Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

Ɛkulo Kɛ Ɛnwu Nɔhalɛ Ne Ɔ?

Ɛkulo Kɛ Ɛnwu Nɔhalɛ Ne Ɔ?

DUZU anwo nɔhalɛ? Nɔhalɛ ne mɔɔ fane kpuyia bie mɔ mɔɔ hyia kpalɛ mɔɔ menli ɛbiza la anwo. Bie a wɔzuzu kpuyia mɔɔ le kɛ ɛhye mɔ la anwo:

  • Asoo Nyamenle dwenle yɛ nwo amgba?

  • Asoo konle nee amaneɛnwunlɛ bo bapɛ?

  • Saa yɛwu a yɛkɔ ni?

  • Asoo anyelazo bie wɔ ɛkɛ maa mɔwuamra?

  • Kɛzi ɔwɔ kɛ meyɛ asɔne na Nyamenle adie ɛ?

  • Kɛzi mebanyia anyelielɛ wɔ ɛbɛlabɔlɛ nu ɛ?

Nienwu a ɛbanyia kpuyia ɛhye mɔ anwo mualɛ wɔavi a? Saa ɛhɔle ɛleka mɔɔ bɛfa mbuluku bɛsie anzɛɛ bɛtɔne mbuluku la a, anrɛɛ ɛbahola wɔanwu mbuluku apenle apenle mɔɔ kile kɛ bɛlɛ nwolɛ mualɛ a. Noko akee fane dɔɔnwo ne ala, asolo mɔɔ buluku ko biala ka la. Bie mɔ wɔ ɛkɛ a ɔle kɛ mɔɔ bɛka ye kɛkala la le kpalɛ, noko ɔngyɛ ɛnee bɛkpa nwo na bɛhakyi ye anzɛɛ bɛyɛ ye fofolɛ.

Noko akee buluku ko wɔ ɛkɛ mɔɔ lɛ nwolɛ mualɛ kpalɛ a. Ɔle buluku mɔɔ nɔhalɛ edwɛkɛ a wɔ nu a. Gyisɛse Kelaese hanle ye wɔ asɔneyɛlɛ nu hilele Nyamenle kɛ: “Wɔ edwɛkɛ ne a le nɔhalɛ ne.” (Dwɔn 17:17) Ɛnɛ yɛze kɛ zɔhane “Edwɛkɛ” ne a le Baebolo Nwuanzanwuanza ne. Wɔ mukelɛ ne mɔɔ doɔdoa zo la anu, ɛbanwu kpuyia ɛhye mɔ anwo nɔhalɛ mualɛ wienyi mɔɔ Baebolo ne fa maa la wɔ mekɛ ekyi bie anu.

 Asoo Nyamenle Dwenle Yɛ Nwo Amgba?

DEƐMƆTI BƐBIZA KPUYIA ƐHYE:

Yɛwɔ ewiade mɔɔ amumuyɛ nee nzisi dɔɔnwo wɔ nu la anu. Ɛzonlenlɛ dɔɔnwo kilehile kɛ, amaneɛ mɔɔ yɛnwu ye la le Nyamenle ɛhulolɛdeɛ.

MƆƆ BAEBOLO NE KILEHILE LA:

Nyamenle ɛnyɛ amumuyɛ biala. Dwobu 34:10 ka kɛ: “Ɔle bɛkyi kɛ Nyamenle kɛyɛ amumuyɛ, anzɛɛ Tumivolɛ [Bedevinli] ne kɛyɛ ɛtane.” Nyamenle lɛ bodane mɔɔ ɛlɔlɛ wɔ nu la maa alesama. Ɛhye ati Gyisɛse hanle kɛ yɛyɛ asɔne a yɛyɛ ye zɛhae: “Yɛ Ze mɔɔ wɔ anwuma . . . Wɔ belemgbunlililɛ ɛrɛla. Bɛyɛ Wɔ ɛhulolɛdeɛ wɔ azɛlɛ ye azo, kɛmɔ bɛyɛ ye wɔ anwuma lɔ la.” (Mateyu 6:9, 10) Kɛmɔ Nyamenle dwenle yɛ nwo kpole la ati, yebɔ mɔdenle yemaa ye bodane ne ɛra nu nɔhalɛ bɔkɔɔ.—Dwɔn 3:16.

