Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 TILE BULU NEE KO

Duzu Ati A Amaneɛnwunlɛ Ɛbu A?

Duzu Ati A Amaneɛnwunlɛ Ɛbu A?

1, 2. Kpuya boni a menli dɔɔnwo biza a?

NYEVILE mɔɔ tu ba sua zo la zɛkyele namule bie. Nrenyia bie totole etu wɔ asɔne sua bie anu maanle menli dɔɔnwo bodale na bie mɔ wule. Kansa hunle ninli bie mɔɔ lɛ ngakula nnu la.

2 Saa esiane nee anwubɛnyunlu zɛhae mɔ bie si a, menli dɔɔnwo biza kɛ, “Duzu ati ɔ?” Menli dɔɔnwo noko biza kɛ, duzu ati a ɛkpɔlɛ nee amaneɛnwunlɛ ɛbu ewiade a? Wɔbiza kpuya ɛhye bie ɛlɛ ɔ?

3, 4. (a) Kpuya boni a Habakɛke bizale a? (b) Kɛzi Gyihova buale ye ɛ?

3 Menli mɔɔ lɛ Nyamenle anu diedi kpole la noko bizale kpuya ɛhye mɔ bie wɔ Baebolo ne anu. Kɛ neazo la, ngapezonli Habakɛke bizale Gyihova kɛ: “Duzu ati a ɛmaa me nye nwu nvonleɛ nee ngyegyelɛ ɛ? Ninyɛne ɛzɛkyelɛ ɛva yɛ aze, yɛɛ konle, mgbonde nee butule ɛlie ebia.”​—Habakɛke 1:3.

4 Nyamenle buale Habakɛke kpuya ne wɔ Habakɛke 2:2, 3 na ɔbɔle ye ɛwɔkɛ kɛ ɔbali ngyegyelɛ ne anwo gyima. Gyihova kulo menli kpalɛ. Baebolo ne se: “Ɔdwenle bɛ nwo.” (1 Pita 5:7) Nɔhalɛ nu, saa Nyamenle nwu kɛ menli ɛlɛnwu amaneɛ a, ɔyɛ ye nyane kpalɛ ɔtɛla yɛdayɛ mumua ne. (Ayezaya 55:8, 9) Yemɔti maa yɛzuzu kpuya ɛhye anwo, Duzu ati a amaneɛnwunlɛ ɛbu ewiade a?

 DUZU ATI A AMANEƐNWUNLƐ ƐBU A?

5. Duzu a ɛsɔfo ne mɔ ka ye wɔ amaneɛnwunlɛ nwo a? Duzu a Baebolo ne kilehile a?

5 Saa menli ɛlɛnwu amaneɛ a, ɛsɔfoma nee ɛzonlenlɛ nu kilehilevolɛma ta ka kɛ ɔle Nyamenle ngyehyɛleɛ. Bie mɔ ka kɛ debie biala mɔɔ bazi sonla nwo zo la, Nyamenle ɛhyehyɛ ɛdo ɛkɛ dɛbadɛba na yɛnrɛhola yɛnrɛde deɛmɔti ɔle zɔ la abo ɛlɛ. Bie mɔ noko ka kɛ, ngakula nee mgbanyinli wu amaa bɛahola bɛahɔ Nyamenle anwo lɔ wɔ anwuma. Noko ɛhye ɛnle nɔhalɛ. Tɛ Gyihova a maa ninyɛndane sisi a. Baebolo ne ka kɛ: “Ɔle bɛkyi kɛ Nyamenle kɛyɛ amumuyɛ, anzɛɛ Tumivolɛ ne kɛyɛ ɛtane.”​—Dwobu 34:10.

6. Duzu ati a menli dɔɔnwo fa amaneɛ mɔɔ yɛlɛnwu ye la anwo ɛzonle to Nyamenle anwo zo a?

6 Menli dɔɔnwo fa amaneɛ mɔɔ yɛlɛnwu la anwo ɛzonle to Nyamenle anwo zo ɔluakɛ bɛdwenle kɛ Nyamenle a nea ewiade ye azo a. Noko kɛ mɔɔ yɛzukoale ye wɔ Tile 3 ne anu la, Seetan Abɔnsam a nea ewiade ye azo a.

7, 8. Duzu ati a amaneɛnwunlɛ ɛbu ewiade a?

