Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 TILE 19

Sie Ɛ Nwo wɔ Nyamenle Ɛlɔlɛ Nu

Sie Ɛ Nwo wɔ Nyamenle Ɛlɔlɛ Nu
  • Duzu a ɔwɔ kɛ yɛyɛ yɛkile kɛ yɛkulo Nyamenle a?

  • Kɛ yɛbazi yɛazie yɛ nwo wɔ Nyamenle ɛlɔlɛ nu ɛ?

  • Kɛzi Gyihova bayila bɛdabɛ mɔɔ bɛkɔ zo bɛsie bɛ nwo wɔ ye ɛlɔlɛ nu la ɛ?

Asoo ɛbava Gyihova wɔayɛ wɔ ɛvealeka wɔ ngyegyelɛ mekɛ ɛhye anu?

1, 2. Nienwu a yɛbahola yɛanyia ɛvealeka mɔɔ anwobanebɔlɛ wɔ la ɛnɛ a?

FA YE kɛ ɛlua adenle bie anu wɔ mekɛ mɔɔ ahumu ɛlɛtu la. Maanle nu munla. Ezule ne bɔ ɔ bo fedefede, ɔkuluhulu, na akee ɔtɔ kpole. Ɛnriandi ndɛndɛ kɛ ɛkpondɛ ɛleka wɔavea. Ɛkado ɛ nye la, wɔnwu ye kɛ sua bie gyi adehane ɛkɛ ne. Ɔlɛ anwosesebɛ, nuhua le resee, yɛɛ ɛkɛ ne le kɛnlɛma. Nea kɛ ɛ nye bazi alie ɛvealeka zɔhane anwo a!

2 Yɛde mekɛ mɔɔ ɛnle kpalɛ fee la anu. Gyinlabelɛ mɔɔ ewiade ne wɔ nu la ɛlɛsɛkye. Noko yɛlɛ ɛleka mɔɔ yɛbahola yɛanyia anwobanebɔlɛ yɛavi ngyegyelɛ nwo a. Ɔwɔ ni? Yɛ mɔɔ Baebolo ne kilehile la nzonlɛ: ‘Mebaha meahile Gyihova kɛ: “Ɛle me ɛvealeka nee me aranemgbole; ɛle me Nyamenle mɔɔ me rɛle wɔ wɔ nu a.”’Edwɛndolɛ 91:2.

3. Kɛzi yɛbahola yɛava Gyihova yɛayɛ yɛ ɛvealeka ɛ?

3 Suzu ɛhye anwo nea! Gyihova, aleɛabo Bɔvolɛ nee Tumivolɛ ne kola bɔ yɛ nwo bane, ɔluakɛ ɔlɛ tumi ɔtɛla awie biala anzɛɛ debie biala mɔɔ bahola aboda yɛ la. Saa bɔbɔ yɛyia ngyegyelɛ a, Gyihova bahola aye mɔɔ vi nuhua  ba la kɔsɔɔti avi ɛkɛ. Kɛzi yɛbahola yɛava Gyihova yɛayɛ yɛ ɛvealeka ɛ? Ɔwɔ kɛ yɛfa yɛ rɛle yɛwula ye nu. Bieko, Nyamenle Edwɛkɛ ne tu yɛ folɛ kɛ: “Bɛzie bɛ nwo wɔ Nyamenle ɛhulolɛ ne anu.” (Dwuudu 21) Ɛhɛe, ɔhyia kɛ yɛsie yɛ nwo wɔ Nyamenle ɛlɔlɛ nu, na yɛ nee yɛ anwuma Selɛ ne nyia abusuabɔlɛ kpalɛ mɔɔ ɛlɔlɛ wɔ nu a. Saa ɔba ye zɔhane a yɛbahola yɛanyia anwodozo kɛ ɔle yɛ ɛvealeka. Noko kɛzi yɛbahola yɛ nee ye anyia zɛhae abusuabɔlɛ ne ɛ?

NWU NYAMENLE ƐLƆLƐ NE NA YƐ NWOLƐ DEBIE

4, 5. Ndenle mɔɔ Gyihova ɛlua zo ɛla ɛlɔlɛ ali ɛhile yɛ la bie mɔ a le boni?

