Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 TILE NNU

Ɛkpɔnedeɛ Ne Le Nyamenle Ahyɛlɛdeɛ Mɔɔ Tɛla Biala

Ɛkpɔnedeɛ Ne Le Nyamenle Ahyɛlɛdeɛ Mɔɔ Tɛla Biala

1, 2. (a) Duzu a maa ahyɛlɛdeɛ bie sonle bolɛ maa wɔ a? (b) Duzu ati a ɛkpɔnedeɛ ne le Nyamenle ahyɛlɛdeɛ mɔɔ tɛla biala ɛ?

AWIE ɛhyɛ wɔ debie mɔɔ sonle bolɛ la ɛlɛ ɔ? Tɛ kɛzi ahyɛlɛdeɛ bie bolɛ yɛ se la a bahile kɛ ɔsonle bolɛ a. Saa ahyɛlɛdeɛ bie maa ɛ nye die anzɛɛ ɔdi wɔ ngyianlɛ nwo gyima a, ɛkile nwolɛ anyezɔlɛ.

2 Ahyɛlɛdeɛ mɔɔ Nyamenle ɛva ɛmaa yɛ la amuala, nuhua ko wɔ ɛkɛ mɔɔ yɛhyia nwolɛ kpole kpalɛ yɛtɛla debie biala a. Ɔle ahyɛlɛdeɛ mɔɔ tɛla biala mɔɔ Nyamenle ɛva ɛmaa alesama a. Yɛbazukoa ye wɔ tile ɛhye anu kɛ Gyihova zoanle ɔ Ra Gyisɛse Kelaese amaa yɛahola yɛanyia dahuu ngoane. (Kenga Mateyu 20:28.) Gyihova ɛla ye ali kɛ amgba ɔkulo yɛ ɔlua Gyisɛse mɔɔ ɔzoanle ye wɔ azɛlɛ ye azo kɛ ɛkpɔnedeɛ la ati.

DUZU A LE ƐKPƆNEDEƐ NE?

3. Duzu ati a menli wu a?

3 Ɛkpɔnedeɛ ne le ngyehyɛleɛ mɔɔ Gyihova ɛyɛ amaa yealua zo yealie alesama yeavi ɛtane nee ewule nu la. (Ɛfɛsɛsema 1:7) Amaa yɛade deɛmɔti yɛhyia ɛkpɔnedeɛ ne abo la, ɔwɔ kɛ yɛnwu mɔɔ zile wɔ Yidɛn tola ne anu wɔ ɛvolɛ apenle dɔɔnwo mɔɔ ɛze ɛhɔ anu la. Adam nee Yive, yɛ awovolɛ mɔɔ limoa la yɛle ɛtane. Kɛmɔ bɛyɛle ɛtane la ati, bɛwule. Yɛdayɛ noko yɛwu ɔluakɛ Adam nee Yive vale ɛtane wole yɛ.​—Nea Awieleɛ Edwɛkɛ 9.

4. Adam a le nwane, na duzu a ɛnee ɔlɛ a?

 4 Mɔɔ Gyihova bɔle Adam, nrenyia mɔɔ limoa la, ɔmaanle ye debie mɔɔ sonle bolɛ la. Ɔmaanle Adam ngoane mɔɔ di munli. Ɛnee ɔlɛ adwenle nee sonlabaka mɔɔ di munli. Anrɛɛ ɔ nwo ɛnrɛdo ye ɛlɛ, ɔnrɛyɛ ɛrelera yɛɛ ɔnrɛwu ɛlɛ. Kɛmɔ Gyihova a bɔle Adam la ati, ɛnee Nyamenle le ɔ ze. (Luku 3:38) Ɛnee Gyihova ta nee Adam tendɛ. Nyamenle hilehilele debie mɔɔ ɛnee ɔkpondɛ kɛ Adam yɛ la anu wienyi hilele ye na ɔmaanle ye gyima mɔɔ yɛ anyelielɛ la.​—Mɔlebɛbo 1:28-30; 2:16, 17.

5. Saa Baebolo ne ka kɛ bɛbɔle Adam kɛ Nyamenle “ɛsaso” a, ɔkile duzu?

5 Nyamenle bɔle Adam kɛ “ye ɛsaso.” (Mɔlebɛbo 1:27) Gyihova vale Ye subane ngakyile ne mɔ mɔɔ bie a le ɛlɔlɛ, nrɛlɛbɛ, pɛlepɛlelilɛ nee tumi la bɔle Adam. Ɔmaanle Adam adenle mɔɔ ɛnee ɔkola ɔkpa mɔɔ ɔkulo. Yeanyɛ ye kɛ robot. Nyamenle bɔle ye mɔɔ ɔbahola yeakpa kɛ ɔbayɛ mɔɔ tenrɛ anzɛɛ mɔɔ ɛndenrɛ. Saa Adam diele Nyamenle a, anrɛɛ ɔbadɛnla aze dahuu wɔ Paladaese.

