Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐBƐLABƆLƐ NU EDWƐKƐ

Menyia Debie Mɔɔ Tɛla Dumalielɛ

Menyia Debie Mɔɔ Tɛla Dumalielɛ

Kenle ko nɔsolɛ nu wɔ 1984, ɛnee mele kakula bɛlɛra noko menliele duma. Bɛvale Miss Hong Kong abotile ne bɛzoale me. Bɛvale me nvoninli bɛrale magazine nee adwelie kɛlata nu. Ɛnee meto edwɛne, mesi agole, metendɛ menli nu, menea TV gyimalilɛ zo, mewula adɛladeɛ ngɛnlɛma na me nee menli titili mɔɔ le kɛ Hong Kong amɛnlado ne la kohɔ ɛleka.

Ye ɛvolɛ bieko yɛɛ membɔle ɔ bo kɛ meyɛ vidio, mɔɔ fane dɔɔnwo ne ala medame a ɔgyi me nwo zo a. Ɛnee adwelie kɛlɛvoma ɛlɛkpondɛ me nwo edwɛkɛ, menli mɔɔ kye nvoninli la ɛlɛkpondɛ me nvoninli yɛɛ menli ɛlɛkpondɛ me na bɛabuke bɛ sini, bɛ gyima, bɛ nee me ali ewiazo aleɛ nee ɛkponledolɛ. Awie biala kpondɛ kɛ ɔnwu me.

Melɛyɛ vidio mɔɔ konle konle wɔ nu

Noko, ngyikyingyikyi menwunle kɛ ɛhye mɔ amuala anyɛ kɛmɔ menzuzule la. Ɛnee meyɛ vidio mɔɔ konle konle nee esiane wɔ nu la. Menli mɔɔ yɛ vidio wɔ Hong Kong la ɛnlɛ awie mɔɔ fa moto wulu kale zo kɛmɔ bɛyɛ ye wɔ Hollywood (ɛleka mɔɔ bɛyɛ vidio mɔɔ wɔ U.S.A) la, yemɔti medame mumua ne a meyɛ me debie a. Ɛbɛlatane nee konle wɔ vidio dɔɔnwo mɔɔ menyɛle la anu. Bie mɔ fane sunsum evinli nyɛleɛ nwo.

Vidio mgbanyima ne mɔ anu ko gyale me wɔ 1995. Ɛnee ɔzɔho kɛ melɛ debie biala mɔɔ bamaa me nye alie la—anwofɛlɛko, anwonyia nee kunli kpalɛ ɛdeɛ, noko me rɛle bɔle na menlile nyane. Menzile kpɔkɛ kɛ megyakyi vidio ɛyɛlɛ.

MENGAKYELE ME NGAKULA NU DIEDI NE

Akee mengakyele diedi mɔɔ ɛnee melɛ wɔ mekɛ mɔɔ mele kakula la. Mekɛ zɔhane, ɛnee me diema raalɛ ne nee me kɔkpɔla Gyihova Alasevolɛ abusua bie wɔ Folɛ biala. Joe McGrath mɔɔ le selɛ la fa yɛ boka ɔ mra mraalɛ nsa ne anwo na yɛsukoa Baebolo ne. Ɛnee anyelielɛ nee ɛlɔlɛ wɔ bɛ abusua ne anu, yɛɛ “Ankele Joe” bu ɔ ye nee ɔ mra ne mɔ. Eza me nye die kɛ me nee bɛ kɔ Kilisienema ayia la. Ɔyɛ a yɛkɔ nyianu mgbole. Mekɛ zɔhane yɛ anyelielɛ. Ɛnee me nee Alasevolɛ ne mɔ lua a me nwo tɔ me.