4 Amaa yɛazie yɛ nwo wɔ Nyamenle ɛlɔlɛ nu la, ɔhyia kɛ yɛte kɛzi Gyihova ɛla ɛlɔlɛ ali ɛhile yɛ la abo. Suzu Baebolo nu ngilehilelɛ mɔɔ wɔlua buluku ɛhye azo wɔzukoa la bie mɔ anwo nea. Kɛ Bɔvolɛ la, Gyihova ɛva azɛlɛ ne ɛmaa yɛ kɛ yɛ aako kɛnlɛma. Yeva aleɛ nee nzule dɔɔnwo, nane ngɛnlɛma, yɛɛ ninyɛne mgbalɛ mɔɔ sonle bolɛ la yeziezie zolɛ. Kɛ Baebolo ne Kɛlɛvolɛ la, Nyamenle ɛmaa yɛnwu ye duma, nee ye subane ne mɔ. Eza, ye Edwɛkɛ ne maa yɛnwu ye kɛ ɔzoanle Gyisɛse, ɔ Ra ne mɔ ɔkulo ye la, ɔmanle ɔrale azɛlɛ ye azo ɔranwunle amaneɛ na ɔwule ɔmanle yɛ. (Dwɔn 3:16) Na duzu a zɔhane ahyɛlɛdeɛ ne kile maa yɛ a? Ɔmaa yɛnyia kenlebie mɔɔ yɛ anyelielɛ la anwo anyelazo.

5 Yɛ kenlebie anyelazo ne eza gyi debie bieko mɔɔ Nyamenle ɛyɛ la azo. Gyihova ɛva Mɛzaya Belemgbunlililɛ mɔɔ le anwuma arane la ɛzie ɛkɛ. Ɔnrɛhyɛ ɔbava amaneɛnwunlɛ kɔsɔɔti yeara awieleɛ na yeayɛ azɛlɛ ye paladaese. Suzu ɛhye anwo nea! Yɛbahola yɛadɛnla ɛkɛ ne wɔ anzondwolɛ nee fɛlɛkolilɛ nu dahuu. (Edwɛndolɛ 37:29) Kolaa na mekɛ zɔhane ara la, Nyamenle ɛmaa yɛ adehilelɛ wɔ kɛzi ɔwɔ kɛ yɛbɔ yɛ ɛbɛla kpalɛ kɛkala la anwo. Eza yemaa yɛnyia asɔneyɛlɛ nwo adenle, mɔɔ maa yɛkola yɛ nee ye di ngitanwo mekɛ biala a. Ɛhye mɔ le ndenle mɔɔ Gyihova ɛlua zolɛ ɛla ɛlɔlɛ ali ɛhile alesama amuala mɔɔ ɛdawɔ noko ɛboka nwolɛ la anu ekyi bie ala.

6. Duzu a ɛbahola wɔayɛ wɔ ɛlɔlɛ mɔɔ Gyihova ɛla ye ali la anwo a?

 6 Kpuyia mɔɔ anwo hyia kɛ ɛsuzu nwolɛ la a le ɛhye: Duzu a ɔwɔ kɛ meyɛ ye wɔ Gyihova ɛlɔlɛ ne anwo a? Menli dɔɔnwo baha kɛ, “Ɔhyia kɛ medame noko mekulo Gyihova.” Asoo kɛ ɛte nganeɛ la ɛ? Gyisɛse hanle kɛ ɛhye a le mɛla titile kpalɛ mɔɔ hyia a: “Fa wɔ ahonle muala, wɔ ɛkɛla muala, nee wɔ adwenle muala kulo [Gyihova, NW] wɔ Nyamenle ne.” (Mateyu 22:37) Ninyɛne dɔɔnwo wɔ ɛkɛ mɔɔ ɔti ɔwɔ kɛ ɛkulo Gyihova Nyamenle a. Noko asoo nganeɛ mɔɔ ɛte kɛ ɛlɛ ɛlɔlɛ zɛhae la a kile kɛ ɛfa wɔ ahonle muala, wɔ ɛkɛla muala, nee wɔ adwenle muala ɛkulo Gyihova a?

