Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 85

Gyisɛse Yɛle Ayile Wɔ Ɛnwomenlelielɛ Kenle

Gyisɛse Yɛle Ayile Wɔ Ɛnwomenlelielɛ Kenle

Ɛnee Falasiima kpɔ Gyisɛse na bɛkpondɛ kɛ bɛkye ye. Bɛhanle kɛ ɔnle kɛ ɔyɛ wuliravolɛma ayile wɔ Ɛnwomenlelielɛ kenle. Ɛnwomenlelielɛ kenle bie, Gyisɛse nwunle anyezinliravolɛ bie kɛ ɔlɛsɛlɛzɛlɛ ezukoa wɔ gua ne azo. Ɔzele ye ɛdoavolɛma ne kɛ: ‘Bɛnlea kɛzi Nyamenle tumi ne baboa nrenyia ɛhye la.’ Gyisɛse vale nyɛlɛ fɔtɔle ndɛtɛlɛ na ɔvale ɔkpudale nrenyia ne anye. Gyisɛse zele ye kɛ: ‘Kɔnrinzi ɛ nyunlu wɔ Saelowam nzubula ne anu.’ Nrenyia ne yɛle zɔ na ɔnwunle debie.

Ɔzinle menli ne anwo. Bɛhanle kɛ: ‘Asoo tɛ nrenyia ne mɔɔ tɛnla sɛlɛzɛlɛ la ɛne anzɛɛ ɔzɔho ye ala?’ Nrenyia ne hanle kɛ: ‘Bɛwole me la ɛnee me nye ɛzi!’ Bɛbizale ye kɛ: ‘Duzu ati a akee ɛnwu debie a?’ Mɔɔ ɔhanle mɔɔ ɔzile la ɔhilele bɛ la, bɛvale ye bɛhɔmaanle Falasiima ne.

Nrenyia ne zele Falasiima ne kɛ: ‘Gyisɛse fɔtɔle ndɛtɛlɛ vale kpudale me nye na ɔzele me kɛ mengɔnrinzi. Menyɛle ye zɔ yɛɛ menwu debie a.’ Falasiima ne hanle kɛ: ‘Saa Gyisɛse yɛ ayile wɔ Ɛnwomenlelielɛ kenle a, ɛnee ye tumi ne ɛnvi Nyamenle ɛkɛ.’ Bie mɔ noko hanle kɛ: ‘Saa ye tumi ne ɛnvi Nyamenle ɛkɛ a, anrɛɛ ɔnrɛhola ɔnrɛyɛ ayile.’

Falasiima ne vɛlɛle nrenyia ne awovolɛ na bɛbizale bɛ kɛ: ‘Kɛ ɔyɛle mɔɔ kɛkala bɛ ra ne kola  nwu debie ɛ?’ Ye awovolɛ ahonle dule ɔluakɛ ɛnee Falasiima ne ɛha kɛ awie biala mɔɔ kɛnyia Gyisɛse anu diedi la bɛbaye ye bɛavi nyianu sua ne anu. Yemɔti bɛhanle kɛ: ‘Yɛnze. Bɛbiza ye.’ Falasiima ne bizale nrenyia ne kpuya too ɔhanle kɛ: ‘Meha debie biala mehile bɛ. Duzu ati a bɛtɛbiza me a?’ Falasiima ne vale ɛya na bɛvoanle ye.

Gyisɛse nwunle nrenyia ne na ɔbizale ye kɛ: ‘Ɛdie Mɛzaya ne ɛdie ɔ?’ Nrenyia ne hanle kɛ: ‘Saa menwu ye a mebalie ye meali.’ Gyisɛse hanle kɛ: ‘Medame a mele Mɛzaya ne a.’ Asoo Gyisɛse anyɛ deɛ ɔ? Ɔyɛle nrenyia ne ayile na eza ɔboale ye ɔmaanle ɔnyianle diedi.

“Bɛvo, ɔboalekɛ bɛnze Ngɛlɛlera ne anzɛɛ Nyamenle tumi ne.”​​—Mateyu 22:29