6. Mɔɔ Adam andie Nyamenle la, duzu a vile ɔ sa a? Kɛzi ɛhye ɛha yɛ ɛ?

6 Mɔɔ Adam andie Nyamenle na bɛbuale ye ewule fɔlɛ la, ɔminlinle ninyɛne dɔɔnwo. Agɔnwolɛvalɛ titili ne mɔɔ ɛnee ɔ nee Gyihova lɛ, ye ngoane mɔɔ di munli nee ye Paladaese awuke ne vile ɔ sa. (Mɔlebɛbo 3:17-19) Adam nee Yive anye fuu andie Nyamenle, yemɔti bɛnlɛ anyelazo biala. Ɔlua mɔɔ Adam yɛle la ati, ‘ɛtane rale ewiade, na ɛtane ne vale ewule rale, yɛɛ ewule dele kpondenle aleɛabo amra anwo zo a, ɔluakɛ menli kɔsɔɔti ɛyɛ ɛtane.’ (Wulomuma 5:12) Mekɛ mɔɔ Adam yɛle ɛtane la, “ɔdɔnenle” ɔ nwo nee yɛdayɛ ɔmaanle yɛyɛle ngɛkɛlɛ yɛmaanle ɛtane nee ewule. (Wulomuma 7:14) Asoo yɛlɛ anyelazo ɔ? Ɛhɛe. Gyihova vale ɛkpɔnedeɛ ne maanle yɛ.

7, 8. Duzu a le ɛkpɔnedeɛ?

 7 Duzu a le ɛkpɔnedeɛ? Edwɛkɛkpɔkɛ ɛkpɔnedeɛ kile ninyɛne nwiɔ. Mɔɔ limoa, ɛkpɔnedeɛ a le ezukoa mɔɔ bɛtua bɛdie awie anzɛɛ bɛtua bɛsia bɛdie debie la. Mɔɔ tɔ zo nwiɔ, ɛkpɔnedeɛ a le ezukoa mɔɔ sa debie bolɛ tua la.

8 Dasanli biala ɛnrɛhola ɛnrɛdua ninyɛne mɔɔ Adam minlinle wɔ mekɛ mɔɔ ɔyɛle ɛtane na ɔvale ewule ɔrɛlɛle yɛ la anwo kakɛ. Noko Gyihova yɛle nziezielɛ mɔɔ ɔbamaa yɛanyia yɛ ti yɛavi ɛtane nee ewule nu la. Bɛmaa yɛnlea kɛzi ɛkpɔnedeɛ ne yɛ gyima nee kɛzi yɛbahola yɛanyia zolɛ nvasoɛ la.

KƐZI GYIHOVA VALE ƐKPƆNEDEƐ NE MAANLE LA

9. Ɛnee kɛ ɔkɛyɛ na bɛadua ɛkpɔnedeɛ ne ɛ?

9 Yɛ nuhua ko biala ɛnrɛhola ɛnrɛdua ngoane mɔɔ di munli mɔɔ vile Adam asa la anwo kakɛ ɛlɛ. Duzu ati ɔ? Ɔluakɛ yɛ muala yɛtɔ sinli. (Edwɛndolɛ 49:7, 8) Ɛnee ɔwɔ kɛ bɛnyia dasanli ngoane mɔɔ di munli la na bɛava bɛadua ɛkpɔnedeɛ ne. Ɛhye ati a Gyisɛse “vale ɔ nwo manle kɛ ɔkpɔne menli” la, ɔluakɛ ɛnee ɔlɛ ngoane mɔɔ di munli kɛ Adam ɛdeɛ ne mɔɔ ɔminlinle la.​—1 Temɔte 2:6.