7. Asoo nganeɛ mɔɔ yɛte kɛ yɛkulo Nyamenle la ala a anwo hyia a? Kilehile nu.

7 Kɛmɔ Baebolo ne kile la, ɔnle kɛ ɛlɔlɛ mɔɔ yɛnyia yɛamaa Nyamenle la yɛ nganeɛdelɛ bie ala. Nɔhalɛ nu, ɔwɔ nuhua kɛ nganeɛ mɔɔ yɛnyia kɛ yɛkulo Gyihova la anwo hyia ɛdeɛ, noko yemɔ le ɛlɔlɛ kpalɛ mɔɔ yɛnyia yɛamaa ye la mɔlebɛbo. Saa ɛkulo kɛ ɛdua baka bie a, ye ma nwo hyia. Noko saa ɛkpondɛ bakama bie wɔali na bɛfa ye ma ala bɛmaa wɔ a, ɛ kunlu badwo nwo ɔ? Kyɛkyɛ! Zɔhane ala a nganeɛ mɔɔ ɛte kɛ ɛkulo Gyihova Nyamenle la le ye mɔlebɛbo ala a. Baebolo ne kilehile kɛ: “Saa yɛdi Nyamenle mɛla ne mɔ azo a ɛnee yɛkulo Nyamenle, yɛɛ ye mɛla ne mɔ noko ɛnyɛ ɛnlomboɛ.” (1 Dwɔn 5:3) Saa ɛlɔlɛ mɔɔ yɛlɛ yɛmaa Nyamenle la bali munli a ɔwɔ kɛ ɔso ma kpalɛ. Ɔwɔ kɛ ɔda ali wɔ yɛ nyɛleɛ nu.Mateyu 7:16-20.

8, 9. Kɛzi yɛbahola yɛala ɛlɔlɛ nee anyezɔlɛ mɔɔ yɛlɛ yɛmaa Nyamenle la ali ɛ?

8 Yɛkile kɛ yɛkulo Nyamenle ɔlua ye mɛla zo mɔɔ yɛdi na yɛfa ye ngyinlazo ne mɔ yɛyɛ gyima la azo. Ɔnyɛ se kɛ yɛkɛli zo. Gyihova mɛla ne mɔ ɛnle adesoa, emomu ɔboa yɛ ɔmaa yɛbɔ ɛbɛla kpalɛ na yɛnyia anyelielɛ nee asetɛnla mɔɔ yɛ ahunludwolɛ la. (Ayezaya 48:17, 18) Saa yɛbɔ ɛbɛla mɔɔ nee Gyihova  adehilelɛ ne mɔ le ko la a, yɛkile kɛ yɛ nye sɔ mɔɔ yɛ anwuma Selɛ ne ɛyɛ ɛmaa yɛ la amuala. Ɔyɛ alɔbɔlɛ kɛ menli ekyi bie a kile anyezɔlɛ ɛhye wɔ ɛnɛ ewiade ye anu a. Yɛngulo kɛ yɛyɛ kɛ menli bie mɔɔ dɛnlanle aze wɔ mekɛ mɔɔ ɛnee Gyisɛse wɔ azɛlɛ ye azo mɔɔ angile anyezɔlɛ la. Gyisɛse yɛle kokobɛvolɛma bulu ayile noko ko ala a ziale ralale ye ase a. (Luku 17:12-17) Ɛhɛe, yɛkulo kɛ yɛyɛ kɛ ko ne mɔɔ ralale ye ase la na tɛ ngɔnla ne mɔɔ angile anyezɔlɛ la!

9 Noko, Gyihova mɛla boni mɔ a ɔwɔ kɛ yɛdi zo a? Yɛzuzu nuhua dɔɔnwo anwo wɔ buluku ɛhye anu, noko maa yɛnleɛnlea ekyi bie anu. Saa yɛdi Nyamenle mɛla ne mɔ azo a ɔbaboa yɛ amaa yɛazie yɛ nwo wɔ Nyamenle ɛlɔlɛ nu.

