Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 21

Ngyegyelɛ Mɔɔ Tɔ Zo Bulu La

Ngyegyelɛ Mɔɔ Tɔ Zo Bulu La

Mosisi bɔle Falo ɛwɔkɛ kɛ ɔnrɛra ye ɛkɛ ne bieko. Noko kolaa na yeahɔ la, ɔhanle ɔhilele Falo kɛ: ‘Nɔe, Yigyibitinli biala belamunli ralɛ nrenyia bawu, ɔvi Falo anwo zo too kɔdwu ye azonvolɛ ne mɔ anwo zo.’

Gyihova hanle kɛ Yizilayɛma ɛli aleɛ titili bie. Ɔhanle kɛ: ‘Bɛhu boane anzɛɛ abɔnkye ralɛ nyinli mɔɔ yeli ɛvolɛ ko ala la, na bɛva ye mogya ne bie bɛha bɛ azua ne mɔ nlenkɛ ne felɛmo ne mɔ anwo. Bɛdondo nane ne na bɛva bɛboka paano mɔɔ mgbɔvonle ɛnle nu la anwo bɛli. Bɛwula bɛ adɛladeɛ nee bɛ mgbɔlaboa, na bɛziezie bɛ nwo bɛzie. Ɛnɛ nɔe mebamaa bɛahɔ.’ Asoo ɛkola ɛnwu kɛzi ɛhye maanle Yizilayɛma anye liele la ɔ?

Nɔe ne, Gyihova anwumabɔvolɛ hɔle Yigyibitinli biala sua nu. Na ɔhunle belamunli ralɛ biala mɔɔ wɔ awuke mɔɔ mogya ɛnle ye nlenkɛ ne mɔ felɛmo ne anwo anu la. Noko yeangu awie biala wɔ awuke mɔɔ mogya wɔ ye nlenkɛ ne felɛmo ne mɔ anwo anu la. Yigyibitinli biala belamunli ralɛ wule. Noko Yizilayɛma belamunli mralɛ ne mɔ ko bɔbɔ anwu.

Falo bɔbɔ ara wule. Ɛhye bole Falo anwo zo. Ɛkɛ ne ala ɔhanle ɔhilele Mosisi nee Aalɔn kɛ: ‘Bɛha bɛ nwo bɛhɔ, bɛhɔzonle bɛ Nyamenle ne. Bɛva bɛ nyɛmoa kɔsɔɔti bɛhɔ!’

 Yizilayɛma hyehyɛle bɛ nwo abusua abusua na bɛvile Yigyibiti wɔ mekɛ mɔɔ ɛnee siane ne ɛyɛ mumua la. Ɛnee Yizilayɛ mrenyia ne mɔ bayɛ kɛyɛ 600,000 yɛɛ mraalɛ nee ngakula mɔɔ boka nwo la zonle. Ɛnee menli gyɛne dɔɔnwo noko kpondɛ kɛ bɛsonle Gyihova, yemɔti bɛdoale Yizilayɛma. Akee Yizilayɛma anwo dɔle bɛ!

Amaa bɛahakye kɛzi Gyihova liele bɛ la, ɛnee bɛbali zɔhane aleɛ titili ne ɛvolɛ biala. Ɛnee bɛfɛlɛ ye Akpabɛnwo.

“Ɛhye ati a memaa adenle mɔɔ ɛtɛbɔ ɛkɛ a: amaa mealua ɛ nwo zo meala me tumi ne ali na bɛabɔ me duma wɔ azɛlɛ ye azo amuala.”​​—Wulomuma 9:17