Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 TILE BULU NEE NGƆNLA

Beta Gyihova

Beta Gyihova

1, 2. Nienwu a yɛbanyia anwobanebɔlɛ ɛnɛ a?

FA YE kɛ ɛlua alie nwo na ahumu bie ɛlɛtu. Maanle nu munla, anwomanyunlu fedefede na ɛsɛlɛmanye ne bɔ ɔ bo kpakyekpakye. Akee ezule ne tɔ kpole. Ɛkpondɛ ɛleka mɔɔ ɛbavea la. Saa ɛnyia ɛleka kpalɛ mɔɔ ɛkɛ ne le resee la a, nea kɛzi ɛ nye balie a!

2 Yɛwɔ tɛnlabelɛ zɔhane ala bie anu ɛnɛ. Ɛzɛkyelɛ ala a ewiade ne ɛlɛsɛkye a. Bie a ɛbabiza ɛ nwo kɛ, ‘Nienwu a mebanyia anwobanebɔlɛ a?’ Edwɛndolɛnli ne hɛlɛle kɛ: ‘Mekola meka kɛ, “[Gyihova] ɛle me ɛvealeka nee me aranemgbole; ɛle me Nyamenle mɔɔ me rɛle wɔ wɔ nu a.”’ (Edwɛndolɛ 91:2) Nɔhalɛ nu, Gyihova bahola aboa yɛ kɛkala wɔ yɛ ngyegyelɛ nu, yɛɛ yemaa yɛ kenle bie anwo anyelazo kɛnlɛma.

3. Kɛ ɔkɛyɛ na yɛava Gyihova yɛayɛ yɛ ɛvealeka ɛ?

3 Kɛzi Gyihova bɔ yɛ nwo bane ɛ? Ɔbahola yeaboa yɛ yeamaa yɛagyinla ngyegyelɛ biala mɔɔ yɛlɛ la anloa, yɛɛ ɔlɛ tumi kpole ɔtɛla awie biala mɔɔ ɔkulo kɛ ɔgyegye yɛ la. Saa edwɛkɛ ɛtane to yɛ kɛkala bɔbɔ a, yɛbahola yɛanyia anwodozo kɛ Gyihova bali ngyegyelɛ ne anwo gyima kenle bie. Baebolo ne ka kɛ: “Bɛzie bɛ nwo wɔ Nyamenle ɛhulolɛ ne anu.” (Dwuudu 21) Ɔwɔ kɛ yɛbeta Gyihova na yeaboa yɛ wɔ mekɛ mɔɔ anu yɛ se la anu. Noko kɛ ɔkɛyɛ na yɛayɛ ɛhye ɛ?

YƐ NYAMENLE ƐLƆLƐ NE ANWO DEBIE

4, 5. Kɛzi Gyihova ɛla ye ɛlɔlɛ ne ali ɛhile yɛ ɛ?

4 Saa yɛbahola yɛabeta Gyihova a, ɔwɔ kɛ yɛnwu kɛzi  ɔkulo yɛ la. Dwenle mɔɔ Gyihova ɛyɛ ɛmaa yɛ la amuala anwo. Yemaa yɛ azɛlɛ kɛnlɛma mɔɔ mbaka nee nane ngɛnlɛma ɛyi zolɛ la. Eza yemaa yɛ aleɛ mɔɔ ɔyɛ fɛ nee nzule kpalɛ kɛ yɛnlo. Gyihova ɛlua Baebolo ne azo ɛmaa yɛnwu ye duma nee ye subane ngɛnlɛma ne mɔ. Mɔɔ tɛla ɔ muala la, ɔlale ye ɛlɔlɛ ne ali ɔhilele yɛ wɔ mekɛ mɔɔ ɔzoanle Gyisɛse, ɔ Ra mɔɔ ɔkulo ye kpalɛ la kɛ ɔrawu ɔmaa yɛ la. (Dwɔn 3:16) Na ɔlua zɔhane afɔlebɔlɛ ne ati, yɛlɛ kenle bie anwo anyelazo kɛnlɛma.

