• Kɛzi yɛkola yɛnwu ye kɛ ewudwazo ne amgba bara nu ɛ?

  • Kɛzi Gyihova te nganeɛ wɔ mɔwuamra mɔɔ ɔdwazo bɛ la anwo ɛ?

  • Nwane mɔ a bɛbadwazo bɛ a?

1-3. Kpɔvolɛ boni a doa yɛ a, na duzu ati a mɔɔ Baebolo ne kilehile mɔɔ yɛbazuzu nwolɛ la bamaa yɛ ahonle adɔ yɛ azule nu a?

FA YE kɛ ɛlɛnriandi kpɔvolɛ anwo ɛzulolɛ bie. Ɔ nwo yɛ se na eza ɔ nwo yɛ ndɛ tɛla wɔ. Ɛze ye kɛ ɔ ti yɛ se ɔluakɛ wɔnwu kɛ yehu ɛ gɔnwo mɔ bie. Ɛbɔ mɔdenle biala kɛ ɛnriandi ye a ɛnee ɔlɛbikye wɔ. Ɔle kɛ asɛɛ ɛnlɛ anyelazo biala la. Arɛlevilɛ nu ala, dievolɛ bie finde ɛ nwo ɛkɛ. Ɔ nwo yɛ se kpalɛ tɛla wɔ kpɔvolɛ ne, na ɔbɔ wɔ ɛwɔkɛ kɛ ɔbaboa wɔ. Nea kɛzi ɛhye maa wɔ ahonle tɔ wɔ azule nu a!

2 Wɔ adenle bie azo, kpɔvolɛ zɛhae doa wɔ. Ɔdoa yɛ muala. Kɛmɔ yɛzukoale ye wɔ tile ne mɔɔ li ɛhye anyunlu anu la, Baebolo ne fɛlɛ ewule kpɔvolɛ. Yɛ nuhua ko biala ɛnrɛhola ɛnrɛhoati kpɔvolɛ ɛhye. Yɛ nuhua dɔɔnwo ɛnwu kɛ kpɔvolɛ ɛhye ɛhu yɛ alɔvolɛ. Noko Gyihova tumi bo ewule ɛdeɛ ne azo. Yemɔ a ɔle Dievolɛ ne mɔɔ lɛ ɛlɔlɛ mɔɔ yelumua yehile kɛ ɔkola ɔdi kpɔvolɛ ɛhye anwo zo konim a. Na yebɔ ɛwɔkɛ kɛ ɔbazɛkye kpɔvolɛ ɛhye mɔɔ le ewule la bɔkɔɔ. Baebolo ne kilehile kɛ: “Kpɔvolɛ mɔɔ li amozii mɔɔ bɛbazɛkye ye la a le ewule.” (1 Kɔlentema 15:26) Ɛhye le edwɛkɛ kpalɛ!

3 Maa yɛlumua yɛzuzu kɛzi yɛte nganeɛ wɔ mekɛ mɔɔ awie mɔɔ yɛze ye la kɛwu la anwo. Ɛhye anwo ɛzuzulɛ bahola aboa  yɛ amaa yɛade debie mɔɔ bamaa yɛ nye alie la abo. Gyihova ɛbɔ ɛwɔkɛ kɛ mɔwuamra badɛnla aze bieko. (Ayezaya 26:19) Bɛbadwazo bɛ bɛara ngoane nu bieko. Ɛhye a le ewudwazo anyelazo ne a.

MEKƐ MƆƆ DƆVOLƐ BIE KƐWU

4. (a) Duzu ati a Gyisɛse neazo ne kile yɛ kɛzi Gyihova te nganeɛ wɔ ewule nwo a? (b) Agɔnwolɛvalɛ titile boni a Gyisɛse nyianle a?