Eza nea Mɔlebɛbo 1:26-28; Gyemise 1:13; yɛɛ 1 Pita 5:6, 7.

Asoo Konle nee Amaneɛnwunlɛ Bo Bapɛ?

DEƐMƆTI BƐBIZA KPUYIA ƐHYE:

Konle ɛlɛkɔ zo ku menli dɔɔnwo. Amaneɛ mɔɔ menli ɛlɛnwu ye la ka yɛ muala.

MƆƆ BAEBOLO NE KILEHILE LA:

Nyamenle ɛha ɛdo ɛkɛ ne kɛ kenle bie ɔbamaa anzondwolɛ ara azɛlɛ ye azo amuala. Wɔ ye Belemgbunlililɛ ne mɔɔ le anwuma arane la anu, “menli [ɛnrɛzukoa] konle ɛhonlɛ bieko.” Emomu, “bɛbabolo bɛ konle dadeɛ ne mɔ bɛayɛ ɛyazonlɛ mbulalɛ.” (Ayezaya 2:4) Nyamenle bamaa nzisi nee amaneɛnwunlɛ kɔsɔɔti ara awieleɛ. Baebolo ne bɔ ɛwɔkɛ kɛ: “[Nyamenle bakyikyi] bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Alumua ninyɛne ne mɔ [mɔɔ nzisi nee amaneɛnwunlɛ mɔɔ ɛlɛkɔ zo ɛnɛ boka nwo la] ɛze ɛhɔ.”—Yekile 21:3, 4.

Eza nea Edwɛndolɛ 37:10, 11; 46:9; yɛɛ Maeka 4:1-4.

Saa Yɛwu A Yɛkɔ Ni?

DEƐMƆTI BƐBIZA KPUYIA ƐHYE:

Ewiade asɔne dɔɔnwo ne ala kilehile kɛ debie wɔ sonla nu mɔɔ kɔ zo tɛnla aze wɔ ye ewule nzi a. Bie mɔ die di kɛ mɔwuamra kola gyegye menli mɔɔ de aze la, anzɛɛ Nyamenle twe ɛtanevolɛma anzo na ɔmaa bɛnwu amaneɛ dahuu wɔ hell senle nu.

MƆƆ BAEBOLO NE KILEHILE LA:

Saa sonla wu a, ɔnle ɛkɛ ne bieko. Nolobɔvo ne 9:5 ka kɛ: “Mɔwuamra ɛnze ɛhwee.” Kɛmɔ mɔwuamra ɛnze ɛhwee, bɛnde nganeɛ, anzɛɛ bɛngola bɛnyɛ debie biala la ati, bɛngola bɛngyegye—anzɛɛ bɛmboa—menli mɔɔ de aze la.—Edwɛndolɛ 146:3, 4.

Eza nea Mɔlebɛbo 3:19 yɛɛ Nolobɔvo ne 9:6, 10.

 Asoo Anyelazo Bie wɔ Ɛkɛ Maa Mɔwuamra?

DEƐMƆTI BƐBIZA KPUYIA ƐHYE:

Yɛkpondɛ kɛ yɛtɛnla aze, na yɛ nee yɛ alɔvolɛ bɔ nuhua nyia anyelielɛ wɔ ngoane nu. Ɛhye ati yɛte nganeɛ kɛ ɔwɔ kɛ yɛnwu yɛ alɔvolɛ mɔɔ bɛwu la bieko.

