Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ TITILI | ƐKULO KƐ ƐSUKOA BAEBOLO NE Ɔ?

Duzu Ati A Ɔwɔ Kɛ Ɛsukoa Baebolo Ne A?

Duzu Ati A Ɔwɔ Kɛ Ɛsukoa Baebolo Ne A?
  • Ɛbɛlabɔlɛ bodane a le duzu?

  • Kɛmɔti a yɛnwu amaneɛ na yɛwu ɛ?

  • Kɛzi kenle bie bayɛ ɛ?

  • Asoo Nyamenle dwenle me nwo?

Asoo wɔbiza ɛ nwo kpuya ɛhye mɔ bie ɛlɛ? Saa ɔle zɔ a, ɛnee tɛ ɛ ngomekye ɔ. Menli kɔsɔɔti dwenle ɛbɛlabɔlɛ nu kpuya mɔɔ hyia la anwo. Ɛbahola wɔanwu mualɛ ne mɔ ɔ?

Menli mgbe dɔɔnwo baha kɛ, “Ɛhɛe!” Duzu ati ɔ? Ɔluakɛ bɛnyia kpuya nwo mualɛ mɔɔ yɛ ahunlundwolɛ la wɔ Baebolo ne anu. Ɛkulo kɛ ɛnwu mɔɔ Baebolo ne ka la ɔ? Bie a ɛbahulo kɛ ɛbanyia Baebolo ɛzukoalɛ mɔɔ bɛndua ɛhwee mɔɔ Gyihova Alasevolɛ yɛ la azo nvasoɛ. *

Nɔhalɛ, saa ɔba ye Baebolo ne ɛzukoalɛ a, menli bie mɔ ka kɛ: “Menlɛ alagye.” “Ɔyɛ se somaa.” “Menea me nwo boɛ na mealie debie meado nu.” Noko bie mɔ lɛ adwenle ngakyile. Bɛdie bɛto nu kɛ bɛbazukoa mɔɔ Baebolo ne kilehile la. Suzu neazo ekyii bie anwo nea:

  • “Mehɔ Kateleke yɛɛ Protestant asɔne, Sikh asɔnesua nee Buda ɛsɔfoma sua nu, yɛɛ menzukoale ɛzonlenlɛ nwo debie wɔ yunivɛsiti. Noko meannyia me kpuya mɔɔ fane Nyamenle anwo la anu dɔɔnwo anwo mualɛ. Gyihova Dasevolɛ bie rale me sua nu. Me nye liele ye mualɛ mɔɔ gyi Baebolo ne azo la anwo la ati, memaanle ɔ nee me zukoale Baebolo ne.”—Gill, England.

  • “Ɛnee melɛ ɛbɛlabɔlɛ nwo kpuya dɔɔnwo, noko mualɛ mɔɔ me ɛsɔfo ne mɔ fa maa me la ammaa me kunlu andwo. Noko akee, Gyihova Dasevolɛ bie gyinlanle Baebolo ne ala azo buale me kpuya ne mɔ. Mekɛ mɔɔ ɔbizale me kɛ mekpondɛ kɛ mesukoa dɔɔnwo la, menliele mendole nu.”—Koffi, Benin.

  • “Ɛnee mekpondɛ kɛ menwu tɛnlabelɛ mɔɔ mɔwuamra wɔ nu la. Medie medi kɛ mɔwuamra kola gyegye anyewɔzoamra, noko ɛnee mekpondɛ kɛ menwu mɔɔ Baebolo ne ka la. Yemɔti me nee me gɔnwo Dasevolɛ bie bɔle ɔ bo zukoale Baebolo ne.”—José, Brazil.

  • “Membɔle mɔdenle kɛ mekenga Baebolo ne noko ɛnee mende ɔ bo. Akee Gyihova Alasevolɛ rale me sua nu na bɛhilehilele Baebolo ngapezo dɔɔnwo anu bɛhilele me. Ɛnee mekulo kɛ menwu debie gyɛne mɔɔ mebahola meazukoa la.”—Dennize, Mexico.

  • “Ɛnee mesuzu kɛ Nyamenle ɛndwenle me nwo. Yemɔti menyɛle kɛ mesɛlɛ Nyamenle ne mɔɔ Baebolo ne vi ye la. Ye alehyenlɛ nu, Alasevolɛ ne mɔ rale me sua nu, na menliele Baebolo ɛzukoalɛ ne mendole nu.”—Anju, Nepal.

Anwubielɛ ɛhye mɔ maa yɛkakye Gyisɛse edwɛkɛ ɛhye: “Anyelielɛ a le bɛdabɛ mɔɔ bɛze bɛ sunsum nu ngyianlɛ la.” (Mateyu 5:3, NW) Ɛhɛe, ɔhyia kɛ alesama nwu Nyamenle. Nyamenle ala a kola di ngyianlɛ ɛhye anwo gyima a, na ɔdua ye Edwɛkɛ, Baebolo ne azo a ɔyɛ zɔ a.

Yemɔti, duzu a Baebolo ɛzukoalɛ kile a? Kɛzi ɔbaboa wɔ ɛ? Bɛbabua kpuya ɛhye mɔ wɔ edwɛkɛ mɔɔ doa zo la anu.

^ ɛden. 8 Baebolo ne kile kɛ Nyamenle duma a le Gyihova.