Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 17

Mosisi Kpale Kɛ Ɔbazonle Gyihova

Mosisi Kpale Kɛ Ɔbazonle Gyihova

Mɔɔ Gyekɔbo abusua ne wɔ Yigyibiti la, ɛnee bɛfɛlɛ bɛ Yizilayɛma. Mɔɔ Gyekɔbo nee Dwosefi wule la, Falo fofolɛ lile Yigyibiti belemgbunli. Ɔzulole Yizilayɛma ɔluakɛ ɛnee bɛ nwo ɛlɛso yɛɛ bɛ nwo yɛ se. Yemɔti Falo maanle Yizilayɛma yɛle ngɛkɛlɛ. Ɔmaanle bɛyɛle gyima ɛsesebɛ, bɛpɛle belekese yɛɛ bɛyɛlɛ gyima wɔ bɛ ɛya ne mɔ anu. Noko mɔɔ Yigyibitima ɛlɛmaa Yizilayɛma ayɛ gyima ɛsesebɛ la, ɛnee bɛ nwo ɛlɛso kpalɛ. Falo vale ɛya na ɔhanle kɛ bɛhu Yizilayɛ ngakula mrenyia mɔɔ bɛkɛwo bɛ la kɔsɔɔti. Ɛnea a ɛhye bamaa Yizilayɛma ahonle adu ɔ?

Yizilayɛnli raalɛ ko mɔɔ bɛfɛlɛ ye Dwɔkɛbɛde la wole kakula nrenyia kɛnlɛma bie. Amaa bɛangu kakula ne la, ɔvale ye ɔdole kɛndɛne nu na ɔvale ye ɔveale ndɔ anzɛɛ ndile ne mɔɔ wɔ Azule Naele ne anloa la anu. Kakula ne adiema raalɛ Meleam gyinlanle ahane kɛ ɔnea edwɛkɛ mɔɔ bazi la.

Falo ara raalɛ ne hɔle azule ne anloa kɛ  ɔkabia na ɔnwunle kɛndɛne ne. Ɔnwunle kɛ adɔma bie la nu ɔlɛsu, na ɔyɛle ye alɔbɔlɛ. Meleam vindele razele ye kɛ: ‘Mengɔnvɛlɛ awie memaa ɔrava kakula ne ɔhɔnlea ye ɔmaa wɔ ɔ?’ Falo ara raalɛ ne hanle kɛ ɛhɛe, yemɔti Meleam hɔvɛlɛle ye mame Dwɔkɛbɛde. Falo ara raalɛ ne hanle kɛ: ‘Fa adɔma ɛhye, nea ye ma me na mebadua wɔ kakɛ.’

Mɔɔ kakula ne yɛle kpanyinli ekyii la, Dwɔkɛbɛde vale ye rɛlɛle Falo ara raalɛ ne, na ɔdonle ye duma Mosisi. Mosisi nyinle la, ɔyɛle belemgbunli ne ara na anrɛɛ ɔbahola yeanyia debie biala mɔɔ ɔkulo la. Noko Mosisi arɛle anvi Gyihova ɛlɛ. Ɛnee ɔze kɛ ɔle Yizilayɛnli na ɔnle Yigyibitinli. Na ɔkpale kɛ ɔbazonle Gyihova.

Mɔɔ Mosisi lile ɛvolɛ 40 la, ɔnwunle kɛ ɔwɔ kɛ ɔboa ye menli ne. Mɔɔ Mosisi nwunle kɛ Yigyibitinli bie ɛlɛbo Yizilayɛnli bie la, ɔbɔle Yigyibitinli ne ɔhunle ye. Mosisi vunle funli ne veale ɛnwea ne anu. Mɔɔ Falo dele ɛhye la, ɔyɛle kɛ ɔku Mosisi. Noko Mosisi nriandile hɔle Medean. Ɔhɔdwule ɛkɛ ne la, Gyihova nleanle ye.

“Diedi ti . . . Mosisi nyinle la, ɔkpole kɛ bɛkɛvɛlɛ ye Falo ara raalɛ ne ara, ɔhulole kɛ ɔ nee Nyamenle menli ne kɛli nyane.”​​—Hibuluma 11:24, 25