Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐZUKOALƐDEƐ 73

Dwɔn Zieziele Adenle Ne

Dwɔn Zieziele Adenle Ne

Mɔɔ Zɛkalaya nee Ɛlezabɛte ara Dwɔn nyinle la, ɔyɛle ngapezonli. Gyihova maanle Dwɔn hilehilele menli kɛ Mɛzaya ne ɛlɛba. Noko kɛ anrɛɛ Dwɔn bahilehile menli wɔ nyianu azua nee azua gyɛne zo la, ɔhanle edwɛkɛ ne wɔ fienemgbole ne anu. Menli vi Gyɛlusalɛm nee Dwudiya amuala radiele Dwɔn. Ɔhilehilele bɛ kɛ, saa Nyamenle anye balie bɛ nwo a, ɔwɔ kɛ bɛgyakyi ninyɛne mɔɔ ɛnle kpalɛ la ɛyɛlɛ. Menli mɔɔ diele Dwɔn la anu dɔɔnwo nlunle bɛ nwo wɔ bɛ ɛtane nwo, na Dwɔn zɔnenle bɛ wɔ Azule Dwɔdan ne anu.

Ɛnee Dwɔn ɛnva ninyɛne dɔɔnwo ɛngyegye ɔ nwo. Ɛnee ɔwula tɛladeɛ mɔɔ bɛva afunlumu enrinli bɛnwo la yɛɛ ye aleɛ a le abɛbɛ nee ɛbɔ nu wolɛ. Ɛnee menli kulo kɛ bɛnwu Dwɔn. Falasiima nee Sadusiima mɔɔ memaa bɛ nwo zo bɔbɔ la rale ɔ nwo ɛkɛ. Dwɔn zele bɛ kɛ: ‘Ɔwɔ kɛ bɛkakyi bɛ subane na bɛnu bɛ nwo. Bɛmmadwenle kɛ kɛmɔ bɛse bɛle Ebileham amra la ati, bɛle menli titili. Ɛhye ɛngile kɛ bɛle Nyamenle amra.’

Menli dɔɔnwo rabizale Dwɔn kɛ: ‘Duzu a yɛyɛ na Nyamenle anye alie yɛ nwo a?’ Dwɔn zele Dwuuma ne kɛ: “Mɔɔ lɛ adɛladeɛ nwiɔ la ɛmaa mɔɔ ɛnlɛ bie la ko.” Ɛze deɛmɔti ɔhanle ye zɔ la ɔ? Ɛnee ɔkpondɛ kɛ ye ɛdoavolɛma nwu kɛ saa Nyamenle anye balie bɛ nwo a, ɔwɔ kɛ bɛkulo menli edwɛkɛ.

Dwɔn zele adwuledievolɛma kɛ: ‘Bɛli nɔhalɛ na bɛmmasisi awie biala.’ Ɔhanle ɔhilele sogyama kɛ: ‘Bɛmmabɔ apo bɛdie ezukoa yɛɛ bɛmmabɔ adalɛ.’

 Ɛsɔfoma nee Livaema noko rabizale Dwɔn kɛ: ‘Wɔmɔ a le nwane? Awie biala kulo kɛ ɔnwu wɔ.’ Dwɔn hanle kɛ: ‘Kɛmɔ Ayezaya hanle la, mame a mele ɛnelɛ bie mɔɔ ɛlɛtea nu wɔ fienemgbole ne anu, na ɔlɛkile menli adenle yeamaa bɛanwu Gyihova la.’

Menli anye liele mɔɔ ɛnee Dwɔn ɛlɛkilehile bɛ la anwo. Ɛnee menli dɔɔnwo dwenle kɛ Dwɔn a le Mɛzaya ne. Noko ɔhanle ɔhilele bɛ kɛ: ‘Awie mɔɔ lɛ tumi tɛla me la ɛlɛba. Menfɛta kɛ mekɛzianyi ye mgbɔlaboa zo nyɛma bɔbɔ. Mame mefa nzule a mesɔne bɛ a, na yemɔ ɔbava sunsum nwuanzanwuanza a yeazɔne bɛ a.’

“Nrenyia ɛhye rale kɛ ɔbali daselɛ, amaa yeali wienyi ne anwo daselɛ na menli kɔsɔɔti alua ɔ nwo zo alie ali.”​​—Dwɔn 1:7