Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ TITILI | ƆHYIA KƐ YƐYƐ ASƆNE Ɔ?

Duzu Ati A Menli Yɛ Asɔne A?

Duzu Ati A Menli Yɛ Asɔne A?

“Ɛnee meto kyakya dahuu. Menyɛle asɔne kɛ mekɛnyia me nwo. Noko yeamba ye zɔ.”—Samuel, * Kenya.

“Yɛwɔ sukulu a, mɔɔ yɛyɛ la a le kɛ yɛbaha nzɛlɛlɛ ne mɔɔ bɛhile yɛ la.”—Teresa, Philippines.

“Meyɛ asɔne wɔ ngyegyelɛ mekɛ nu. Meyɛ ɛtanefakyɛ nee kɛzi mebayɛ Kilisienenli kpalɛ la anwo asɔne.”—Magdalene, Ghana.

Samuel, Teresa yɛɛ Magdalene edwɛkɛ ne mɔ maa yɛnwu kɛ ninyɛne bie mɔ ati a menli yɛ asɔne a, bie mɔ sonle bolɛ tɛla bie mɔ. Bie mɔ fi bɛ ahonle nu yɛ nzɛlɛlɛ; bie mɔ noko yɛ nzɛlɛlɛ ne ala. Noko akee, menli dɔɔnwo te nganeɛ kɛ ɔwɔ kɛ bɛyɛ asɔne, bɛfa bɛpɛ sɔnea bie wɔ sukulu, anzɛɛ bɛfa bɛsua nwɔhoalilɛ ekpunli bie anzi amaa bɛali konim, bɛfa bɛkpondɛ adehilelɛ bɛfi Nyamenle ɛkɛ bɛmaa bɛ abusua ne, anzɛɛ dɔɔnwo mɔɔ bokɛboka nwo la. Nɔhalɛ nu, neɛnleanu maa yɛnwu kɛ menli mɔɔ bɛngɔ asɔne la sɛlɛ dahuu.

Ɛyɛ asɔne ɔ? Saa ɔle zɔ a, duzu a ɛyɛ nwolɛ nzɛlɛlɛ a? Saa ɛyɛ asɔne anzɛɛ ɛnyɛ bɔbɔ a, bie a ɛbabiza kɛ: ‘Asoo nvasoɛ wɔ zo kɛ mebayɛ asɔne ɔ? Asoo awie ɛlɛtie me?’ Nrenyia ko hɛlɛle kɛ nzɛlɛlɛ le kɛ “ayileyɛlɛ bie la . . . ɔle kɛ ɛ nee wɔ ayɛmoa bie ɛlɛtendɛ ala la.” Dɔketama bie mɔ lɛ zɔhane adwenle ne bie, na bɛfɛlɛ nzɛlɛlɛ kɛ “ayileyɛlɛ gyɛne.” Asoo ɔwɔ kɛ bɛyɛ nzɛlɛlɛ la ati a menli yɛ ɔ? Anzɛɛ ɔboa ɔmaa bɛ nwo tɔ bɛ la ati ɔ?

Noko, Baebolo ne bu nzɛlɛlɛ kɛ ɔsonle bolɛ ɔtɛla ayileyɛlɛ biala. Ɔmaa yɛnwu kɛ awie ɛlɛtie asɔne mɔɔ yɛyɛ ye wɔ adenle kpalɛ zo na yɛfa yɛbiza debie kpalɛ la. Ɔle nɔhalɛ ɔ? Maa yɛnlea nwolɛ daselɛ.

^ ɛden. 3 Tɛ bɛ aluma kpalɛ ɔ.