ɔ mra ne mɔ ɛlɛyɛ la, noko yeanyɛ nwolɛ ɛhwee. Asoo Gyihova bamaa bɛahɔ zo bɛayɛ ɛhye ɔ?

Ɛnee Samoɛle le kakula ɛdeɛ, noko yeanzukoa Hɔfenae nee Fenɛhaze. Gyihova anye liele Samoɛle anwo. Kenle ko nɔɔzo mɔɔ ɛnee Samoɛle ɛla la, ɔdele kɛ ɛnelɛ bie ɛlɛfɛlɛ ye. Ɔdwazole ɔhɔhanle ɔhilele Yilae kɛ: ‘Mera!’ Noko Yilae buale kɛ: ‘Metɛfɛlɛle wɔ. Sia kɔla.’ Samoɛle ziale hɔlale. Ɛnelɛ ne vɛlɛle ye bieko. Nsa ne azo, Yilae nwunle kɛ Gyihova a ɛlɛfɛlɛ Samoɛle a. Yemɔti ɔhanle ɔhilele Samoɛle kɛ saa ɛnelɛ ne fɛlɛ ye bieko a, ɔha kɛ: ‘Gyihova tendɛ! Wɔ sonvolɛ ɛlɛtie wɔ.’

Samoɛle ziale hɔlale. Ɔdele ɛnelɛ ne bieko kɛ: ‘Samoɛle! Samoɛle!’ Ɔbuale kɛ: ‘Tendɛ na wɔ sonvolɛ ɛlɛtie wɔ.’ Gyihova zele ye kɛ: ‘Ka kile Yilae kɛ, mebadea ɔ nee ye abusua ne. Ɔze  ɛtane mɔɔ ɔ mra ne mɔ ɛlɛyɛ wɔ me ɛdanlɛsua ne anu la, noko ɔnyɛ nwolɛ ɛhwee.’ Aleɛ hyenle la, Samoɛle hɔbukele ɛdanlɛsua ne nlenkɛ ne mɔ kɛ mɔɔ ɔyɛ ye dɛba la. Ɛnee ɔsulo kɛ ɔbaha nrɛlaleɛ mɔɔ Gyihova ɛva ɛmaa ye la yeahile ɛsɔfo kpanyinli ne. Noko Yilae mumua ne bizale ye kɛ: ‘Me ra, duzu edwɛkɛ a Gyihova hanle hilele wɔ a? Ka debie biala kile me.’ Yemɔti Samoɛle hanle edwɛkɛ ne amuala hilele ye.

Mɔɔ Samoɛle ɛlɛnyi la, Gyihova nee ye luale dahuu. Akee bɛnwunle ye wɔ Yizilayɛ maanle ne kɔsɔɔti anu kɛ Gyihova ɛkpa Samoɛle kɛ ngapezonli nee ndɛnebuavolɛ.

“Bɛhakye bɛ Bɔvolɛ ne kolaa na munzule mekɛ ne mɔɔ ɛnee bɛbikye mgbanyifoa la adwu.”​​—Nolobɔvo ne 12:1