Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 14

Akɛlɛ Bie Mɔɔ Diele Nyamenle La

Akɛlɛ Bie Mɔɔ Diele Nyamenle La

Ɛnee Gyekɔbo amra ngakula ne mɔ anu ko a le Dwosefi. Dwosefi amediema ne mɔ nwunle kɛ bɛ papa kulo Dwosefi edwɛkɛ kpalɛ. Ɛnea a adwenle boni a bɛnyianle ye wɔ ɛhye anwo a? Bɛ nye bolole Dwosefi yɛɛ bɛangulo ye edwɛkɛ. Mɔɔ Dwosefi hanle ɛlalɛ bie la, ɔhanle nwolɛ edwɛkɛ ɔhilele ɔ mediema ne mɔ. Bɛdele ɔ bo kɛ kenle ko dedee bɛbabɔ bɛ ti aze bɛamaa ye. Akee Dwosefi anwo yɛle bɛ ahyi kpole kpalɛ!

Kenle ko bie, ɛnee Dwosefi amediema ne mɔ ɛlɛnea bɛ mboane wɔ ɛleka bie mɔɔ bikye Hyikɛm la. Yemɔti Gyekɔbo zoanle Dwosefi kɛ ɔhɔnlea kɛzi ɔ mediema ne mɔ anwo de la. Mɔɔ bɛnwunle kɛ ɔvi moamoa ɔlɛba la, bɛhanle bɛhilele bɛ nwo kɛ: ‘Ahenle mɔɔ ka ɛlalɛ mgbole ne la a ɛlɛba la. Bɛmaa yɛhu ye!’ Bɛhyele ye bɛdole kuma kuloonwu bie anu. Noko ɔ mediema ne mɔ anu ko mɔɔ bɛfɛlɛ ye Dwuda la hanle kɛ: ‘Bɛmmaku ye! Bɛmaa yɛdɔne ye kɛ akɛlɛ.’ Yemɔti bɛdɔnenle Dwosefi dwɛtɛ fufule 20 bɛmaanle Medeanema bie mɔɔ bɛlɛkɔ Yigyibiti la.

Akee Dwosefi amediema ne mɔ vale ye tɛladeɛ ne bɔle abɔnkye mogya nu, bɛvale bɛhɔhilele bɛ papa na bɛbizale ye kɛ: ‘Asoo tɛ ɛ ra ne tɛladeɛ ne ɛne?’ Yemɔti Gyekɔbo dwenlenle kɛ nane kpole bie a ɛhye ɔ ra ne a. Ɔlile nyane kpole mɔɔ ɛnee awie ɛngola ɛnkyekye ɔ rɛle.

Bɛdɔnenle Dwosefi kɛ akɛlɛ bɛmaanle Yigyibiti maanle kpanyinli bie mɔɔ bɛfɛlɛ ye Pɔtefaa la. Noko ɛnee Gyihova nee Dwosefi lua. Pɔtefaa nwunle kɛ Dwosefi anye bolo ye gyima nwo yɛɛ ɔdi nɔhalɛ. Yemɔti ɔvale sua nu ɛkɛ ne debie biala ɔwulale Dwosefi asa.

 Pɔtefaa aye ne nwunle kɛ Dwosefi le nrenyia kɛnlɛma yɛɛ ɔ nwo yɛ se. Yemɔti ɛnee ɔka ɔkile ye alehyenlɛ biala kɛ ɔ nee ye ɛla. Duzu a Dwosefi yɛle a? Yeanyɛ na ɔhanle kɛ: ‘Kyɛkyɛ! Ɛhye le ɛtane kpole. Me menle die me di yɛɛ ɔye a le wɔ. Saa me nee wɔ da a, mebayɛ ɛtane kpole meatia Nyamenle!’

Kenle ko, Pɔtefaa aye ne bɔle mɔdenle kɛ ɔmaa Dwosefi nee ye ala. Ɔzɔle Dwosefi tɛladeɛ ne anu, noko Dwosefi nriandile. Mɔɔ Pɔtefaa rale sua nu la, raalɛ ne hanle kɛ anrɛɛ Dwosefi nee ye da. Ɛnee ɔlɛbɔ adalɛ. Pɔtefaa vale ɛya kpole na ɔmaanle bɛdole Dwosefi efiade. Noko Gyihova arɛle anvi Dwosefi.

“Ɔti bɛbɛlɛ bɛ nwo aze wɔ Nyamenle tumi kpole ne abo, amaa yeamaa bɛ zo wɔ mekɛ mɔɔ fɛta la anu.”​​—1 Pita 5:6