4 Asoo wɔ dɔvolɛ bie ɛwu? Nyane nee alɔbɔlɛlilɛ, yɛɛ nganeɛ mɔɔ ɛte kɛ ɛnlɛ moalɛ biala la anu kola yɛ se kpalɛ. Wɔ mekɛ zɛhae anu, ɔwɔ kɛ yɛnea Nyamenle Edwɛkɛ ne anu na yɛmaa ɔkyekye yɛ rɛle. (2 Kɔlentema 1:3, 4) Baebolo ne boa yɛ maa yɛte kɛzi Gyihova nee Gyisɛse te nganeɛ wɔ ewule nwo la abo. Gyisɛse mɔɔ lale ɔ Ze subane ali wɔ adenle mɔɔ di munli zo la, ɛnee ze kɛzi awie wu a ɔyɛ nyane la. (Dwɔn 14:9) Ɛnee Gyisɛse kɔ Gyɛlusalɛm a ɔta ɔkɔkpɔla Lazalɛse yɛɛ ɔ mediema mraalɛ, Mɛle nee Maata mɔɔ de Bɛtani mɔɔ bikye ɛkɛ ne la. Bɛrayɛle agɔnwolɛma kpalɛ. Baebolo ne ka kɛ ɛnee, “Gyisɛse kulo Maata yɛɛ ɔ diema raalɛ ne nee Lazalɛse edwɛkɛ kpole.” (Dwɔn 11:5) Noko, kɛmɔ yɛzukoale ye wɔ tile ne mɔɔ li ɛhye anyunlu anu la, Lazalɛse wule.

5, 6. (a) Duzu a Gyisɛse yɛle wɔ mekɛ mɔɔ ɔhɔdole Lazalɛse anwo amra nee ɔ gɔnwo mɔ mɔɔ ɛnee bɛlɛdi nyane la ɛ? (b) Duzu ati a alɔbɔlɛ mɔɔ hunle Gyisɛse la kyekye yɛ rɛle a?

5 Kɛzi Gyisɛse dele nganeɛ wɔ mekɛ mɔɔ ɔ gɔnwo ne wule la ɛ? Edwɛkɛ ne kile kɛ Gyisɛse nee Lazalɛse anwo amra yɛɛ ɔ gɔnwo mɔ bɔle nu lile alɔbɔlɛ. Mekɛ mɔɔ Gyisɛse nwunle bɛ la ɔlile nyane. Nɔhalɛ nu, “Nyane kpole hanle ye manle alɔbɔlɛ hunle ye.” Edwɛkɛ ne toa zo kɛ, “Gyisɛse zunle.” (Dwɔn 11:33, 35) Asoo alɔbɔlɛ mɔɔ Gyisɛse lile la kile kɛ ɛnee ɔnlɛ anyelazo ɔ? Ɔnle zɔ fee. Ɔboalekɛ ɛnee Gyisɛse ze kɛ nwanwane debie bie ɛlɛba arazi. (Dwɔn 11:3, 4) Noko akee, ɔdele nyane nee alɔbɔlɛ mɔɔ ewule fa ba la.

6 Wɔ adenle bie azo, alɔbɔlɛ mɔɔ hunle Gyisɛse la kyekye yɛ rɛle. Ɔkile yɛ kɛ Gyisɛse nee ɔ Ze, Gyihova kyi ewule. Noko  Gyihova Nyamenle kola di kpɔvolɛ zɔhane azo konim! Maa yɛnlea mɔɔ Nyamenle boale Gyisɛse manle ɔyɛle la.

“LAZALƐSE, DWAZO BƐLA!”

7, 8. Duzu ati a ɛnee Lazalɛse edwɛkɛ ne le kɛ asɛɛ anyelazo biala ɛnle nuhua wɔ menli nye zo ɛ, noko duzu a Gyisɛse yɛle a?

7 Ɛnee bɛzie Lazalɛse wɔ nla mɔɔ le bolɛ bɔne la anu, na Gyisɛse zele bɛ kɛ bɛye bolɛ ne mɔɔ bɛva bɛnyi ɔ nloa la. Maata amkponle zo ɔluakɛ ɛnee bɛzie Lazalɛse yeli kenle nna, na ɔkɛyɛ kɛ ye funli ne ɛbɔ ɔ bo ɛlɛkpɔlɔ. (Dwɔn 11:39) Wɔ sonla nye zo ɛnee anyelazo biala ɛnle ɛkɛ.