7 Baebolo ne ka kile yɛ kɛ “Abɔnsam di ɛtane ewiade ye azo belemgbunli.” (1 Dwɔn 5:19) Seetan mɔɔ di ewiade ɛhye azo belemgbunli la ati yɛ se kpalɛ. Ɔlɛbɛlɛbɛla “ewiade amra amuala.” (Yekile 12:9) Menli dɔɔnwo sukoa ye. Ɛhye boka nwolɛ bie a adalɛ, ɛkpɔlɛ nee atisesebɛ ɛyi ewiade la.

8 Ninyɛne dɔɔnwo mɔɔ ɔti amaneɛnwunlɛ ɛyi ewiade la noko wɔ ɛkɛ. Mɔɔ Adam nee Yive dele atua la, bɛvale ɛtane bɛwole bɛ mra. Ɔlua ɛtane ti, alesama maa bɛ gɔnwo mɔ nwu amaneɛ. Dahuu bɛkpondɛ kɛ  bɛkile kɛ bɛ nwo hyia tɛla awie mɔ. Bɛko yɛɛ bɛsisi awie mɔ. (Nolobɔvo ne 4:1; 8:9) Ɔdwu mekɛ ne bie a, menli nwu amaneɛ ɔlua ‘munzule mekɛ mɔɔ bɛ nye ɛnla’ mɔɔ to bɛ la ati. (Nolobɔvo ne 9:12) Saa bɛkɔ ɛleka bie wɔ mekɛ ɛtane nu a, esiane nee ngyegyelɛ gyɛne bahola ado bɛ.

9. Kɛzi yɛkola yɛka kɛ Gyihova lɛ adwenle kpalɛ bie mɔɔ ɔti yemaa amaneɛnwunlɛ tɛkɔ zo ɛ?

9 Tɛ Gyihova a maa yɛnwu amaneɛ a. Ɔnle kɛ yɛfa konle, ɛtanelilɛ nee awie mɔ mɔɔ bɛkile bɛ atete la anwo ɛzonle yɛto ɔ nwo zo. Tɛ Nyamenle a maa esiane le kɛ azɛlɛkpusulɛ, ahumuakyima nee azuyilɛ sisi a. Noko bie a ɛbabiza ɛ nwo kɛ, ‘Saa Gyihova a lɛ tumi kpole wɔ ewiade ye anu a, duzu ati a ɔnzi ninyɛndane nwo adenle ɛ?’ Yɛze kɛ Nyamenle dwenle yɛ nwo kpalɛ, yemɔti bie a ɔlɛ adwenle kpalɛ bie mɔɔ ɔti yemaa amaneɛnwunlɛ tɛkɔ zo a.​—1 Dwɔn 4:8.

DEƐMƆTI NYAMENLE MAA AMANEƐNWUNLƐ NWO ADENLE LA

10. Kɛzi Seetan dwazole tiale Gyihova ɛ?

10 Abɔnsam bɛlɛbɛlale Adam nee Yive wɔ Yidɛn tola ne anu. Ɔdole Nyamenle ɛzonle kɛ ɔnle Tumivolɛ kpalɛ. Ɔhanle kɛ Nyamenle ɛlɛfa debie kpalɛ avea Adam nee Yive. Ɛnee Seetan kpondɛ kɛ bɛdie bɛdi kɛ ɔbayɛ tumivolɛ kpalɛ yeadɛla Gyihova yɛɛ bɛngyia Nyamenle anwo wɔ bɛ ɛbɛla ɛbɔlɛ nu.​—Mɔlebɛbo 3:2-5; nea Awieleɛ Edwɛkɛ 27.

11. Kpuya boni a ɔwɔ kɛ yɛbua a?

11 Adam nee Yive andie Gyihova na bɛdwazole bɛtiale ye. Ɛnee bɛdwenle kɛ bɛkola bɛsi bɛ ti anwo kpɔkɛ wɔ mɔɔ le kpalɛ nee mɔ le ɛtane la anwo. Kɛ ɔkɛyɛ  na Gyihova ahile kɛ dwazotiama ne adwenle ɛndenrɛ na emomu ɔdaye a ɔze mɔɔ ɔle kpalɛ ɔmaa yɛ la ɛ?

12, 13. (a) Duzu ati a Gyihova anzɛkye atuadelɛma ne ɛkɛ ne ala ɛ? (b) Duzu ati a Gyihova ɛmaa Seetan adenle kɛ ɔli tumi wɔ ewiade ɛhye azo na alesama ɛnlea bɛ nwo ɛ?

