Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 72

Kakula Gyisɛse

Kakula Gyisɛse

Ɛnee Dwosefi, Mɛle nee Gyisɛse yɛɛ bɛ mra mrenyia nee mraalɛ mɔɔ ɛha la de Nazalɛte. Dwosefi yɛle kapenta gyima nleanle abusua ne yɛɛ ɔhilehilele bɛ Gyihova nee ye Mɛla ne mɔ anwo debie. Ɛnee abusua ne kɔ nyianu sua ne anu dahuu kɔsonle yɛɛ ɛvolɛ biala bɛkɔ Gyɛlusalɛm bɛkɔdi Akpabɛnwo Ɛvoyia ne.

Mɔɔ Gyisɛse lile ɛvolɛ 12 la, ye abusua ne pɛle adenle tendenle ne hɔle Gyɛlusalɛm kɛ mɔɔ bɛyɛ ye dɛba la. Ɛnee menli mɔɔ ɛlɛba arali Akpabɛnwo Ɛvoyia ne la ɛyi sua ne azo. Mɔɔ bɛwiele la, Dwosefi nee Mɛle dɔle adenle zo kɛ bɛsia bɛahɔ Nazalɛte, na ɛnee bɛ adwenle yɛ bɛ kɛ Gyisɛse boka bɛ nwo. Noko mɔɔ bɛkpondɛle ye wɔ bɛ mbusuafoɔ anu too la, bɛannwu ye.

Bɛziale bɛhɔle Gyɛlusalɛm na bɛkpondɛle bɛ ra ne too kenle nsa. Akee bɛhɔle ɛzonlenlɛ sua ne anu. Bɛnwunle Gyisɛse wɔ ɛkɛ, ɔde kilehilevolɛma ne avinli, ɔlɛtie bɛ edwɛkɛ ne kpalɛ na ɔlɛbizebiza kpuya kpalɛ. Kilehilevolɛma ne anye liele ɔ nwo kpole na bɛdabɛ noko  bɛbizebizale ye kpuya. Ye mualɛ ne zinle bɛ nwo. Bɛnwunle kɛ ɔze Gyihova Mɛla ne kpalɛ.

Ɛnee Dwosefi nee Mɛle arɛle ɛbɔ kpole, yemɔti Mɛle hanle kɛ: ‘Me ra, me nee wɔ papa yɛvɛ kpalɛ wɔ wɔ ɛkpondɛlɛ nu! Ɛhɔle ni?’ Gyisɛse hanle kɛ: “Bɛnze kɛ ɔwɔ kɛ metɛnla Egya sua nu ɔ?”

Gyisɛse nee ye awovolɛ ziale hɔle Nazalɛte. Dwosefi hilele Gyisɛse kapenta gyima. Mɔɔ Gyisɛse le kakula la, subane boni a ɔnyianle a? Mɔɔ Gyisɛse ɛlɛnyi la, ɔnwunle nrɛlɛbɛ kpole na ɔnyianle ɔ nyunlu wɔ Nyamenle nee menli nyunlu.

“O me Nyamenle, mekulo kɛ meyɛ wɔ ɛhulolɛdeɛ; wɔ mɛla ne wɔ me ahonle nu.”​​—Edwɛndolɛ 40:8