Lazalɛse ewudwazo ne vale anyelielɛ kpole rale.Dwɔn 11:38-44

8 Bɛyele bolɛ ne, na Gyisɛse vale ɛnelɛ kpole deanle nuhua kɛ: “Lazalɛse, dwazo bɛla!” Duzu a zile a? “Nrenya ne mɔɔ ɛwu la vindele rale.” (Dwɔn 11:43, 44) Asoo ɛbahola wɔanwu kɛzi menli ne anye liele la? Saa ɛnee Lazalɛse le bɛ diema o, bɛ busuanli o, bɛ gɔnwo anzɛɛ bɛ manivolɛ o, mɔɔ ɛnee bɛze la a le kɛ yewu. Noko, nea, bɛ kulovolɛ ne a akee gyi bɛ avinli bieko la. Ɔkɛyɛ kɛ ɛhye zinle bɛ nwo kpole kɛ bɛkɛlie bɛkɛli. Kpolerazulɛ biala ɛnle nwolɛ kɛ menli dɔɔnwo vale anyelielɛ yɛle Lazalɛse atuu. Ewule zo konimlilɛ boni a le ɛhye!

Yilaegya dwazole kunlavolɛ raalɛ bie ara nrenya.1 Arelemgbunli 17:17-24

9, 10. (a) Adenle boni azo a Gyisɛse luale hilele ɛleka mɔɔ tumi mɔɔ ɔvale ɔdwazole Lazalɛse la Vi la ɛ? (b) Saa yɛkenga ewudwazo nwo edwɛkɛ mɔɔ wɔ Baebolo ne anu la a, nvasoɛ mɔɔ yɛbanyia la bie a le boni?

9 Gyisɛse angile kɛ ɔdaye mumua ne ye tumi a ɔvale ɔyɛle nwanwane deɛ ɛhye a. Ɔmanle ɔlale ali wienyi wɔ asɔne mɔɔ ɔyɛle kolaa na yeadwazo Lazalɛse la anu kɛ, Gyihova a ewudwazo ne Vi ye a. (Dwɔn 11:41, 42) Ɛnee tɛ ɛhye a le mekɛ mɔɔ lumua mɔɔ Gyihova ɛva ye tumi ne ɛli gyima wɔ adenle ɛhye azo a. Lazalɛse ewudwazo ne le ewudwazo ngɔnla mɔɔ yɛ nwanwane mɔɔ bɛha nwolɛ edwɛkɛ wɔ Nyamenle Edwɛkɛ ne anu la anu ko ala. * Saa yɛkenga na yɛsukoa edwɛkɛ ɛhye mɔ a yɛ nye die. Bɛmaa yɛnwu ye kɛ Nyamenle ɛnnea menli nyunlu, ɔluakɛ ɔdwazole ngakula nee mgbanyinli, mrenya  nee mraalɛ, Yizilayɛma nee menli mɔɔ bɛnle Yizilayɛma la amuala. Nea kɛzi edwɛkɛ ɛhye mɔ yɛ anyelielɛ a! Kɛ neazo la, mekɛ mɔɔ Gyisɛse dwazole kakula raalɛ ekyi bie vile ewule nu la, ɔyɛle ye awovolɛ ne mɔ ‘nwanwane anzɛɛ anyelielɛ kpole.’ (Maake 5:42) Ɛhɛe, Gyihova manle bɛnyianle anyelielɛ mɔɔ bɛ rɛle ɛnrɛvi ye ɛlɛ a.