KƆ ZO TWE BIKYE GYIHOVA

10. Kilehile deɛ mɔɔ ɔti ɔhyia kɛ yɛkɔ zo yɛnyia Gyihova Nyamenle anwo ndelebɛbo la anu.

10 Gyihova anwo debie mɔɔ ɛbazukoa la hyia na wɔabikye ye kpalɛ. Ɔle debie mɔɔ ɔwɔ kɛ ɔkɔ zo dahuu a. Saa ɛde alie nwo nɔɔzo mɔɔ maanle nu yɛ ɛyɛlɛ la ɛlɛte senle a, asoo ɛbamaa senle ne aha aze na yeanlu ɔ? Kyɛkyɛ. Ɛbahɔ  zo wɔava ɛyɛne wɔawula senle ne anu wɔamaa yeazɔ kpalɛ yeayɛ wuluwulu. Tɛ ye zɔ a ɛyɛlɛ bahola awolo ɛ kunlu na wɔ ngoane arala esiane nu! Kɛmɔ ɛyɛne maa senle sɔ la, zɔhane ala a “Nyamenle nwo adwenlenubukelɛ” anzɛɛ ndelebɛbo maa ɛlɔlɛ mɔɔ yɛlɛ yɛmaa Gyihova la kɔ zo yɛ kpole a.Mrɛlɛbulɛ 2:1-5.

Ɔwɔ kɛ ɛlɔlɛ mɔɔ ɛlɛ ɛmaa Gyihova la anu yɛ se na ɔkɔ zo ɔsɔ kɛ senle

11. Kɛ Gyisɛse ngilehilelɛ ne zile hanle ye ɛdoavolɛ ne mɔ ɛ?

11 Ɛnee Gyisɛse kpondɛ kɛ ye ɛdoavolɛ ne mɔ maa ɛlɔlɛ mɔɔ bɛlɛ bɛmaa Gyihova yɛɛ Ye nɔhalɛ Edwɛkɛ ne mɔɔ sonle bolɛ la kɔ zo tɛnla ɛkɛ na nuhua mia. Wɔ Gyisɛse ewudwazo ne anzi, ɔhilehilele Hibulu Ngɛlɛlera ne anu ngapezo edwɛkɛ bie mɔ mɔɔ rale nu wɔ ɔ nwo zo la anu ɔhilele ye ɛdoavolɛma nwiɔ. Kɛzi ɛhye hanle bɛ ɛ? Amozii bɛhanle kɛ: “Mekɛ mɔɔ ɔlɛtendɛ wɔ adenle ne anu na ɔlɛkilehile yɛ Nyamenle Edwɛkɛ ne anu la ɛnee ɔle kɛ asɛɛ bɛwuda senle yɛ ahonle nu la.”Luku 24:32.

12, 13. (a) Duzu a ɛha ɛlɔlɛ mɔɔ alesama dɔɔnwo mɔɔ wɔ ɛkɛ ne ɛnɛ la lɛ maa Nyamenle nee Baebolo ne a? (b) Kɛ ɛbayɛ na ɛlɔlɛ mɔɔ ɛlɛ la amminli ɛ?

12 Mekɛ mɔɔ ɛlumuale ɛzukoale mɔɔ Baebolo ne amgba kilehile la, asoo ɛnwunle kɛ ɛ nye zile liele na ɛnyianle Nyamenle anwo ɛlɔlɛ nee mɔdenlebɔlɛ la? Ɔda ali kɛ ɛyɛle zɔ. Kɛ menli dɔɔnwo noko ɛde nganeɛ la ɛne. Mɔɔ akee yɛ se la a le kɛ ɛbamaa zɔhane ɛlɔlɛ kpole ne adɛnla ɛkɛ na yeanyi. Yɛmkpondɛ kɛ yɛdi mɔɔ ɛlɛkɔ zo wɔ ɛnɛ ewiade ne anu la anzi. Gyisɛse hanle dole ɛkɛ ne kɛ: “Menli dɔɔnwo baminli bɛ ɛhulolɛ mɔɔ bɛlɛ ye” la. (Mateyu 24:12) Kɛ ɛbayɛ na ɛlɔlɛ mɔɔ ɛlɛ ɛmaa Gyihova nee Baebolo ne anu nɔhalɛ ne la amminli ɛ?