12 Gyihova anzɛkye Adam nee Yive ɛkɛ ne ala. Emomu, ɔmaanle bɛwole mralɛ. Akee Gyihova maanle Adam nee Yive amra ne mɔ adenle kɛ bɛkpa awie mɔɔ bɛkulo kɛ ɔdi bɛ nwo zo tumi la. Ɛnee Gyihova bodane a le kɛ menli mɔɔ di munli la bayi azɛlɛ ne, na ɛhye bara nu ɔnva nwo mɔdenle biala mɔɔ Abɔnsam babɔ la.​—Mɔlebɛbo 1:28; Ayezaya 55:10, 11.

13 Seetan dole Gyihova ɛzonle wɔ anwumabɔvolɛ mgbe dɔɔnwo anyunlu. (Dwobu 38:7; Yekile 5:11) Yemɔti Gyihova maanle Seetan mekɛ kɛ ɔhile saa ye ɛzonledolɛ ne le nɔhalɛ a. Eza ɔmaanle menli mekɛ kɛ bɛhyehyɛ bɛdabɛ mumua ne bɛ arane bɛmaa Seetan ɛnlea bɛ nwo zo na bɛnlea saa ɔbawie bɛ boɛ mɔɔ bɛnrɛhyia Nyamenle moalɛ biala a.

14. Duzu a mekɛ mɔɔ Gyihova ɛmaa yegua nu la ɛmaa yela ali a?

14 Wɔ ɛvolɛ apenle dɔɔnwo anu, alesama ɛbɔ mɔdenle kɛ bɛnea bɛ nwo, noko ɔnyɛ boɛ. Yela ali kɛ Seetan le adalɛ. Alesama hyia Nyamenle moalɛ. Mɔɔ ngapezonli Gyɛlɛmaya hanle la le nɔhalɛ, ɔse: “O [Gyihova], meze kɛ sonla ɔdaye ɔnlɛ ɔ nwo; sonla ɔdaye ɔnlɛ ye ngoane zo tumi.”​—Gyɛlɛmaya 10:23.

DUZU ATI A GYIHOVA ƐMAA YEHYƐ A?

15, 16. (a) Duzu ati a Gyihova ɛmaa amaneɛnwunlɛ tɛkɔ zo a? (b) Duzu ati a Gyihova ɛtɛyɛle ninyɛne mɔɔ Seetan ɛzɛkye bɛ la boɛ ɛ?

15 Duzu ati a Gyihova ɛmaa amaneɛnwunlɛ tɛkɔ zo a? Duzu ati a ɔnzi ninyɛndane adenle a? Ɔliele  mekɛ na yeala ali kɛ Seetan tumililɛ ne ɛnle kpalɛ. Alesama ɛzɔ arane ngakyile ɛnlea, noko ninyɛne ɛnyɛ boɛ. Ɔwɔ nuhua kɛ bɛnyia anyuhɔlɛ wɔ abɔdeɛ nwo nrɛlɛbɛ nee ɛlɛtɔlɔneke ninyɛneyɛlɛ nu ɛdeɛ, noko nzisi, ehyia, ɛtanelilɛ nee konle ɛlie ebia ɛdɛla mekɛ biala. Saa Nyamenle amboa yɛ a, ɔnrɛwie yɛ boɛ ɛlɛ.

16 Noko Gyihova ɛtɛyɛle ninyɛne mɔɔ Seetan ɛzɛkye bɛ la boɛ. Saa ɔyɛ zɔ a, ɔbahile kɛ ɔdie Seetan tumililɛ ne ɔto nu, na ɔnrɛyɛ zɔhane ɛlɛ. Eza anrɛɛ alesama bɛalie ali kɛ bɛkola bɛnea bɛ nwo zo bɛmaa ɔwie bɛ boɛ. Noko ɛhye ɛnle nɔhalɛ, yɛɛ Gyihova ɛnvoa ɛhye azo. Ɔmbɔ adalɛ ɛlɛ.​—Hibuluma 6:18.

17, 18. Duzu a Gyihova bayɛ wɔ ninyɛne mɔɔ Seetan ɛzɛkye bɛ la anwo a?