Ɛzoanvolɛ Pita dwazole Keleseɛnenli raalɛ Dɔkase.—Gyima ne 9:36-42

10 Nɔhalɛ nu, menli mɔɔ Gyisɛse dwazole bɛ la amuala wule bieko. Asoo ɛhye kile kɛ ɛnee nvasoɛ biala ɛnle zo kɛ ɔdwazole bɛ ɔ? Kyɛkyɛ. Baebolo nu edwɛkɛ ɛhye mɔ si nɔhalɛ edwɛkɛ bie mɔ mɔɔ anwo hyia la azo, na ɔmaa yɛnyia anyelazo.

SUKOA DEBIE FI EWUDWAZO EDWƐKƐ NE ANU

11. Adenle boni azo a Lazalɛse ewudwazo edwɛkɛ ne foa nɔhalɛ edwɛkɛ mɔɔ wɔ Nolobɔvo ne 9:5 la azo a?

11 Baebolo ne kilehile kɛ “mɔwuamra ɛnze ɛhwee.” Bɛnle ngoane nu yɛɛ bɛ afoa nu ɛdeɛ ɛnle debie biala mɔɔ wɔ aleɛabo la anu bieko. Lazalɛse edwɛkɛ ne foa ɛhye azo. Mekɛ mɔɔ bɛdwazole Lazalɛse bɛrale ngoane nu bieko la, asoo ɔhanle anwuma nehane edwɛkɛ ɔvale ɔlieliele menli nye ɔ? Anzɛɛ ɔhanle hellsenle nwo edwɛkɛ mɔɔ yɛ ɛzulolɛ ɔvale ɔdule menli ahonle? Kyɛkyɛ. Baebolo ne ɛnga kɛ Lazalɛse hanle edwɛkɛ zɛhae mɔ bie. Wɔ kenle nna ne mɔɔ ɔwule la anu, ɛnee ‘ɔnze ɛhwee.’ (Nolobɔvo ne 9:5) Ɛnee Lazalɛse ɛla wɔ ewule nu ala.Dwɔn 11:11.

12. Duzu ati a yɛkola yɛsi ye pi kɛ amgba bɛdwazole Lazalɛse bɛvile ewule nu a?

12 Lazalɛse edwɛkɛ ne eza maa yɛnwu ye kɛ ewudwazo ne le nɔhalɛ edwɛkɛ, na ɔnle nwɔra bie ala. Gyisɛse dwazole Lazalɛse wɔ alasevolɛ dɔɔnwo anyunlu. Ɛzonlenlɛ nu adekilevoma mɔɔ ɛnee kpɔ Gyisɛse la bɔbɔ angola anzu nwanwane deɛ ɛhye anwo kpolera. Emomu, bɛhanle kɛ: “Duzu bɔbɔ yɛɛ akee yɛyɛ a? Nea nwanwane gyima mɔɔ akee nrenya ne [Gyisɛse] ɛlɛyɛ la!” (Dwɔn 11:47) Menli dɔɔnwo hɔnleanle Lazalɛse mɔɔ ɛnee bɛdwazo ye la. Ɔlua ɛhye ati bɛ nuhua dɔɔnwo liele Gyisɛse lile. Lazalɛse edwɛkɛ ne manle bɛliele bɛlile kɛ Nyamenle a zoanle Gyisɛse a. Ɛnee ɛhye le daselɛ kpole, ɔti ɔmanle ɛzonlenlɛ  nu adekilevoma mɔɔ ati yɛ se la bɔle kpɔkɛ kɛ bɛku Gyisɛse nee Lazalɛse.Dwɔn 11:53; 12:9-11.