10. Adenle boni azo a Gyihova luale vale ɛkpɔnedeɛ ne maanle ɛ?

10 Adenle boni azo a Gyihova luale vale ɛkpɔnedeɛ ne maanle ɛ? Gyihova zoanle ɔ Ra mɔɔ ɔkulo ye edwɛkɛ kpalɛ la wɔ azɛlɛ ye azo. Ralɛ ɛhye, Gyisɛse, a le ye abɔdeɛ mɔɔ limoa a. (1 Dwɔn 4:9, 10) Ɛnee Gyisɛse lɛ ɛhulolɛ kɛ ɔbagyakyi ɔ Ze nee ɛleka mɔɔ ɔde wɔ anwuma lɔ la yeara azɛlɛ ye azo. (Felepaema 2:7) Gyihova maanle bɛwole Gyisɛse kɛ dasanli mɔɔ di munli wɔ azɛlɛ ye azo, na ɛnee ɛtane biala ɛnle ɔ nwo.​—Luku 1:35.

Gyihova vale ɔ Ra ne mɔɔ ɔkulo ye kpalɛ la maanle yɛ kɛ ɛkpɔnedeɛ

11. Kɛzi sonla ko kola kpɔne menli kɔsɔɔti ɛ?

11 Adam maanle ngoane mɔɔ di munli mɔɔ anrɛɛ menli  kɔsɔɔti banyia la vile bɛ sa wɔ mekɛ mɔɔ ɔyɛle Gyihova anwo anzosesebɛ la. Asoo awie gyɛne bahola alie Adam amra kɔsɔɔti avi ewule nu ɔ? Ɛhɛe. (Kenga Wulomuma 5:19.) Gyisɛse mɔɔ anyɛ ɛtane ɛlɛ la vale ye ngoane mɔɔ di munli la kpɔnenle yɛ. (1 Kɔlentema 15:45) Bɛbahola bɛalua ye ngoane mɔɔ di munli la azo bɛalie Adam amra kɔsɔɔti bɛavi ewule nu.​—1 Kɔlentema 15:21, 22.

12. Duzu ati a ɛnee ɔwɔ kɛ Gyisɛse nwu amaneɛ kpole a?

12 Baebolo ne ka kɛzi Gyisɛse nwunle amaneɛ kolaa na yeawu la anwo edwɛkɛ. Bɛbilale ye empele atisesebɛ nu, bɛbɔle ye baka nu na bɛmaanle ɔwule alɔbɔlɛ ewule. (Dwɔn 19:1, 16-18, 30) Duzu ati a ɛnee ɔwɔ kɛ Gyisɛse nwu amaneɛ kpole zɛhae a? Ɔluakɛ Seetan hanle kɛ awie biala ɛnle ɛkɛ mɔɔ saa ɔyia sɔnea mɔɔ anu yɛ se a, ɔbahola yeali nɔhalɛ yeamaa Nyamenle a. Gyisɛse maanle ɔlale ali kɛ, saa sonla mɔɔ di munli la nwu amaneɛ kpole bɔbɔ a, ɔbahola yeali nɔhalɛ yeamaa Nyamenle. Nea kɛzi Gyihova anye balie mɔɔ Gyisɛse yɛle la anwo a!​—Mrɛlɛbulɛ 27:11; nee Awieleɛ Edwɛkɛ 15.

13. Kɛzi bɛduale ɛkpɔnedeɛ ne ɛ?

13 Kɛzi bɛduale ɛkpɔnedeɛ ne ɛ? Wɔ Dwuuma siane ne mɔɔ bɛfɛlɛ ye Naesan la kenle 14 ne azo, wɔ ɛvolɛ 33 anu, Gyihova maanle nwolɛ adenle maanle Gyisɛse agbɔvolɛ hunle ye. (Hibuluma 10:10) Ye kenle nsa ne azo, Gyihova dwazole Gyisɛse rale ngoane nu kɛ sunsum nu sonla. Anrɛɛ Gyisɛse bahola adɛnla azɛlɛ ye azo dahuu kɛ dasanli mɔɔ di munli la. Noko nzinlii mɔɔ ɔziale ɔhɔle ɔ Ze anwo lɔ wɔ anwuma la, ɔvale nwolɛ adenle ɛhye mɔɔ ɔnyianle kɛ ɔbadɛnla azɛlɛ ye azo dahuu la ɔmaanle Nyamenle amaa Nyamenle ahola ava akpɔne Adam abo zo  amra. (Hibuluma 9:24) Gyihova liele ɛkpɔnedeɛ ɛhye dole nu, yemɔti yɛbahola yɛanyia yɛ ti yɛavi ɛtane nee ewule nu.​—Kenga Wulomuma 3:23, 24.

KƐZI ƐBAHOLA WƆANYIA ƐKPƆNEDEƐ NE AZO NVASOƐ LA

14, 15. Duzu a yɛyɛ a bɛbava yɛ ɛtane bɛahyɛ yɛ a?