Noko, debie mɔɔ ɛnle kpalɛ fee la kɔ zo wɔ me sua nu ɛkɛ. Me papa nyɛleɛ maa me mame di nyane, na ɔ rɛle bɔ bɔkɔɔ. Mɔɔ menyianle ɛvolɛ kɛyɛ bulu la, me mame nee Gyihova Alasevolɛ ne mɔ ambɔ bieko. Ɛnee mengɔ ye kpalɛ biala noko menyianle ɛvolɛ 17  la menliele ɛzɔnenlɛ. Yeangyɛ biala, membɔle ɛbɛla mɔɔ ɛnle kpalɛ la na menvile asafo ne anu bɔkɔɔ.

MENZILE KPƆKƐ KƐ MESIA MEARA

Bɛliele me atɔfolɛ la yeangyɛ yɛɛ Gyihova Alasevolɛ mgbanyima nwiɔ mɔɔ wɔ ɛkɛ ne asafo ne anu la rakpɔlale me a. Bɛhanle kɛzi mebahola meazia meara Gyihova Nyamenle anwo ɛkɛ la bɛhilele me, na bɛyɛle ngyehyɛleɛ kɛ edwɛkpatɛlɛvolɛ bie mɔɔ bɛfɛlɛ ye Cindy la ɛboa me. Mekɛ ɛhye, ɛnee me diedi ɛha aze, yemɔti membizale ye kɛ ɔhile me debie mɔɔ kile kɛ Baebolo ne le Nyamenle Edwɛkɛ la. Ɔhilele me Baebolo ngapezo dɔɔnwo mɔɔ ɛra nu la neazo bie mɔ. Ngyikyingyikyi, yɛyɛle agɔnwolɛma, na ɔzele me kɛ ɔ nee me sukoa Baebolo nu mɔlebɛbo ngilehilelɛ ne. Menliele mendole nu. Ɔle mekɛ mɔɔ limoa mɔɔ menwunle kɛ Gyihova le ɛlɔlɛ Nyamenle mɔɔ ɔkulo kɛ me nye die a.

Mekɛ mɔɔ membɔle Kilisiene ayia ɛhɔlɛ bo bieko la, menwunle kɛ me nee Alasevolɛ ne mɔ lua a me nye die kpalɛ tɛla menli mɔɔ me nee bɛ yɛ vidio ne la. Noko anwubielɛ mɔɔ menyianle ye me ngakula nu la maa mete nganeɛ kɛ menrɛhola menrɛlie awie biala menrɛli, na ɛnee me nye ɛnlie. Adiema raalɛ bie mɔɔ wɔ asafo ne anu la boale me wɔ mekɛ mɔɔ ɔgyinlanle Baebolo ne azo ɔhilele me kɛzi bɛgyinla nganeɛdelɛ ɛhye mɔ anloa la. Eza memkpondɛle agɔnwolɛma kpalɛ.

DEBIE MƆƆ TƐLA DUMALIELƐ

Me nee me hu hɔle Hollywood mɔɔ wɔ California, U.S.A wɔ 1997. Menvale me mekɛ ne dɔɔnwo memboale menli memaanle bɛnwunle nrɛlɛbɛ mɔɔ wɔ Nyamenle Edwɛkɛ ne anu la. Baebolo ne mɔɔ mefa mekilehile awie mɔ la ɛmaa menyia ahunlundwolɛ mɔɔ tɛla anwofɛlɛko nee vidio mɔɔ ɛnee meyɛ la. Kɛ neazo la, menyiale Cheri, me gɔnwo bie mɔɔ wɔ Hong Kong la wɔ 2002. Ye ɛbɛlabɔlɛ nu edwɛkɛ le kɛ me ɛdeɛ ne la. Bɛyɛle ye Miss Hong Kong la ye ɛvolɛ bieko yɛɛ bɛyɛle medame noko a. Mekɛ mɔɔ menyianle abotile ne la, ɔdaye a ɔvale ɔzoale me a. Eza ɛnee ɔyɛ vidio na nzinlii ɔrabokale vidio mgbanyima ne mɔ anwo mɔɔ ɔ nee adekilevolɛma mɔɔ ɛlie duma la a yɛ gyima a. Ɔdaye noko ɔhɔle Hollywood.