5 Gyihova ɛva Mɛzaya Belemgbunlililɛ ne, anwuma arane bie mɔɔ ɔnrɛhyɛ ɔbamaa amaneɛnwunlɛ bo apɛ la ɛzie ɛkɛ. Belemgbunlililɛ ne bamaa azɛlɛ ne ayɛ paladaese, ɛleka mɔɔ awie biala badɛnla anzodwolɛ nu na ɔ nye alie dahuu la. (Edwɛndolɛ 37:29) Adenle bieko mɔɔ Gyihova ɛlua zo ɛhile kɛ ɔkulo yɛ la a le kɛzi yehile yɛ adenle mɔɔ ɔwɔ kɛ yɛdua zo yɛbɔ yɛ ɛbɛla kɛkala la. Eza ɔse yɛyɛ asɔne na yeziezie ɔ nwo kɛ ɔbadie yɛ asɔneyɛlɛ dahuu. Gyihova ɛla ɛlɔlɛ ali ɛhile awie biala.

6. Duzu a ɔwɔ kɛ ɛyɛ wɔ Gyihova ɛlɔlɛ ne anwo a?

6 Duzu a ɔwɔ kɛ ɛyɛ wɔ Nyamenle ɛlɔlɛ ne anwo a? Maa ɔnwu kɛ ɛ nye sɔ mɔɔ yeyɛ yemaa wɔ la kɔsɔɔti. Mɔɔ yɛ alɔbɔlɛ la a le kɛ ɛnɛ, menli dɔɔnwo le boniayɛ. Gyisɛse wɔ azɛlɛ ye azo la, ɛnee kɛ menli de la ala ɛne. Kenle ko bie, Gyisɛse yɛle kokobɛvolɛma bulu ayile, noko bɛ nuhua kokye a yɛle ye mo a. (Luku 17:12-17) Yɛkpondɛ kɛ yɛyɛ kɛ nrenyia ne mɔɔ yɛle Gyisɛse mo la. Yɛkpondɛ kɛ yɛyɛ Gyihova mo dahuu.

7. Kɛzi ɔwɔ kɛ yɛkulo Gyihova ɛ?

7 Eza ɔwɔ kɛ yɛkulo Gyihova. Gyisɛse hanle hilele ye ɛdoavolɛ ne mɔ kɛ ɔwɔ kɛ bɛfa bɛ ahonle muala, bɛ ɛkɛla  muala nee bɛ adwenle muala bɛkulo Gyihova. (Kenga Mateyu 22:37.) Duzu a ɛhye kile a?

8, 9. Kɛ ɔkɛyɛ na yɛamaa Gyihova anwu kɛ yɛkulo ye ɛ?

8 Saa yɛka kɛ yɛkulo Gyihova ala a, ɛnee yɛwie ɔ? Kyɛkyɛ. Saa yɛfa yɛ ahonle, yɛ ɛkɛla nee yɛ adwenle muala yɛkulo Gyihova a, yɛbala ye ali wɔ yɛ nyɛleɛ nu. (Mateyu 7:16-20) Baebolo ne kilehile ye wienyi kɛ, saa yɛkulo Nyamenle a, yɛbali ye mɛla ne mɔ azo. Asoo ɔyɛ se? Kyɛkyɛ, ɔluakɛ Gyihova “mɛla ne mɔ noko ɛnyɛ ɛnlomboɛ mɔɔ bu sonla kɔme a.”​—Kenga 1 Dwɔn 5:3.

9 Saa yɛtie Gyihova a, yɛ nye die na yɛ kunlu dwo yɛ nwo wɔ ɛbɛlabɔlɛ nu. (Ayezaya 48:17, 18) Noko duzu a baboa yɛ yeamaa yɛabeta Gyihova a? Maa yɛnlea.

KƆ ZO BIKYE GYIHOVA

10. Duzu ati a ɔwɔ kɛ ɛkɔ zo ɛsukoa Gyihova anwo debie ɛ?

10 Kɛ ɔyɛle mɔɔ ɛrayɛle Gyihova agɔnwo ɛ? Ɔlua wɔ Baebolo ɛzukoalɛ ne azo, wɔnwu Gyihova kpalɛ na ɛ nee ye ɛnyia agɔnwolɛvalɛ mɔɔ anu mia. Agɔnwolɛvalɛ ɛhye le kɛ senle mɔɔ ɛngulo kɛ ɔnu la. Kɛ mɔɔ ɛngulo kɛ senle nu a ɛfa ɛyɛne ɛwula nu la, zɔhane ala a ɔwɔ kɛ ɛkɔ zo ɛsukoa Gyihova anwo ninyɛne na ɛ nee ye agɔnwolɛvalɛ ne anu amia a.​—Mrɛlɛbulɛ 2:1-5.