13 Kɔ zo sukoa Gyihova Nyamenle nee Gyisɛse Kelaese anwo debie. (Dwɔn 17:3) Dwenledwenle mɔɔ ɛsukoa ɛfi Nyamenle Edwɛkɛ ne anu la anwo kpalɛ, na biza ɛ nwo kɛ: ‘Duzu a ɛhye kile me wɔ Gyihova Nyamenle anwo a? Duzu debie bieko a menwu ye wɔ ɛhye anu mɔɔ ɔti ɔwɔ kɛ mefa me ahonle, me adwenle nee me ɛkɛla muala mesonle ye a?’ (Edwɛndolɛ 77:12) Ninyɛne ɛhye mɔ mɔɔ ɛbadwenledwenle nwolɛ la bamaa ɛlɔlɛ mɔɔ ɛlɛ ɛmaa Gyihova la anu ahɔ zo amia.

14. Kɛzi asɔneyɛlɛ boa maa ɛlɔlɛ mɔɔ yɛlɛ yɛmaa Gyihova la kɔ zo tɛnla ɛkɛ a?

 14 Adenle bieko mɔɔ ɛdua zo a ɛlɔlɛ mɔɔ ɛlɛ ɛmaa Gyihova la bayɛ kpole la a le kɛ ɛbayɛ asɔne dahuu. (1 Tɛsalonaekama 5:17) Wɔ buluku ɛhye Tile 17 ne yɛzukoale kɛ asɔneyɛlɛ le ahyɛlɛdeɛ mɔɔ sonle bolɛ mɔɔ vi Nyamenle ɛkɛ a. Kɛmɔ alesama abusuabɔlɛ gyi ngitanwolilɛ mɔɔ kɔ zo dahuu la azo la, zɔhane ala a abusuabɔlɛ mɔɔ yɛ nee Gyihova lɛ la anu mia wɔ mekɛ mɔɔ yɛbazɛlɛ ye wɔ asɔneyɛlɛ nu dahuu a. Mɔɔ hyia la a le kɛ yɛnrɛmaa yɛ asɔneyɛlɛ ɛnrɛyɛ debie mɔɔ yɛyɛ ala—mɔɔ yɛka edwɛkɛ ko ne ala dahuu, mɔɔ nganeɛdelɛ nee ndelebɛbo ɛnle nu a. Ɔwɔ kɛ yɛtendɛ yɛkile Gyihova kɛmɔ kakula badendɛ ahile ɔ ze mɔɔ ɔkulo ye edwɛkɛ la. Yɛkpondɛ kɛ yɛfa ɛbulɛ yɛtendɛ, noko yɛbava nɔhalɛlilɛ yɛaha edwɛkɛ biala mɔɔ wɔ yɛ ahonle nu la. (Edwɛndolɛ 62:8) Ɛhɛe, bɛ ti anwo Baebolo ɛzukoalɛ nee asɔneyɛlɛ mɔɔ vi ahonle nu la anwo hyia wɔ yɛ ɛzonlenlɛ nu, na bɛboa yɛ bɛmaa yɛkɔ zo yɛsie yɛ nwo wɔ Nyamenle ɛlɔlɛ nu.

NYIA ANYELIELƐ WƆ WƆ ƐZONLENLƐ NU

15, 16. Duzu ati a yɛbahola yɛabu Belemgbunlililɛ edwɛkɛhanlɛ ne kɛ ɔle adenle kɛnlɛma nee anwonyia a?