13. Duzu a maa yɛkola yɛdie yɛdi kɛ Gyihova amgba bahola adwazo bɛdabɛ mɔɔ bɛwu la ɛ?

13 Asoo ɔle mgbane kɛ yɛkɛlie yɛkɛdo nuhua kɛ ewudwazo ne le nɔhalɛ ɔ? Kyɛkyɛ, ɔluakɛ Gyisɛse hilehilele kɛ mekɛ bie ɛlɛba mɔɔ bɛbadwazo ‘bɛdabɛ mɔɔ bɛwɔ ngakyelɛ nla nu la amuala.’ (Dwɔn 5:28) Gyihova a le ngoane kɔsɔɔti Bɔvolɛ a. Asoo ɔyɛ se kɛ yɛkɛlie yɛkɛdo nuhua kɛ ɔbahola yeabɔ ngoane bieko ɔ? Nɔhalɛ nu, dɔɔnwo bagyinla menli mɔɔ wɔ Gyihova ngakyelɛ nu la azo. Asoo ɔbahola yeahakye yɛ alɔvolɛ mɔɔ bɛwu la? Nwɔlɔra mgbe mgbe dɔɔnwo a wɔ anwomanyunlu a, noko Nyamenle fa ko biala duma fɛlɛ ye! (Ayezaya 40:26) Yemɔti Gyihova kola kakye yɛ alɔvolɛ mɔɔ bɛwu la anwo edwɛkɛ biala, na yeziezie ɔ nwo kɛ ɔbava bɛ yeara ngoane nu bieko.

14, 15. Kɛmɔ edwɛkɛ ne mɔɔ Dwobu hanle la kile la, kɛzi Gyihova te nganeɛ wɔ mɔwuamra mɔɔ ɔfa bɛ yeara ngoane nu bieko la anwo ɛ?

14 Noko akee, kɛzi Gyihova te nganeɛ wɔ mɔwuamra mɔɔ ɔdwazo bɛ la anwo ɛ? Baebolo ne kilehile kɛ ɔlɛ ɛhulolɛ kɛ ɔkɛdwazo mɔwuamra. Dwobu mɔɔ ɛnee di nɔhalɛ la bizale kɛ: “Saa sonla wu a, ɔkɛdɛnla ngoane nu bieko ɔ?” Ɛnee Dwobu ɛlɛka ɛhendɛlɛ mɔɔ ɔbahendɛ wɔ nla ne anu kɔdwu kɛ Nyamenle kɛhakye ye la anwo edwɛkɛ. Ɔhanle ɔhilele Gyihova kɛ: “Ɛbavɛlɛ, na mebalie wɔ zo; ɛ nwo balɔ ɛdawɔ ɛ sa anloa gyima.”Dwobu 14:13-15.

15 Dwenle nwolɛ nea! Gyihova lɛ ɛhulolɛ kɛ ɔkɛva mɔwuamra ɔkɛra ngoane nu bieko. Asoo ɔnyɛ anyelielɛ kɛ yɛkɛnwu kɛ Gyihova lɛ zɛhae ɛhulolɛ ye ɔ? Na ewudwazo ne mɔɔ ɛlɛba la noko ɛ? Nwane mɔ a bɛbadwazo bɛ a, na nienwu a bɛbadwazo bɛ bɛahɔ a?

‘BƐDABƐ MƆƆ BƐWƆ NGAKYELƐ NLA NU LA AMUALA’

16. Tɛnlabelɛ boni anu a bɛbadwazo mɔwuamra bɛamaa bɛara a?

16 Baebolo nu ewudwazo nwo edwɛkɛ ne kilehile yɛ dɔɔnwo wɔ ewudwazo ne mɔɔ ɛlɛba la anwo. Menli mɔɔ bɛdwazole bɛ bɛrale ngoane nu wɔ azɛlɛ ɛhye azo la nee bɛ alɔvolɛ bɔle  nu dɛnlanle aze bieko. Zɔhane ala yɛɛ kenlebie ewudwazo ne bayɛ a, noko yemɔ bayɛ kpalɛ kpole adɛla dɛba ne. Kɛmɔ yɛnwunle ye wɔ Tile 3 ne la, Nyamenle kulo kɛ azɛlɛ ye azo amuala yɛ paladaese. Yemɔti bɛnrɛdwazo mɔwuamra bɛnrɛra ngoane nu wɔ ewiade mɔɔ konle, ɛtanelilɛ nee anwodolɛ ɛyi ye tɛkɛɛ la anu. Bɛbanyia adenle bɛadɛnla aze dahuu wɔ azɛlɛ ɛhye azo wɔ tɛnlabelɛ mɔɔ anzondwolɛ nee anyelielɛ wɔ nuhua la anu.