Gyihova anwo ɛlɔlɛ mɔɔ ɛlɛ la le kɛ senle la, ɔwɔ kɛ ɛfa ɛyɛne ɛwula nu na yeannu

11. Kɛzi Baebolo ne mɔɔ ɛlɛsukoa la baha wɔ ɛ?

11 Mekɛ mɔɔ ɛlɛkɔ zo wɔazukoa Baebolo ne la, ɛbanwu ninyɛne dɔɔnwo mɔɔ ɔbaha wɔ ahonle kpalɛ la. Yɛ kɛzi Gyisɛse ɛdoavolɛma nwiɔ dele nganeɛ wɔ mekɛ mɔɔ ɛnee Gyisɛse ɛlɛkilehile Baebolo ngapezo nu ahile bɛ la nzonlɛ. Bɛhanle kɛ: “Mekɛ mɔɔ ɔlɛtendɛ wɔ adenle ne anu na ɔlɛkilehile yɛ Nyamenle Edwɛkɛ ne anu la ɛnee ɔle kɛ asɛɛ bɛwuda senle yɛ ahonle nu la.”​—Luku 24:32.

12, 13. (a) Saa yɛannea ɛlɔlɛ mɔɔ yɛlɛ yɛmaa Nyamenle la boɛ a, duzu a bahola azi a? (b) Kɛ ɔkɛyɛ na yɛamaa Gyihova anwo ɛlɔlɛ mɔɔ yɛlɛ la anu ayɛ se ɛ?

 12 Kɛ mɔɔ Ngɛlɛlera ne mɔɔ ɛzoanvolɛ ne mɔ dele ɔ bo la hanle bɛ ahonle la, bie a ɛdawɔ noko ɛ nye liele kpole wɔ mekɛ mɔɔ ɛbɔle ɔ bo kɛ ɛte Baebolo ne abo kpalɛ la. Ɛhye boale wɔ ɔmaanle ɛnwunle Gyihova na ɛhulole ye. Ɛngulo kɛ ɛlɔlɛ ɛhye ka aze.​—Mateyu 24:12.

13 Saa ɛbayɛ Nyamenle agɔnwo a, ɔwɔ kɛ ɛbɔ mɔdenle kɛ ɛbamaa agɔnwolɛvalɛ ne anu ayɛ se. Ɔwɔ kɛ ɛkɔ zo ɛsukoa ɔ nee Gyisɛse anwo debie, ɛdwenle mɔɔ ɛlɛsukoa la anwo na ɛnea kɛzi ɛbava wɔabɔ wɔ ɛbɛla la. (Dwɔn 17:3) Saa ɛkenga Baebolo ne foa bie a, biza ɛ nwo kɛ: ‘Duzu a ɛhye maa menwu ye wɔ Gyihova Nyamenle anwo a? Duzu ati a ɔwɔ kɛ mefa me ahonle nee me ɛkɛla muala mekulo ye a?’​—1 Temɔte 4:15.

14. Kɛzi asɔneyɛlɛ boa yɛ ɔmaa yɛ nee Gyihova agɔnwolɛvalɛ ne anu mia ɛ?

 14 Saa ɛlɛ ɛ gɔnwo kpalɛ bie a, ɛta ɛ nee ye tendɛ na ɛhye maa bɛ agɔnwolɛvalɛ ne anu mia. Zɔhane ala a saa yɛ nee Gyihova tendɛ dahuu wɔ asɔneyɛlɛ nu a, ɔmaa yɛkulo ye kpalɛ a. (Kenga 1 Tɛsalonaekama 5:17.) Asɔneyɛlɛ le ahyɛlɛdeɛ kɛnlɛma mɔɔ vi yɛ anwuma Selɛ ne ɛkɛ a. Ɔwɔ kɛ yɛfi yɛ ahonle nu yɛ nee ye tendɛ dahuu. (Edwɛndolɛ 62:8) Ɔnle kɛ yɛkye yɛ asɔneyɛlɛ ne yɛgua yɛ ti anu, emomu ɔwɔ kɛ ɔfi yɛ ahonle nu. Saa yɛkɔ zo yɛsukoa Baebolo ne na yɛfi yɛ ahonle nu yɛyɛ asɔne a, yɛ nee Gyihova agɔnwolɛvalɛ ne anu bamia.

KA GYIHOVA ANWO EDWƐKƐ KILE AWIE MƆ

15, 16. Kɛzi ɛbu edwɛkɛhanlɛ gyima ne ɛ?