17 Asoo Gyihova bahola ayɛ ninyɛne mɔɔ Seetan nee alesama atuadelɛ ne ɛva ɛra la boɛ? Ɛhɛe. Nyamenle kola yɛ debie biala. Gyihova ze mekɛ mɔɔ ɔbali Seetan ngyegyelɛ ne kɔsɔɔti anwo gyima a. Akee ɔbamaa azɛlɛ ne amuala ayɛ paladaese kɛ mɔɔ ɛnee ɔkulo kɛ ɔyɛ ala la. Menli mɔɔ “wɔ bɛ nla ne mɔ anu” la badwazo. (Dwɔn 5:28, 29) Menli nwo ɛnrɛdo bɛ yɛɛ bɛnrɛwu bieko. Gyisɛse bayɛ ninyɛne mɔɔ Seetan ɛzɛkye bɛ la amuala boɛ. Gyihova balua Gyisɛse anwo zo “azɛkye Abɔnsam gyima biala mɔɔ yeli la.” (1 Dwɔn 3:8) Yɛyɛ Gyihova mo kɛ yezi yɛ nwo abotane amaa yɛahola yɛanwu ye na yɛakpa ye kɛ yɛ Belemgbunli. (Kenga 2 Pita 3:9, 10.) Saa yɛlɛnwu amaneɛ bɔbɔ a, ɔboa yɛ ɔmaa yɛgyinla ɔ nloa.​—Dwɔn 4:23; kenga 1 Kɔlentema 10:13.

18 Gyihova ɛntinlitinli yɛ nwo zo kɛ yɛkpa ye kɛ yɛ Belemgbunli. Ɔmaanle alesama ahyɛlɛdeɛ mɔɔ bɛkola  bɛkpa mɔɔ bɛkulo a. Maa yɛnlea mɔɔ ahyɛlɛdeɛ ɛhye kile maa yɛ la.

KƐZI ƐBAVA AHYƐLƐDEƐ ƐHYE WƆALI GYIMA Ɛ?

19. Ahyɛlɛdeɛ kɛnlɛma boni a Gyihova ɛva ɛmaa yɛ a? Duzu ati a ɔwɔ kɛ yɛkile nwolɛ anyezɔlɛ a?

19 Gyihova ahyɛlɛdeɛ ɛhye mɔɔ maa yɛkola yɛkpa mɔɔ yɛkulo la maa yɛyɛ ngakyile yɛfi nane ne mɔ anwo. Nane ne mɔ gyinla bɛ nganeɛdelɛ zo a bɛyɛ bɛ ninyɛne a, noko yɛkola yɛkpa kɛzi yɛkpondɛ kɛ yɛbɔ yɛ ɛbɛla la na yɛsi kpɔkɛ kɛ yɛbayɛ mɔɔ sɔ Gyihova anye la anzɛɛ yɛnrɛyɛ. (Mrɛlɛbulɛ 30:24, NW) Eza yɛnle kɛ milahyinli mɔɔ ɔyɛ ninyɛne mɔɔ bɛhyehyɛle ye kɛ ɔyɛ la ala la. Yɛlɛ adenle yɛkpa yɛ gɔnwo mɔ nee mɔɔ yɛkpondɛ kɛ yɛyɛ wɔ yɛ ɛbɛlabɔlɛ nu la. Gyihova kpondɛ kɛ yɛ nye die ɛbɛlabɔlɛ nu.

20, 21. Kpɔkɛ kpalɛ boni a ɛbahola wɔazi ye ɛnɛ a?

20 Gyihova kpondɛ kɛ yɛkulo ye. (Mateyu 22:37, 38) Ɔle kɛ selɛ mɔɔ saa ɔ ra fi ye ahonle nu ka kile ye kɛ “Mekulo wɔ edwɛkɛ” a, ɔ nye die la. Gyihova ɛmaa yɛ adenle mɔɔ yɛkola yɛkpa kɛ yɛbazonle ye anzɛɛ yɛnrɛzonle ye. Seetan, Adam, nee Yive kpale kɛ bɛnrɛdie Gyihova. Kɛzi ɛbava ahyɛlɛdeɛ ne wɔali gyima ɛ?

21 Fa nwolɛ adenle ɛhye mɔɔ ɛlɛ ɛkpa mɔɔ ɛkulo la sonle Gyihova. Menli mgbe dɔɔnwo ɛzi kpɔkɛ kɛ bɛbayɛ mɔɔ Gyihova kulo la na bɛnrɛdie Seetan. (Mrɛlɛbulɛ 27:11) Duzu a ɛbahola wɔayɛ ɛnɛ amaa wɔahɔ Nyamenle ewiade fofolɛ ne mɔɔ ɔbaye amaneɛnwunlɛ kɔsɔɔti yeavi nu la anu bie a? Tile bieko babua kpuya ɛhye.