17. Menli dodo nyɛ a bɛbadwazo bɛ a?

17 Nwane mɔ a bɛbadwazo bɛ a? Gyisɛse hanle kɛ ‘bɛdabɛ mɔɔ bɛwɔ ngakyelɛ nla nu la amuala bade [Gyisɛse] ane na bɛvi bɛ nla ne mɔ anu bɛavinde.’ (Dwɔn 5:28, 29) Zɔhane ala yɛɛ Yekile 20:13 ne ka kɛ: “Nyevile kpule menli mɔɔ yeva bɛ la. Ewule nee Ɛbolɔ yele bɛ ɛdeɛ mɔɔ bɛvale bɛ bɛziele la vindele.” Bɛhile Giliki edwɛkɛ kpɔkɛ Hades abo kɛ “Ɛbolɔ” wɔ Nzema Baebolo ne anu noko ɔkile ɛleka mɔɔ alesama mɔɔ ɛwu la wɔ la. (Nea Mokanwo ne anu wɔ, mukelɛ 212-13.) Ɛbolɔ ɛhye badɔ mgbane. Bɛbadwazo menli mgbe mgbe mɔɔ ɛlɛdie bɛ menle wɔ ɛkɛ ne la bara ngoane nu bieko. Ɛzoanvolɛ Pɔɔlo hanle kɛ: “Ɛtanevolɛma nee kpalɛyɛlɛma badwazo ara ngoane nu.” (Gyima ne 24:15) Duzu a ɛhye kile a?

Bɛbadwazo mɔwuamra na bɛ nee bɛ alɔvolɛ abɔ nu adɛnla Paladaese

18. Nwane mɔ a boka “tenlenema” ne mɔɔ bɛbadwazo bɛ la anwo a, na kɛzi anyelazo ɛhye bahola aboa ɛdawɔ mumua ne ɛ?

18 Menli mɔɔ dɛnlanle aze kolaa na Gyisɛse ara azɛlɛ ye azo mɔɔ yɛkenga bɛ nwo edwɛkɛ wɔ Baebolo ne anu la anu dɔɔnwo boka “Kpalayɛlɛma anzɛɛ tenlenema” ne anwo. Nowa, Ebileham, Sɛla, Mosisi, Wulutu, Ɛseta yɛɛ menli dɔɔnwo mɔɔ ɛha la boka nwo. Bɛha mrenya nee mraalɛ ɛhye mɔ mɔɔ ɛnee lɛ diedi mɔɔ anu yɛ se la anwo edwɛkɛ dɔɔnwo wɔ Hibuluma tile 11 ne anu. Noko akee, Gyihova sonvolɛ biala mɔɔ kɛwu wɔ yɛ mekɛ ye anu la noko baboka “tenlenema” ne mɔ anwo. Ɔlua ewudwazo anyelazo ne ati yɛnzulo kɛ yɛkɛwu.Hibuluma 2:15.

19. Bɛdabɛ mɔɔ bɛle “ɛtanevolɛma” anzɛɛ bɛnle tenlene la a le nwane mɔ, na duzu a Gyihova bavi atiakunlukɛnlɛma nu amaa bɛayɛ a?

19 Na menli dɔɔnwo ne mɔɔ bɛanzonle Gyihova anzɛɛ bɛandie ye ɔluakɛ ɛnee bɛnze ɔ nwo edwɛkɛ biala la noko ɛ?  Bɛbahakye menli mgbe mgbe dɔɔnwo ɛhye mɔ mɔɔ bɛle “ɛtanevolɛma anzɛɛ bɛnle tenlene” la. Bɛbadwazo bɛdabɛ noko na bɛamaa bɛanyia mekɛ bɛazukoa nɔhalɛ Nyamenle ne anwo debie na bɛazonle ye. Bɛbadwazo mɔwuamra na bɛamaa bɛanyia adenle bɛaboka alesama mɔɔ di nɔhalɛ la anwo wɔ azɛlɛ ye azo na bɛazonle Gyihova wɔ ɛvolɛ apenle ko anu. Ɔbayɛ anyelielɛ mekɛ. Baebolo ne fɛlɛ mekɛ ɛhye Ndɛnebualɛ Kenle. *