15 Yɛ ti anwo Baebolo ɛzukoalɛ nee asɔneyɛlɛ le yɛ ɛzonlenlɛ ne foa mɔɔ yɛyɛ ye fealera nu a. Noko, kɛkala, maa yɛzuzu yɛ ɛzonlenlɛ ne foa mɔɔ yɛyɛ ye bagua nu la anwo: yɛ diedi ne mɔɔ yɛka nwolɛ edwɛkɛ yɛahile awie mɔ la. Asoo ɛ nee awie mɔ ɛzuzu Baebolo nu nɔhalɛ edwɛkɛ bie mɔ anwo? Saa wɔyɛ zɔ a, ɛnee ɛhye le adenle kɛnlɛma mɔɔ wɔnyia ye ɛlɛsonle Gyihova a. (Luku 1:74) Saa yɛka Gyihova Nyamenle anwo nɔhalɛ edwɛkɛ mɔɔ yɛzukoa la yɛkile awie mɔ a, ɛnee yɛlɛyɛ gyima mɔɔ anwo hyia mɔɔ bɛva bɛmaa nɔhalɛ Keleseɛnema kɔsɔɔti mɔɔ yemɔ a le Nyamenle Belemgbunlililɛ ne anwo edwɛkpa ne nolobɔlɛ la.Mateyu 24:14; 28:19, 20.

16 Ɛzoanvolɛ Pɔɔlo bule ye ɛzonlenlɛ gyima ne kɛ debie mɔɔ sonle bolɛ na ɔvɛlɛle ye kɛ anwonyia. (2 Kɔlentema 4:7) Gyihova Nyamenle nee ye atiakunlukpɔkɛ ne mɔ anwo edwɛkɛ  mɔɔ ɛka wɔahile menli la a le gyima kpalɛ mɔɔ tɛla biala a. Ɔle gyima mɔɔ yɛyɛ yɛmaa yɛ Menle ne mɔɔ tɛla awie biala la, na yɛnyia nvasoɛ kpalɛ mɔɔ tɛla biala la yɛfi nu. Gyima ɛhye mɔɔ ɛbayɛ la bamaa wɔaboa menli mɔɔ lɛ ahonle kpalɛ la amaa bɛabikye yɛ anwuma Selɛ ne na bɛabɔ ɔ bo kɛ bɛdua  dahuu ngoane adenle ne anu! Gyima boni a ahunludwolɛ wɔ nu tɛla ɛhye a? Bieko, Gyihova nee ye Edwɛkɛ ne anwo daselɛlilɛ bamaa wɔ diedi ayɛ kpole na yeamaa ɛlɔlɛ mɔɔ ɛlɛ ɛmaa ye la anu amia. Na Gyihova anye sɔ wɔ mɔdenlebɔlɛ ne. (Hibuluma 6:10) Gyima ɛhye mɔɔ ɛbayɛ ye dahuu la baboa wɔ amaa wɔazie ɛ nwo wɔ Nyamenle ɛlɔlɛ nu.1 Kɔlentema 15:58.

17. Duzu ati a Keleseɛnema ɛzonlenlɛ gyima ne hyia ndɛndɛ ɛnɛ a?

17 Ɔhyia kɛ yɛkakye kɛ ɔwɔ kɛ yɛyɛ Belemgbunlililɛ edwɛkɛhanlɛ gyima ne ndɛndɛ. Baebolo ne ka kɛ: “Bɔ edwɛkpa ne nolo na si zolɛ.” (2 Temɔte 4:2) Duzu ati a ɛhye ɛyɛlɛ nwo hyia ndɛndɛ ɛnɛ a? Nyamenle Edwɛkɛ ne ka kile yɛ kɛ: “[Gyihova, NW] kenle kpole ne ɛbikye. Ɔnrɛhyɛ biala, yebikye kpalɛ.” (Zɛfanaya 1:14) Ɛhɛe, mekɛ mɔɔ Gyihova bava ewiade ɛtane ɛhye ahɔ awieleɛ la ɛlɛbikye ndɛndɛ. Menli hyia kɔkɔbɔlɛ! Ɔhyia kɛ bɛnwu ye kɛ ɛnɛ a le mekɛ mɔɔ ɔwɔ kɛ bɛkpa Gyihova kɛ bɛ Tumivolɛ a. “Ɔnrɛhyɛ fee” na awieleɛ ne ara.Habakɛke 2:3.