MƆƆ BAEBOLO NE KILEHILE LA:

Bɛbadwazo menli dɔɔnwo mɔɔ bɛwu la. Gyisɛse bɔle ɛwɔkɛ kɛ: “mɔwuamra amuala . . . vi bɛ [ngakyelɛ] nla ne mɔ anu bɛbavinde.” (Dwɔn 5:28, 29) Menli mɔɔ bɛbadwazo bɛ la banyia adenle adɛnla Paladaese azɛlɛ ne azo bamaa ɔ nee Nyamenle mɔlebɛbo bodane ne ayɛ ko. (Luku 23:43) Ɛwɔkɛ ɛhye kile kɛ kenle bie alesama mɔɔ yɛ tieyɛ la banyia kpɔkɛdelɛ mɔɔ di munli yɛɛ dahuu ngoane. Baebolo ne ka kɛ: “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.”—Edwɛndolɛ 37:29.

Eza nea Dwobu 14:14, 15; Luku 7:11-17; yɛɛ Gyima ne 24:15.

Kɛzi Ɔwɔ Kɛ Meyɛ Asɔne na Nyamenle Adie Ɛ?

DEƐMƆTI BƐBIZA KPUYIA ƐHYE:

Menli mɔɔ wɔ ɛzonlenlɛ kɔsɔɔti anu la yɛ asɔne. Noko menli dɔɔnwo te nganeɛ kɛ bɛndie bɛ asɔneyɛlɛ.

MƆƆ BAEBOLO NE KILEHILE LA:

Gyisɛse hanle kɛ yɛgyakyi kɛ yɛkɛha edwɛkɛ mɔɔ yɛhye yɛgua yɛ ti anu la fane dɔɔnwo wɔ yɛ asɔneyɛlɛ nu. Ɔzele kɛ, “Wɔ bɛ nzɛlɛlɛ nu, bɛmmaka edwɛkɛ [ko ne ala] dɔɔnwo.” (Mateyu 6:7) Saa yɛkulo kɛ Nyamenle tie yɛ asɔneyɛlɛ a, ɔwɔ kɛ yɛyɛ asɔne wɔ adenle mɔɔ ɔdie ɔto nu la azo. Amaa yɛayɛ zɔ la, ɔwɔ kɛ yɛnwu mɔɔ Nyamenle ɛhulolɛdeɛ ne de la na yɛyɛ asɔne yɛmaa ɔ nee ye yɛ ko. Dwɔn kɛlata ne mɔɔ lumua la 5:14 ka kɛ: “Saa yɛdua ye ɛhulolɛ zo yɛbiza ye debie biala a ɔtie yɛ.”

Eza nea Edwɛndolɛ 65:2; Dwɔn 14:6, 14; yɛɛ 1 Dwɔn 3:22.

Kɛzi Mebanyia Anyelielɛ wɔ Ɛbɛlabɔlɛ nu Ɛ?

DEƐMƆTI BƐBIZA KPUYIA ƐHYE:

Menli dɔɔnwo die di kɛ ezukoa, duma, anzɛɛ anwofɛlɛko bamaa bɛ nye alie. Ɛhye ati bɛdi ninyɛne ɛhye mɔ anzi—na bɛkanwu ye la ɛnee zɔhane anyelielɛ ne ɛbɔ bɛ.

MƆƆ BAEBOLO NE KILEHILE LA:

Gyisɛse hilele debie mɔɔ fa anyelielɛ ba la wɔ mekɛ mɔɔ ɔhanle kɛ: ‘Nyilalɛ a le bɛdabɛ mɔɔ bɛze bɛ Sunsum nu ngyianlɛ la.’ (Mateyu 5:3) Yɛbanyia anyelielɛ kpalɛ a, ɔwɔ kɛ yɛnwu debie mɔɔ hyia yɛ kpalɛ, mɔɔ le Nyamenle nee ye bodane mɔɔ ɔlɛ ɔmaa yɛ la anwo nɔhalɛ ne. Zɔhane nɔhalɛ ne wɔ Baebolo ne anu. Saa yɛnwu zɔhane nɔhalɛ ne a, ɔbaboa yɛ yeamaa yɛanwu debie mɔɔ nwolɛ hyia kpalɛ nee debie mɔɔ nwolɛ ɛngyia la. Saa yɛdua Baebolo ne azo yɛsi kpɔkɛ na yɛfa yɛbɔ yɛ ɛbɛla a, ɔbamaa yɛ nye alie kpalɛ wɔ ɛbɛlabɔlɛ nu.—Luku 11:28.