20. Gehenna kile duzu, na nwane mɔɔ a kɔ ɛkɛ a?

20 Asoo ɛhye kile kɛ bɛbadwazo dasanli biala mɔɔ ɛdɛnla aze ɛlɛ la ɔ? Kyɛkyɛ. Baebolo ne ka kɛ menli mɔɔ ɛwu la bie mɔ wɔ Gehenna, mɔɔ bɛhile ɔ bo wɔ Nzema Baebolo ne anu wɔ ɛke kɛ “Senle ne mɔɔ ɛnnu ɛlɛ la.” (Luku 12:5) Ɔda ali kɛ bɛnyianle duma Gehenna bɛvile ɛleka bie mɔɔ ɛnee bɛgua ɛwula wɔ tete Gyɛlusalɛm kandiba la. Ɛnee bɛyela avunli nee ɛwula wɔ ɛkɛ ne. Ɛnee Dwuuma ne bu menli mɔɔ bɛfuandi bɛ avunli bɛgua ɛkɛ ne la kɛ bɛnfɛta kɛ bɛkɛzie bɛ yɛɛ eza bɛnfɛta ewudwazo. Yemɔti Gehenna le dahuu ɛzɛkyelɛ nwo sɛkɛlɛneɛ mɔɔ fɛta a. Ɔwɔ nuhua kɛ Gyisɛse babua anyewɔzoamra nee mɔwuamra ndɛne ɛdeɛ, noko Gyihova a le Ndɛnebuavolɛ kpole ne a. (Gyima ne 10:42) Ɔnrɛdwazo bɛdabɛ mɔɔ ɔbabua bɛ ndɛne kɛ bɛle ɛtanevolɛma na bɛngulo kɛ bɛkɛhakyi bɛ subane la.

ANWUMA EWUDWAZO NE

21, 22. (a) Ewudwazo boni bieko a wɔ ɛkɛ ne a? (b) Nwane a bɛlumua bɛdwazole ye kɛ sunsum nu abɔdeɛ a?

21 Baebolo ne eza ka ewudwazo bieko noko anwo edwɛkɛ; ɛhye le ewudwazo mɔɔ bamaa bɛadwazo menli bɛara ngoane nu kɛ sunsum nu abɔdeɛ wɔ anwuma. Ewudwazo ɛhye anwo neazo ko ala a wɔ Baebolo ne anu a, yemɔ a le Gyisɛse Kelaese ɛdeɛ ne.

22 Mekɛ mɔɔ bɛhunle Gyisɛse bɛwiele la, Gyihova ammaa Ɔ Ra ne mɔɔ di nɔhalɛ la anga ɛbolɔ. (Edwɛndolɛ 16:10; Gyima ne 13:34, 35) Nyamenle dwazole Gyisɛse, noko yeandwazo  ye kɛ dasanli la. Ɛzoanvolɛ Pita hanle Kelaese anwo edwɛkɛ kɛ, “Bɛhunle ye wɔ nwonane nu, noko bɛdwazole ye wɔ sunsum nu.” (1 Pita 3:18) Nɔhalɛ nu, ɛnee ɛhye le nwanwane debie kpole. Gyisɛse rale ngoane nu bieko kɛ sunsum nu abɔdeɛ mɔɔ lɛ tumi! (1 Kɔlentema 15:3-6) Gyisɛse a lumua nyianle anyunlunyia ewudwazo ɛhye a. (Dwɔn 3:13) Noko tɛ ye ɛdeɛ ne a li awieleɛ a.

