Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 83

Gyisɛse Maanle Menli Dɔɔnwo Aleɛ

Gyisɛse Maanle Menli Dɔɔnwo Aleɛ

Ɔka ekyii ɛvolɛ 32 Y.M. Akpabɛnwo Ɛvoyia ne dwu la, ɛzoanvolɛma ne hɔhanle edwɛkɛ ne wɔ ɛleka bie na bɛrale. Ɛnee bɛvɛ, yemɔti Gyisɛse maanle bɛvole ɛlɛne nu bɛhɔle Bɛteseeyeda amaa bɛalie bɛ menle. Noko mɔɔ ɛlɛne ne bikyele ɛnwea ne anloa la, Gyisɛse nwunle kɛ menli dɔɔnwo ɛdoa bɛ wɔ ɛkɛ. Ɛnee Gyisɛse kpondɛ kɛ ɔ nee ye ɛzoanvolɛma ne die bɛ menle ɛdeɛ, noko ɔliele menli mɔɔ rale ɔ nwo ɛkɛ la kɛnlɛma. Ɔyɛle wuliravolɛma ayile na ɔhilehilele bɛ. Gyisɛse hilehilele bɛ Nyamenle Belemgbunlililɛ ne anwo ninyɛne alehyenlɛ ne amuala. Mɔɔ aleɛ ɛlɛdwo la, ye ɛzoanvolɛma ne zele ye kɛ: ‘Ɛhɔne ɛlɛku menli ne. Maa bɛhɔ amaa bɛahola bɛahɔkpondɛ aleɛ bɛali.’

Gyisɛse hanle kɛ: ‘Ɔnle kɛ bɛkɔ. Bɛmaa bɛ debie bɛli.’ Ɛzoanvolɛma ne bizale ye kɛ: ‘Ɛkpondɛ kɛ yɛkɔtɔ aleɛ yɛmaa bɛ ɔ?’ Ɛzoanvolɛ Felepe hanle kɛ: ‘Saa yɛlɛ ezukoa dɔɔnwo bɔbɔ a, yɛnrɛhola yɛnrɛdɔ aleɛ mɔɔ sa menli ɛhye mɔ amuala la.’

Gyisɛse bizale bɛ kɛ: ‘Paano nyɛ a yɛlɛ a?’ Andelu hanle kɛ: ‘Yɛlɛ paano nnu yɛɛ fɛlɛ ngyikyi nwiɔ. Ɛhye ɛnrɛza bɛ fee.’ Gyisɛse hanle kɛ: ‘Bɛva paano ne nee fɛlɛ ne bɛrɛlɛ me.’ Ɔhanle ɔhilele menli ne kɛ bɛdɛnla ye ekpunli ekpunli mɔɔ ko biala kɛyɛ menli 50 anzɛɛ 100 la. Gyisɛse vale paano ne nee fɛlɛ ne, ɔnleanle anwuma na ɔyɛle asɔne. Akee ɔvale ɔmaanle ye ɛzoanvolɛma ne na bɛdabɛ noko bɛvale bɛmaanle menli ne. Mrenyia 5,000 nee mraalɛ yɛɛ ngakula ne mɔ amuala lile na bɛ ko yile. Nzinlii,  ɛzoanvolɛma ne sesale ɔ bo zo ne amaa yeanzɛkye. Bɛnyianle ahɛndɛne 12 tetɛkɛɛ! Ɛhye yɛ nwanwane, ɔnle zɔ ɔ?

Menli ne anye liele kpole kpalɛ yemɔti ɛnee bɛkulo kɛ Gyisɛse yɛ bɛ belemgbunli. Noko ɛnee Gyisɛse ze kɛ mekɛ ɛtɛdwule mɔɔ ɔwɔ kɛ Gyihova sie ye belemgbunli a. Ɔmaanle menli ne hɔle na ɔzele ye ɛzoanvolɛma ne kɛ bɛpɛ Galeli Nyevile ne bɛhɔ ɔ nzi lɔ. Bɛvole bɛ ɛlɛne ne anu na Gyisɛse angomekye hɔle boka bie azo. Duzu ati ɔ? Ɔluakɛ ɛnee ɔkpondɛ kɛ ɔnyia mekɛ ɔyɛ asɔne. Saa Gyisɛse ɛnlɛ alagye bɔbɔ a, ɔkpondɛ mekɛ ɔyɛ asɔne dahuu.

“Bɛmmayɛ aleɛ mɔɔ sɛkye la anwo gyima, emomu bɛyɛ aleɛ mɔɔ ɛnzɛkye na ɔmaa dahuu ngoane mɔɔ sonla Ra ne bava amaa bɛ la anwo gyima.”​​—Dwɔn 6:27