Eza nea Mrɛlɛbulɛ 3:5, 6, 13-18 yɛɛ 1 Temɔte 6:9, 10.

 Mualɛ mɔɔ Baebolo ne fa maa wɔ kpuyia nsia anwo la a yɛnwu ye sikalɛ la. Ɛkpondɛ kɛ ɛnwu dɔɔnwo ɔ? Saa ɛboka bɛdabɛ mɔɔ ‘bɛze bɛ sunsum nu ngyianlɛ’ la anwo a, ɛbaha ye zɔ. Bie a wɔzuzu kpuyia gyɛne mɔɔ le kɛ ɛhye mɔ la anwo: ‘Saa Nyamenle dwenle yɛ nwo a, duzu ati a yemaa ɛtane nee amaneɛnwunlɛ dɔɔnwo nwo adenle mekɛ tendenle zɛhae a? Kɛzi me abusua ɛbɛlabɔlɛ banyia anyuhɔlɛ ɛ? Baebolo ne bua kpuyia ɛhye mɔ dɔɔnwo maa ɔyɛ ahunlundwolɛ.

Noko akee, ɛnɛ menli dɔɔnwo ɛngulo kɛ bɛsukoa Baebolo ne. Bɛbu ye kɛ ɔle buluku kpole mɔɔ ɔyɛ se kɛ bɛkɛde ɔ bo a. Ɛkulo kɛ bɛboa wɔ ɔ? Gyihova Alasevolɛ lɛ ninyɛne nwiɔ mɔɔ bɛbava bɛaboa wɔ la.

Mɔɔ lumua la, bɛyɛ Duzu A Baebolo Ne Kola Kilehile Yɛ A? buluku ne kɛ bɛfa bɛaboa menli mɔɔ ɛnlɛ alagye la bɛamaa bɛanleɛnlea kpuyia mɔɔ hyia mɔɔ Baebolo ne bua la. Mɔɔ tɔ zo nwiɔ a le sua nu Baebolo ɛzukoalɛ mɔɔ bɛndua ɛhwee la anwo ngyehyɛleɛ mɔɔ bɛyɛ la. Gyihova Dasevolɛ mɔɔ de bɛ ɛkɛ ne mɔɔ ze Baebolo ne anu kpalɛ la bara wɔ sua nu anzɛɛ ɛleka gyɛne biala mɔɔ ɛkulo la na yeava mekɛ ekyi ɔ nee wɔ azuzu Baebolo ne anwo dapɛne biala mɔɔ ɛndua ɛhwee a. Menli dɔɔnwo mɔɔ wɔ ewiade la ɛnyia ngyehyɛleɛ ɛhye anu nvasoɛ. Bɛ nuhua dɔɔnwo ɛha edwɛkɛ ɛhye mɔɔ yɛ anyelielɛ la kɛ: “Menwu nɔhalɛ ne!”

Debie biala ɛnle ɛkɛ mɔɔ tɛla ɛhye a. Baebolo ne anu nɔhalɛ ne maa yɛ nwo tɔ yɛ fi diedimgbane, anyezota nee ɛzulolɛ nwo. Ɔmaa yɛnyia anyelazo, bodane, nee anyelielɛ. Gyisɛse hanle kɛ: “Bɛbanwu nɔhalɛ ne, na nɔhalɛ ne bamaa bɛanyia bɛ ti.”—Dwɔn 8:32.