Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Asoo Ɛze?

Asoo Ɛze?

Gyima boni a ɛnee sogya kpanyinli di ye wɔ Wulomu ɛlɔnema ne anu a?

Bɛyɛ sogya kpanyinli Marcus Favonius Facilis nvoninli wɔ bolɛ zo

Keleseɛne Giliki Ngɛlɛlera ne ka Wulomu sogya mgbanyima nwo edwɛkɛ dɔɔnwo. Sogya kpanyinli ne mɔɔ nleanle maanle bɛhunle Gyisɛse, yɛɛ Kɔnileɛse mɔɔ le maanle maanle ne anu sonla mɔɔ limoale rayɛle Keleseɛnenli la ɛnee lɛ dibilɛ ɛhye. Kpanyinli ne mɔɔ nleanle maanle bɛbilale ɛzoanvolɛ Pɔɔlo empele yɛɛ Dwuleɛse mɔɔ vale Pɔɔlo hɔle Wulomu la noko ɛnee le sogya mgbanyima.Maake 15:39; Gyima ne 10:1; 22:25; 27:1.

Sogya kpanyinli ta nea ɛlɔnema 50 nee 100 mɔɔ bɛtia aze la anwo zo. Ye gyima ne bie a le kɛ ɔtete bɛ, ɔtea bɛ, ɔneɛnlea bɛ adɛladeɛ nee bɛ konle ninyɛne nu na ɔfa adehilelɛ ɔmaa wɔ konle mekɛ nu.

Sogya kpanyinli le dibilɛ mɔɔ kpogya na ɔtɛla biala mɔɔ sogyanli biala bahola anyia a. Ɛnee sogyama mɔɔ ɛbe kpalɛ la na bɛnea menli nwo zo kpalɛ la a nyia dibilɛ ɛhye a. Wulomu ɛlɔnema mɔɔ anwo yɛ se kpalɛ la gyi ndetelɛ mɔɔ bɛfa bɛmaa bɛ la azo. Buluku ko ka kɛ, ɛnee sogya mgbanyima “a lɛ anwubielɛ kpalɛ na bɛze bɛ gyima ne anye zo kpalɛ a.”

Kɛzi ɛnee Baebolo mekɛ zo neanleɛ le ngakyile fi ɛnɛ ɛdeɛ ne anwo ɛ?

Tete Yigyibitima neanleɛ

Neanleɛ mɔɔ wɔ ɛkɛ ɛnɛ la ɛnle kɛ Baebolo mekɛ zo ɛdeɛ ne mɔɔ bɛfa bulalɛ mɔɔ bɛhwi nwolɛ kpalɛ—bɛta bɛfa mbulalɛ ngakyile mɔɔ le kɛ kɔbele, dwɛtɛ fufule nee nvutuke a bɛyɛ a. Bɛlimoale bɛhanle neanleɛ nwo edwɛkɛ wɔ Baebolo ne anu wɔ mekɛ mɔɔ bɛsi ndanlɛsua ne, mɔɔ le ɛleka mɔɔ Yizilayɛma limoale zonlenle la. Mraalɛ vale bɛ neanleɛ ne mɔ maanle bɛvale bɛyɛle kɔbele kyɛnze nwuanzanwuanza ne nee ɔ bo ne. (Adendulɛ 38:8) Ɔzɔho kɛ ɛnee ɔwɔ kɛ bɛkolo neanleɛ ne mɔ bɛfa bɛdi bodane ɛhye anwo gyima.

Menli mɔɔ tudu azɛlɛ nwo la ɛnwu neanleɛ mɔɔ agudeɛ nee debie gyɛne mɔɔ mraalɛ fa siezie bɛ nwo boka nwo la wɔ Yizilayɛ. Neanleɛ ɛhye mɔ ɛnee le ɛdɛbaa mɔɔ bɛva taboa, bulalɛ anzɛɛ ɛzɛlɛ bɛyɛ ɔ sa ne, mɔɔ bɛta bɛse ye kɛ raalɛ. Ɛnee bɛkyikyi neanleɛ ne anyunlu na bɛgyakyi ɔ nzi ɛdeɛ ne.

Ɛnee tete neanleɛ ne mɔ ɛnda kɛmɔ ɛnɛ neanleɛ ne mɔ de la. Ɔbayɛ kɛ ɛhye maa yɛnwu mɔɔ ɛnee ɛzoanvolɛ Pɔɔlo ɛlɛka nwolɛ edwɛkɛ mɔɔ ɔse: “Kɛkala, mɔɔ yɛnwu ye la le kɛ nvoninli monzomonzo bie wɔ neanleɛ nu.”1 Kɔlentema 13:12.