14 Yɛlɛnyia Nyamenle ahyɛlɛdeɛ ɛhye azo nvasoɛ. Bɛmaa yɛnlea kɛzi yɛnyia zolɛ nvasoɛ kɛkala nee kɛzi yɛbanyia zolɛ nvasoɛ kenle bie la.

15 Bɛva yɛ ɛtane bɛhyɛ yɛ. Ɔyɛ se kɛ yɛbahola yɛayɛ mɔɔ tenrɛ la mekɛ biala. Yɛfo, yɛɛ ɔdwu mekɛ ne bie a yɛka edwɛkɛ mɔɔ ɛnle kpalɛ anzɛɛ yɛyɛ ninyɛne mɔɔ ɛnle kpalɛ la. (Kɔlɔsaema 1:13, 14) Kɛ ɔkɛyɛ na bɛava yɛ ɛtane bɛahyɛ yɛ ɛ? Ɔwɔ kɛ yɛnu yɛ nwo nɔhalɛ nu na yɛbɛlɛ yɛ nwo aze yɛsɛlɛ ɛtane fakyɛ yɛfi Gyihova ɛkɛ. Akee yɛbanyia anwodozo kɛ bɛva yɛ ɛtane bɛhyɛ yɛ.​—1 Dwɔn 1:8, 9.

16. Duzu a ɔwɔ kɛ yɛyɛ na yɛanyia adwenle mɔɔ anu te la ɛ?

16 Yɛbahola yɛanyia adwenle mɔɔ anu te. Saa yɛ adwenle ka kile yɛ kɛ yɛyɛ ɛtane a, yɛ adwenle babua yɛ fɔlɛ na bie a yɛbade nganeɛ kɛ yɛnlɛ anyelazo yɛɛ yɛyɛ mgbane. Noko ɔnle kɛ yɛmaa yɛ sa nu to. Saa yɛsɛlɛ Gyihova kɛ ɔva yɛ ɛtane ɔhyɛ yɛ a, yɛbahola yɛanyia anwodozo kɛ ɔbadie yɛ na yeava yeahyɛ yɛ. (Hibuluma 9:13, 14) Gyihova kpondɛ kɛ yɛka yɛ ngyegyelɛ nee yɛ sinlidɔlɛ nwo edwɛkɛ yɛkile ye. (Hibuluma 4:14-16) Yemɔ bamaa anzodwolɛ ara yɛ nee Nyamenle avinli.

17. Duzu nyilalɛ a Gyisɛse ewule ne bamaa yɛanyia a?

17 Yɛlɛ anyelazo kɛ yɛbadɛnla aze dahuu. “Ɛtane ahatualɛ a le ewule, na Nyamenle ahyɛlɛdeɛ ne mɔɔ ɔfa ɔmaa mgbane la a le ngoane mɔɔ ɛnlɛ awieleɛ wɔ yɛ  Awulae Kelaese Gyisɛse ati.” (Wulomuma 6:23) Kɛmɔ Gyisɛse wule maanle yɛ la ati, yɛbahola yɛadɛnla aze dahuu na yɛanyia kpɔkɛdelɛ mɔɔ di munli. (Yekile 21:3, 4) Noko duzu a ɔwɔ kɛ yɛyɛ na yɛanyia nyilalɛ ɛhye mɔ bie a?

KILE ƐKPƆNEDEƐ NE ANWO ANYEZƆLƐ

18. Kɛzi yɛkola yɛnwu kɛ Gyihova kulo yɛ ɛ?

18 Saa awie kyɛ wɔ debie kɛnlɛma bie a, nea kɛzi ɛ nye die la. Ɛkpɔnedeɛ ne le ahyɛlɛdeɛ mɔɔ tɛla biala, na ɔwɔ kɛ yɛyɛ Gyihova mo kpalɛ wɔ nwolɛ. Dwɔn 3:16 ka kile yɛ kɛ “Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a.” Amgba Gyihova kulo yɛ kpole kpalɛ la ati a ɔvale ɔ Ra ne mɔɔ ɔkulo ye kpalɛ la ɔmaanle yɛ a. Yɛze kɛ Gyisɛse noko kulo yɛ ɔluakɛ ɛnee ɔlɛ ɛhulolɛ kɛ ɔbawu yeamaa yɛ. (Dwɔn 15:13) Ɔwɔ kɛ ɛkpɔnenlɛ ahyɛlɛdeɛ ne maa ɛnwu ye kɛ Gyihova nee Gyisɛse kulo wɔ amgba.​—Galeehyeama 2:20.