Mekɛ mɔɔ mendele kɛ kpavolɛ ne mɔɔ Cheri nee ye de la ɛnyia ahonle ewule na yewu la menlile ɔ nwo nyane kpalɛ. Yeannyia arɛlekyekyelɛ biala yeanvi ye Buda asɔne ne anu. Ɔle kɛ medame la, ɔnyianle asetɛnla kɛnlɛma mɔɔ awie mɔ anye bolo ye la, noko ɛnee ɔdi nyane na ɔnlie awie biala ɔnli. Menganle mɔɔ mezukoa ye wɔ Baebolo ne anu la mengilele ye, noko kɛmɔ ɔle Budanli la ati, ɛnee ɔyɛ se kɛ ɔbalie yeali.

Me gɔnwo Cheri ɛlɛyɛ vidio

Kenle ko bie, Cheri vɛlɛle me wɔ Vancouver, Canada, ɛleka mɔɔ ɛnee ɔlɛyɛ vidio la wɔ 2003. Ɔvale anyelielɛ ɔzele me kɛ ɔde kale nu na ɔlɛneɛnlea maanle ne anu ɛleka mɔɔ le kɛnlɛma la na arɛlevilɛ nu ɔyɛle asɔne kpole kɛ: “Ka kile me, Nwane a le nɔhalɛ Nyamenle ne a? Kɛ bɛfɛlɛ wɔ ɛ?” Mekɛ zɔhane, ɔpɛle nu wɔ Belemgbunlililɛ Asalo ɛkɛ na ɔnwunle duma Gyihova ne. Ɛhye ati, ɔnwunle kɛ Nyamenle ɛbua ye, na ɛnee ɔkpondɛ kɛ ɔnwu Gyihova Alasevolɛ ne mɔ ndɛndɛ. Menyɛle ngyehyɛleɛ na yeangyɛ, ɔhɔle debiezukoalɛ mɔɔ bɛyɛ ye wɔ China aneɛ nu la wɔ Vancouver.

Nzinlii Cheri zele me kɛ,  “Menli ɛhye mɔ anye die me nwo kpalɛ. Mekola meka kɛzi mete nganeɛ la mekile bɛ.” Me nye liele kɛ ɔhanle edwɛkɛ ɛhye a, ɔluakɛ Cheri anva agɔnwolɛ ɛlɛ wɔ vidio gyima ne anu. Ɛnee Cheri kɔ debiezukoalɛ dahuu. Noko wɔ 2005, ɔvale ɔ sa ɔwulale ngyehyɛleɛ bie abo kɛ ɔyɛ vidio ngɛnlɛma nwiɔ wɔ China. Ɛhye maanle ɔziale ɔhɔle Hong Kong. Ɔyɛ anyelielɛ kɛ wɔ 2006, Cheri yilale ɔ nwo zo maanle Gyihova na bɛzɔnenle ye kɛ Dasevolɛ wɔ Hong Kong nyianu bie abo. Ɛnee ɔkulo kɛ ɔfa ye mekɛ kɔsɔɔti ɔsonle Gyihova, noko ye vidio gyima ne maa ɔyɛ se, na ɛnee ɔ nye ɛnlie.

ƐBOA AWIE MƆ A Ɛ NYE DIE

Cheri ɛbɛlabɔlɛ hakyile bɔkɔɔ wɔ 2009. Ɔzile kpɔkɛ kɛ ɔgyakyi vidio gyima ne amaa yeava ye mekɛ kɔsɔɔti yeazonle Gyihova. Ɔnyianle agɔnwolɛma dɔɔnwo wɔ Kilisiene asafo ne anu. Ɔvale ye mekɛ kɔsɔɔti ɔhanle edwɛkpa ne mɔɔ fane Belemgbunlililɛ ne anwo la na ɛnee ɔ nye die kɛ ɔlɛboa menli yeamaa bɛanyia asetɛnla kpalɛ la.—Mateyu 24:14.