18. Duzu ati a ɔwɔ kɛ yɛ nee nɔhalɛ Keleseɛnema bɔ nu sonle Gyihova wɔ bagua nu a?

18 Gyihova kulo kɛ yɛ nee nɔhalɛ Keleseɛnema bɔ nu sonle wɔ bagua nu. Ɛhye ati a ye Edwɛkɛ ne ka kɛ: “Bɛmaa yɛdwenle yɛkpondɛ adenle mɔɔ yɛdua zolɛ a yɛkɛhulo yɛ nwo ngoko ngoko, na yɛkɛyɛ gyima kpalɛ la. Bɛmmamaa yɛgyakyi kɛ yɛkɛhɔ yɛ nyianu ne, kɛmɔ bie mɔ yɛ la. Bɛdabɛ bɛkola bɛnwu kɛ . . . Kenle ne ɛbikye, yemɔti bɛmaa yɛsosɔ yɛ nwo ngoko ngoko.” (Hibuluma 10:24, 25) Saa yɛ nee yɛ gɔnwo mɔ diedima bɔ nu yia wɔ Keleseɛnema ayia bo a, yɛnyia adenle kpole yɛsonle na yɛye yɛ Nyamenle ne mɔɔ yɛkulo ye la ayɛlɛ. Eza yɛwula yɛ nwo ngoko ngoko anwosesebɛ.

19. Duzu a ɔwɔ kɛ yɛyɛ na ɛlɔlɛ mɔɔ wɔ Keleseɛnema asafo ne anu la anu amia a?

19 Mekɛ mɔɔ yɛ nee Gyihova azonvolɛ mɔɔ ɛha la ɛlɛbɔ nu azonle la, yɛmaa ɛlɔlɛ nee agɔnwolɛvalɛ mɔɔ wɔ asafo ne anu la anu mia. Ɔhyia kɛ yɛmaa yɛ adwenle kɔ subane kpalɛ mɔɔ yɛ nuhua ko biala lɛ la azo kɛmɔ Gyihova yɛ ye la. Ɔnle kɛ yɛnea kɛ yɛ mediema diedima bayɛ mɔɔ nvonleɛ biala ɛnle bɛ nwo a.  Kakye kɛ asolo kɛzi yɛ nuhua ko biala nyi wɔ sunsum nu la yɛɛ yɛfo noko. (Kɔlɔsaema 3:13) Bɔ mɔdenle ɛ nee menli mɔɔ kulo Gyihova la ɛnyia agɔnwolɛvalɛ kpalɛ, na ɛbanwu ye kɛ ɛlɛnyi wɔ sunsum nu. Ɛhɛe, saa ɛ nee ɛ mediema mrenya nee mraalɛ diedima bɔ nu sonle Gyihova a, ɔbaboa wɔ yeamaa wɔazie ɛ nwo wɔ Nyamenle ɛlɔlɛ nu. Kɛzi Gyihova yila bɛdabɛ mɔɔ bɛsonle ye nɔhalɛ nu na ɔlua zo bɛsie bɛ nwo wɔ ye ɛlɔlɛ nu la ɛ?

KPONDƐ “NƆHALƐ NGOANE NE”

20, 21. “Nɔhalɛ ngoane ne” a le boni, na duzu ati a ɔle anyelazo kɛnlɛma a?

20 Gyihova fa ngoane yila ye nɔhalɛ azonvolɛ, noko ngoane boni ɔ? Kɛkala asoo ɛde ngoane nu amgba ɔ? Ɔluakɛ yɛdie ɛnwomenle, yɛdi aleɛ na yɛno nzule la ati, yɛ nuhua dɔɔnwo baha kɛ ɔda ali wienyi kɛ yɛde ngoane nu. Na amgba noko yɛde ngoane nu. Mekɛ mɔɔ yɛlɛdi fɛlɛko la yɛbahola yɛaha ye bɔbɔ kɛ, “Ngoane yɛ fɛ amgba!” Noko Baebolo ne kile kɛ, saa yɛka ye kpalɛ a, dasanli biala ɛnlɛ nɔhalɛ ngoane ɛnɛ.