Mekɛ mɔɔ yɛlɛsukoa Gyihova anwo ninyɛne la, yɛbayɛ ɔ gɔnwo mɔ na ɔ nwo ɛlɔlɛ mɔɔ yɛlɛ la ayɛ kpole

19, 20. (a) Kɛ ɔkɛyɛ na wɔayɛ Gyihova agɔnwo ɛ? (b) Kɛ ɔkɛyɛ na wɔahile kɛ ɛdie Gyisɛse ɛkpɔnenlɛ afɔlebɔlɛ ne ɛdi ɛ?

19 Kɛkala mɔɔ wɔnwu kɛzi Nyamenle kulo yɛ kpole la, kɛ ɔkɛyɛ na wɔayɛ ɔ gɔnwo ɛ? Saa ɛnze awie a, ɔyɛ se kɛ ɛbahulo ye edwɛkɛ. Dwɔn 17:3 se yɛbahola yɛanwu Gyihova. Mekɛ mɔɔ ɛlɛyɛ ɛhye la, ɔ nwo ɛlɔlɛ mɔɔ ɛlɛ la bayɛ kpole, ɛbahulo kɛ ɛbayɛ mɔɔ sɔ ɔ nye la na wɔayɛ ɔ gɔnwo. Yemɔti kɔ zo dua Baebolo ne azo sukoa Gyihova anwo ninyɛne dɔɔnwo.​—1 Dwɔn 5:3.

20 Nyia Gyisɛse ɛkpɔnenlɛ afɔlebɔlɛ ne anu diedi. Baebolo ne ka kɛ “awie biala mɔɔ die Ralɛ ne di la lɛ ngoane mɔɔ ɛnlɛ awieleɛ.” (Dwɔn 3:36) Duzu a ɛhye kile a? Ɔkile kɛ awie bayɛ mɔɔ Gyisɛse ɛhilehile yɛ kɛ yɛyɛ la. (Dwɔn 13:15) Yɛnrɛhola yɛnrɛva yɛ nloa ala  yɛnrɛha kɛ yɛdie Gyisɛse yɛdi. Saa yɛdie ɛkpɔnedeɛ ne yɛdi a, ɔwɔ kɛ yɛyɛ nwolɛ gyima. Gyemise 2:26 ka kɛ: “Diedi mɔɔ gyimayɛlɛ ɛmboka nwolɛ la le wulera.”

21, 22. (a) Duzu ati a ɔwɔ kɛ yɛkɔ Kelaese ewule Ngakyelɛlilɛ ne abo ɛvolɛ biala ɛ? (b) Duzu a bɛbahilehile nu wɔ Tile 6 nee 7 anu a?

21 Kɔ Kelaese ewule Ngakyelɛlilɛ ne abo. Nɔe ne mɔɔ aleɛ kye a Gyisɛse bawu la, ɔhanle kɛ yɛhakye ye ewule ne. Yɛyɛ ɛhye ɛvolɛ biala, na bɛfɛlɛ ye Ngakyelɛlilɛ anzɛɛ ‘Awulae Nɔsolɛ Aleɛ ne.’ (1 Kɔlentema 11:20; Mateyu 26:26-28) Gyisɛse kpondɛ kɛ yɛkakye kɛ ɔvale ye ngoane ne mɔɔ di munli la ɔyɛle ɛkpɔnedeɛ ɔmaanle yɛ. Ɔhanle kɛ: “Anrɛɛ bɛyɛ ɛhye bɛva bɛhakye me.” (Kenga Luku 22:19.) Saa ɛkɔ Ngakyelɛlilɛ ne abo a, ɔkile kɛ ɛkakye ɛkpɔnedeɛ ne nee ɛlɔlɛ kpole mɔɔ Gyihova nee Gyisɛse lɛ maa yɛ la.​—Nea Awieleɛ Edwɛkɛ 16.

22 Ɛkpɔnedeɛ ne sonle bolɛ tɛla ahyɛlɛdeɛ biala mɔɔ yɛbanyia la. (2 Kɔlentema 9:14, 15) Menli mgbe dɔɔnwo mɔɔ bɛwu dɛbadɛba bɔbɔ la banyia zɔhane ahyɛlɛdeɛ ne mɔɔ sonle bolɛ la azo nvasoɛ. Tile 6 nee 7 ne bahilehile kɛzi ɛhye kola yɛ zɔ la anu.