15 Saa yɛkpondɛ kɛ yɛbeta Gyihova a, ɔwɔ kɛ eza yɛka yɛ diedi ne anwo edwɛkɛ yɛkile awie mɔ. Awie mɔ mɔɔ yɛka Gyihova anwo edwɛkɛ yɛahile bɛ la le nwolɛ adenle kpole. (Luku 1:74) Eza ɔle gyima mɔɔ Gyisɛse vale maanle nɔhalɛ Kilisienema kɔsɔɔti a. Ɔwɔ kɛ yɛ muala yɛka Nyamenle Belemgbunlililɛ ne anwo edwɛkpa ne. Wɔbɔ ɔ bo ɛlɛyɛ bie ɔ?​—Mateyu 24:14; 28:19, 20.

16 Ɛzoanvolɛ Pɔɔlo dele nganeɛ kɛ daselɛlilɛ gyima ne sonle bolɛ kpalɛ; ɔvɛlɛle ye “anwonyia.” (2 Kɔlentema 4:7) Gyihova nee ye bodane ne mɔɔ ɛka nwolɛ edwɛkɛ wɔahile awie mɔ la a le gyima mɔɔ nwolɛ hyia kpalɛ mɔɔ ɛbahola wɔayɛ a. Ɔle adenle mɔɔ ɛbalua zo wɔazonle Gyihova a, na ɔ nye die mɔɔ ɛyɛ ɛmaa ye la anwo. (Hibuluma 6:10) Eza edwɛkɛhanlɛ gyima ne bahola aboa wɔ nee menli mɔɔ bɛtie wɔ la ɔluakɛ, ɛboa awie mɔ na eza ɛboa ɛdawɔ mumua ne ɛ nwo amaa bɛ muala bɛabikye Gyihova na bɛanyia dahuu  ngoane. (Kenga 1 Kɔlentema 15:58.) Gyima gyɛne bie wɔ ɛkɛ mɔɔ ɔbahola yeamaa ɛ kunlu adwo ɛ nwo adɛla gyima ɛhye ɔ?

17. Duzu ati a edwɛkɛhanlɛ gyima ne hyia ndɛndɛ a?

17 Edwɛkɛhanlɛ gyima ne hyia ndɛndɛ. Ɔwɔ kɛ yɛbɔ “edwɛkɛ ne nolo” ndɛndɛ. (2 Temɔte 4:2) Ɔwɔ kɛ awie mɔ te Nyamenle Belemgbunlililɛ ne anwo edwɛkɛ. Baebolo ne ka kɛ: “[Gyihova] kenle kpole ne ɛbikye. Ɔnrɛhyɛ biala, yebikye kpalɛ.” Awieleɛ ne ‘ɛnrɛhyɛ fee.’ (Zɛfanaya 1:14; Habakɛke 2:3) Ɔnrɛhyɛ, Gyihova bazɛkye Seetan amumuyɛ ewiade ne. Kolaa na edwɛkɛ ɛhye azi la, ɔwɔ kɛ yɛbɔ menli kɔkɔ yɛmaa bɛsonle Gyihova.

18. Duzu ati a ɔwɔ kɛ yɛ nee nɔhalɛ Kilisienema bɔ nu sonle Gyihova ɛ?

18 Gyihova kpondɛ kɛ yɛ nee nɔhalɛ Kilisienema bɔ nu sonle ye. Baebolo ne se “Bɛmaa yɛdwenle yɛkpondɛ adenle mɔɔ yɛdua zolɛ a yɛkɛhulo yɛ nwo ngoko ngoko, na yɛkɛyɛ gyima kpalɛ la. Bɛmmamaa yɛgyakyi kɛ yɛkɛhɔ yɛ nyianu ne, kɛmɔ bie mɔ yɛ la. Bɛdabɛ bɛkola bɛnwu kɛ Awulae Kenle ne ɛbikye, yemɔti bɛmaa yɛsosɔ yɛ nwo ngoko ngoko.” (Hibuluma 10:24, 25) Ɔwɔ kɛ yɛbɔ mɔdenle biala yɛkɔ debiezukoalɛ ne amuala. Debiezukoalɛ ne mɔ maa yɛnyia nwolɛ adenle yɛmaa yɛ nwo anwosesebɛ ngoko.