Cheri zile kpɔkɛ kɛ ɔsukoa Nepal aneɛ ne amaa yeaboa Alasevolɛ ekpunli ne mɔɔ ɛlɛnyia anyuhɔlɛ mɔɔ bɛka Nepal aneɛ wɔ Hong Kong la. Mebaha kɛ bɛbu bɛ nye bɛgua Nepalma dɔɔnwo mɔɔ wɔ Hong Kong la anwo zo anzɛɛ bɛmbu bɛ bie ɔluakɛ Nrelenza anzɛɛ China aneɛ ekyi bie a bɛte a. Eza ɛnee asolo bɛ amaamuo. Cheri hanle kɛzi ɔ nye die kɛ ɔlɛboa menli ɛhye mɔ yeamaa bɛade Baebolo ne abo la hilele me. Kɛ neazo la, kenle ko bie mɔɔ ɔlɛyɛ azua nu daselɛlilɛ la, ɔyiale Nepal raalɛ bie mɔɔ ze Gyisɛse anwo edwɛkɛ ekyi noko ɔnze nɔhalɛ Nyamenle, Gyihova anwo ɛhwee la. Cheri gyinlanle Baebolo ne azo maanle ɔnwunle kɛ Gyisɛse zɛlɛle ɔ Ze mɔɔ wɔ anwuma la. Mɔɔ raalɛ ne nwunle kɛ ɔbahola yeazɛlɛ nɔhalɛ Nyamenle ne mɔɔ ye duma a le Gyihova la, ɔliele edwɛkpa ne ɔlile. Yeangyɛ ɔ hu nee ɔ ra raalɛ ne noko zukoale Baebolo ne.—Edwɛndolɛ 83:18; Luku 22:41, 42.

Cheri

Mɔɔ menwunle kɛzi Cheri ɛlɛfa ye mekɛ kɔsɔɔti aha edwɛkpa ne la, membizale me nwo kɛ, ‘Duzu a si me adenle mɔɔ ɔmmaa mengola menyɛ mɔɔ ɔlɛyɛ la bie a?’ Mekɛ zɔhane, ɛnee medame noko mewɔ Hong Kong. Menzile kpɔkɛ kɛ metoto me ninyɛne boɛ amaa meava me mekɛ kɔsɔɔti meahilehile awie mɔ Baebolo nu nɔhalɛ ne. Menwu ye kɛ saa metie menli na meboa bɛ memaa bɛte Nyamenle Edwɛkɛ ne abo a ɔmaa me nye die kpalɛ.

Menwu ye kɛ saa meboa menli memaa bɛte Nyamenle Edwɛkɛ ne abo a ɔmaa me nye die kpalɛ

Kɛ neazo la, mehola me nee Vietnam raalɛ bie mɔɔ di nyane dahuu na ɔsu la ɛzukoa Baebolo ne. Kɛkala ɔ nye die ɛbɛlabɔlɛ nu na ɔ nye die kɛ ɔ nee asafo ne anu amra babɔ.

Me nee Cheri nyianle debie mɔɔ tɛla dumalielɛ. Vidio gyima ne yɛ anyelielɛ na ɔmaanle yɛliele duma ɛdeɛ, noko Gyihova Nyamenle anwo debie mɔɔ yɛkilehile menli la maa yɛnyia ahunlundwolɛ ɔluakɛ ɔmaa yɛwula ye anyunlunyia. Yɛnwu kɛ Gyisɛse edwɛkɛ ɛhye le nɔhalɛ bɔkɔɔ: “[Anyelielɛ] dɔɔnwo wɔ ɛmanlɛ nu tɛla ɛlielɛ.”—Gyima ne 20:35.