23, 24. Nwane mɔ a wɔ Gyisɛse “mboane ekpunli ekyi” ne anu a, na bɛ dodo bayɛ nyɛ?

23 Kɛmɔ ɛnee Gyisɛse ze kɛ ɔnrɛhyɛ na yeazia yeahɔ anwuma la ati, ɔhanle ɔhilele ye ɛdoavolɛma ne kɛ ‘ɔkɔ yeahɔziezie’ ɛleka yeamaa bɛ wɔ ɛkɛ. (Dwɔn 14:2) Gyisɛse hanle bɛdabɛ mɔɔ bɛbahɔ anwuma la anwo edwɛkɛ kɛ “mboane ekpunli ekyi.” (Luku 12:32) Ɛnee ekpunli ekyi ɛhye mɔɔ Keleseɛnema mɔɔ di nɔhalɛ la a wɔ nu la dodo bayɛ nyɛ? Ɛzoanvolɛ Dwɔn hanle ye wɔ Yekile 14:1 kɛ: “Akee mekado me nye la ɛnee Boaneralɛ ne [Gyisɛse Kelaese] gyi Boka Zayɔn azo; ɔ nee menli apenle ngoko ɛya ko, abulanla nee nna (144,000) mɔɔ bɛhɛlɛ ɔdaye ye duma yɛɛ Selɛ ne duma wɔ bɛ nwoma azo la a gyi ɛkɛ a.”

24 Bɛbadwazo Keleseɛnema 144,000 ɛhye mɔ mɔɔ Gyisɛse ɛzoanvolɛma mɔɔ lile nɔhalɛ la boka nwolɛ la bara ngoane nu wɔ anwuma. Mekɛ boni a bɛbadwazo bɛ a? Ɛzoanvolɛ Pɔɔlo hɛlɛle kɛ ɛhye bara wɔ Kelaese ɛralɛ ne anu. (1 Kɔlentema 15:23) Kɛmɔ yɛbanwu ye wɔ Tile 9 ne anu la, zɔhane mekɛ ne anu a yɛde la. Yemɔti saa menli 144,000 ne anu ekyi mɔɔ ɛha la bie wu a, bɛdwazo ye ndɛndɛ ne ala bɛmaa ɔkɔ anwuma. (1 Kɔlentema 15:51-55) Noko akee, alesama anu dɔɔnwo lɛ anyelazo kɛ kenlebie bɛbadwazo bɛ bɛara azɛlɛ ye azo Paladaese ne anu.

25. Duzu a yɛbazukoa ye wɔ tile bieko mɔɔ doa zolɛ la anu a?

25 Ɛhɛe, amgba Gyihova bali yɛ kpɔvolɛ ewule azo konim, na ɔbavi ɛkɛ ne bɔkɔɔ! (Ayezaya 25:8) Noko akee, ɛbabiza kɛ, ‘Duzu a bɛdabɛ mɔɔ bɛbadwazo bɛ bɛahɔ anwuma la bayɛ ye wɔ ɛkɛ a?’ Bɛbaboka anwuma Belemgbunlililɛ mɔɔ bali tumi wɔ adenle nwanwane zo la anwo. Yɛbazukoa tumililɛ ɛhye anwo ninyɛne dɔɔnwo wɔ tile bieko mɔɔ doa zolɛ la anu.

^ ɛden. 9 Ɛbanwu ewudwazo ne anwo edwɛkɛ mɔɔ ɛha la wɔ 1 Arelemgbunli 17:17-24; 2 Arelemgbunli 4:32-37; 13:20, 21; Mateyu 28:5-7; Luku 7:11-17; 8:40-56; Gyima ne 9:36-42; yɛɛ Gyima ne 20:7-12.

^ ɛden. 19 Ɛbanwu Ndɛnebualɛ Kenle ne nee deɛ mɔɔ bɛbagyinla zo bɛabua ndɛne ne la anwo edwɛkɛ dɔɔnwo wɔ Mokanwo ne mukelɛ 213-15 ne anu.