19. Duzu a baboa yɛ yeamaa yɛahulo yɛ mediema Kilisienema ɛ?

19 Saa ɛkɔ debiezukoalɛ a, ɛbanyia agɔnwolɛma kpalɛ mɔɔ bɛbaboa wɔ bɛamaa wɔazonle Gyihova a. Ɛbayia mediema ngakyile mɔɔ bɛle kɛ ɛdawɔ mɔɔ bɛlɛbɔ mɔdenle kɛ bɛsonle Gyihova la. Bɛdabɛ noko bɛnli munli yɛɛ bɛfo. Saa bie mɔ yɛ wɔ ɛtane a, bɔ mɔdenle fa kyɛ bɛ. (Kenga Kɔlɔsaema 3:13.) Fa wɔ adwenle sie ɛ mediema  Kilisienema subane kpalɛ zo dahuu, na yemɔ bamaa wɔahulo bɛ na wɔabikye Gyihova kpalɛ.

NƆHALƐ NGOANE NE

20, 21. Duzu a le “nɔhalɛ ngoane ne”?

20 Gyihova kpondɛ kɛ ɔ gɔnwo mɔ amuala nyia asetɛnla kpalɛ. Baebolo ne kilehile yɛ kɛ asetɛnla mɔɔ yɛbanyia ye kenle bie la bayɛ ngakyile kolaa avi mɔɔ yɛwɔ nu kɛkala la anwo.

Gyihova kpondɛ kɛ ɛ sa ka “nɔhalɛ ngoane ne.” Ɛ sa baha ye ɔ?

21 Kenle bie, yɛbadɛnla ngoane nu dahuu, tɛ ɛvolɛ 70 anzɛɛ 80 ala. Yɛbanyia ngoane mɔɔ ɛnlɛ awieleɛ, kpɔkɛdelɛ kpalɛ, anzodwolɛ nee anyelielɛ wɔ paladaese. Yemɔ a Baebolo ne fɛlɛ ye “nɔhalɛ ngoane ne” la. Gyihova ɛbɔ ɛwɔkɛ kɛ ɔbava nɔhalɛ ngoane ɛhye yeamaa yɛ, noko ɔwɔ kɛ yɛbɔ mɔdenle kɛkala kɛ yɛ ‘sa baha’ ye.​—1 Temɔte 6:12, 19.

22. (a) Kɛ ɔkɛyɛ na ‘yɛ sa aha nɔhalɛ ngoane ne’ ɛ? (b) Duzu ati a yɛdayɛ yɛ mɔdenlebɔlɛ ɛnrɛmaa yɛnrɛhola yɛnrɛnyia dahuu ngoane ɛ?

22 Kɛ ɔkɛyɛ na ‘yɛ sa aha nɔhalɛ ngoane ne’ ɛ? Ɔwɔ kɛ ‘yɛyɛ nyele’ na ‘yɛkɔ zo yɛyɛ nyɛleɛ kpalɛ.’ (1 Temɔte 6:18) Ɛhye kile kɛ ɔwɔ kɛ yɛfa mɔɔ yɛsukoa yɛfi Baebolo ne anu la yɛdi gyima. Noko tɛ yɛ mɔdenlebɔlɛ a bamaa yɛanyia nɔhalɛ ngoane ne a. Yɛnrɛhola yɛnrɛkpondɛ dahuu ngoane ɛlɛ. Gyihova a dua ye “ɛlolɛ zo” fa dahuu ngoane ne kyɛ ye nɔhalɛ azonvolɛ a. (Wulomuma 5:15) Yɛ anwuma Selɛ ne kulo kɛ ɔfa ɔkyɛ ye nɔhalɛ azonvolɛ ala.

23. Duzu ati a ɔwɔ kɛ ɛsi kpɔkɛ kpalɛ ɛnɛ a?

23 Biza ɛ nwo kɛ ‘Asoo melɛsonle Nyamenle wɔ adenle mɔɔ ɔdie ɔto nu la azo?’ Saa ɛnwu kɛ ɔwɔ kɛ ɛyɛ nzenzaleɛ bie a, ɔwɔ kɛ ɛyɛ ye ndɛndɛ. Saa yɛfa yɛ nwo yɛto Gyihova anwo zo na yɛbɔ mɔdenle yɛtie ye a, ɔbayɛ yɛ  ɛvealeka. Ɔbabɔ ye menli nwo bane wɔ Seetan ɛtane ewiade ɛhye mekɛ mɔɔ li awieleɛ la anu. Akee kɛ mɔɔ Gyihova bɔle ɛwɔkɛ la, ɔbamaa yɛadɛnla ngoane nu dahuu wɔ Paladaese. Saa ɛsi kpɔkɛ kpalɛ ɛnɛ a, ɛ sa bahola aha nɔhalɛ ngoane ne!