Gyihova kpondɛ kɛ ɛnyia “nɔhalɛ ngoane ne.” Asoo ɛbanyia ye

21 Nyamenle Edwɛkɛ ne tu yɛ folɛ kɛ, ‘yɛzɔ nɔhalɛ ngoane ne anu kpundii.’ (1 Temɔte 6:19) Zɔhane edwɛkɛ ne kile kɛ “nɔhalɛ ngoane ne” le debie mɔɔ yɛ nye la kɛ yɛ sa baha ye kenlebie a. Ɛhɛe, saa yɛdi munli a, yɛbadɛnla aze kpalɛ kɛmɔ ɛnee Nyamenle kpondɛ kɛ yɛtɛnla aze wɔ mɔlebɛbo ne la. Mekɛ mɔɔ yɛde ngoane nu wɔ paladaese azɛlɛ zo na yɛlɛ kpɔkɛdelɛ kpalɛ, anzondwolɛ nee anyelielɛ la, akee yɛ sa baha “nɔhalɛ ngoane ne” mɔɔ yemɔ a le ngoane mɔɔ ɛnlɛ awieleɛ la. (1 Temɔte 6:12) Asoo ɛhye ɛnle anyelazo kɛnlɛma?

22. Kɛzi ɛbahola ‘wɔazɔ nɔhalɛ ngoane ne anu kpundii’ ɛ?

22 Kɛzi yɛbahola ‘yɛazɔ nɔhalɛ ngoane ne anu kpundii’ ɛ? Wɔ edwɛkɛ ko ne ala anu, Pɔɔlo dule Keleseɛnema folɛ kɛ “ɔwɔ kɛ bɛyɛ nyele” na “bɛyɛ nyɛleɛ kpalɛ.” (1 Temɔte 6:18) Ɛhye ati ɔda ali wienyi kɛ dɔɔnwo gyi kɛzi yɛbava nɔhalɛ ne mɔɔ yɛzukoa yɛvi Baebolo ne anu yɛali gyima la azo. Noko asoo ɛnee Pɔɔlo ɛlɛkile kɛ yɛbalua nyɛleɛ kpalɛ ɛyɛlɛ zo a yɛanyia “nɔhalɛ ngoane ne” a? Kyɛkyɛ, ɔluakɛ zɛhae anyelazo kɛnlɛma ne gyi  “ɛlolɛ” mɔɔ yɛbanyia yɛavi Nyamenle ɛkɛ ne la azo. (Wulomuma 5:15) Noko akee, Gyihova anye die kɛ ɔbayila menli mɔɔ sonle ye nɔhalɛ nu la. Ɔkpondɛ kɛ ɛnyia “nɔhalɛ ngoane ne.” Dahuu ngoane zɛhae mɔɔ yɛ anyelielɛ na anzondwolɛ wɔ nu la wɔ ɛkɛ ne maa menli mɔɔ kɔ zo sie bɛ nwo wɔ Nyamenle ɛlɔlɛ nu la.

23. Duzu ati a ɔhyia kɛ ɛsie ɛ nwo wɔ Nyamenle ɛlɔlɛ nu a?

23 Ɔwɔ kɛ yɛ nuhua ko biala biza ɔ nwo kɛ, ‘Asoo mɛlɛsonle Nyamenle wɔ adenle mɔɔ yehile ye wɔ Baebolo ne anu la azo ɔ?’ Saa yɛkola yɛbua ye alehyenlɛ ko biala kɛ ɛhɛe a, ɛnee yɛlua adenle kpalɛ ne azo. Yɛbahola yɛanyia anwodozo kɛ Gyihova le yɛ ɛvealeka. Ɔbabɔ menli mɔɔ di nɔhalɛ maa ye la anwo bane wɔ ewiade ɛtane ɛhye ngyegyelɛ mekɛ mɔɔ li awieleɛ la anu. Eza Gyihova balie yɛ ngoane ahɔ ewiade fofolɛ kɛnlɛma ne mɔɔ ɛbikye la anu. Nea kɛzi yɛ nye die kɛ zɔhane mekɛ ne kɛra a! Na nea kɛzi yɛ nye balie kɛ yɛzile kpɔkɛ kpalɛ wɔ awieleɛ mekɛ ɛhye anu a! Saa ɛsi kpɔkɛ zɛhae ɛnɛ a, ɛbanyia “nɔhalɛ ngoane ne” kɛmɔ ɛnee Gyihova Nyamenle kpondɛ kɛ asetɛnla yɛ dahuu la!