Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ TITILE | KƐZI Ɛ NYE BALIE WƆ GYIMA NWO LA

Kɛzi Ɛ Nye Balie Gyimaɛyɛlɛ Nwo La

Kɛzi Ɛ Nye Balie Gyimaɛyɛlɛ Nwo La

“Eza ɔle Nyamenle ahyɛlɛdeɛ mɔɔ yeva yemaa sonla kɛ awie biala kɛli kɛnlo na ɔkɛlie ɔ nye wɔ ye ɛvɛlɛ nwo.” (Nolobɔvo ne 3:13) Saa Nyamenle kulo kɛ yɛ nye die yɛ gyima nwo a, asoo ndelebɛbo ɛnle nu kɛ ɔbahile yɛ kɛzi yɛbanyia anyelielɛ zɛhae ɔ? (Ayezaya 48:17) Ɔyɛ anyelielɛ kɛ, ɔdua ye Edwɛkɛ, Baebolo ne azo ɔyɛ ye zɔ. Suzu Baebolo nu folɛdulɛ mɔɔ maa yɛnyia ahunlundwolɛ wɔ yɛ gyima nwo wɔ edwɛkɛ mɔɔ doa zo la anu.

NYIA GYIMA NWO ADWENLE KPALƐ

Saa wɔ gyima ne hyia adwenle, anwosesebɛ anzɛɛ kɛ ɔde ye biala la, nwu ye kɛ “nvasoɛ wɔ gyimayɛlɛ kɔsɔɔti azo.” (Mrɛlɛbulɛ 14:23) Duzu nvasoɛ ɔ? Debie ko a le kɛ, gyimayɛlɛ boa maa yɛdi yɛ nwonane nu ngyianlɛ nwo gyima. Nɔhalɛ nu, Nyamenle ɛbɔ ɛwɔkɛ kɛ ɔbava menli mɔɔ fi ahonle nu sonle ye la ngyianlɛdeɛ yeamaa bɛ. (Mateyu 6:31, 32) Noko eza ɔkulo kɛ yɛyɛ yɛ afoa nu ɛdeɛ ɔlua mɔdenle mɔɔ yɛbɔ yɛava nɔhalɛlilɛ yɛayɛ gyima la.​—2 Tɛsalonaekama 3:10.

Yemɔti, yɛbahola yɛabu yɛ gyima ne kɛ adenle mɔɔ yɛdua zo yɛdwu yɛ bodane nwo la. Gyimayɛlɛ le adenle kpalɛ mɔɔ boa maa yɛdi yɛ ɛzonlelilɛ nwo gyima. Joshua mɔɔ ɛnyia 25 la se, “Ɛkola ɛnea ɛ nwo a ɛnee wɔwie. Saa ɛkola ɛtua ninyɛne mɔɔ ɛhyia nwo la anwo kakɛ a, ɛnee wɔ gyima ne azo ɛra nvasoɛ.”

Bieko, gyimayɛlɛ maa bɛbu yɛ. Mɔɔ de la a le kɛ gyima biala ɛyɛlɛ ɛnla aze. Saa yɛtete yɛ nwo yɛmaa yɛ nye kɔ yɛ gyima nwo a​—saa bɔbɔ ɔfonle anzɛɛ ɔyɛ se a​—yɛbahola yɛanyia ahunlundwolɛ kɛ yɛlɛ ngyinlazo mɔɔ kpogya a. Ɛnee yɛli adwenle mɔɔ bɛlɛ kɛ bɛkoati gyimayɛlɛ la azo konim. (Mrɛlɛbulɛ 26:14) Wɔ adenle ɛhye azo, gyima maa yɛ kunlu dwo yɛ nwo kpalɛ. Aaron mɔɔ yɛlumua yɛha ɔ nwo edwɛkɛ la se, “Meyɛ gyima mewie biala a, me nye die kpalɛ. Bie a mefɛ​—yɛɛ  awie mɔ ɛnnwu me gyima mɔɔ meyɛ la ɛdeɛ, noko meze kɛ mehola meyɛ debie.”

FA Ɛ NWO WULA GYIMAYƐLƐ NU

Baebolo ne ka nrenya mɔɔ ‘asa nloa gyima le kɛnlɛma’ nee raalɛ mɔɔ ‘fa ɔ sa yɛ gyima anyelielɛ nu’ la anwo edwɛkɛ kpalɛ. (Mrɛlɛbulɛ 22:29; 31:13) Nɔhalɛ nu, awie ɛnnwu gyima nye zo kpalɛ mgbane ala. Yɛ nuhua ekyi bie anye die kɛ yɛbayɛ ninyɛne mɔɔ yɛnyɛ nwolɛ deɛ la. Bie a ɛhye ati a menli dɔɔnwo anye ɛnlie bɛ gyima nwo la; bɛmbɔ mɔdenle kɛ bɛbanwu ye yɛ kpalɛ.

Nɔhalɛ nu, awie bahola azukoa na yeamaa ɔ nye alie gyima biala anwo, saa ɔfa adwenle kpalɛ ɔyɛ a​—kile kɛ, saa ɔfa ye adwenle ɔsie kɛzi ɔbayɛ gyima ne kpalɛ la azo a. William mɔɔ ɛli ɛvolɛ 24 la ka kɛ, “Saa ɛku ɛ nwo ɛyɛ gyima na ɛnwu mɔɔ ɛvi nu ɛra la a, ɔmaa ɛ nye die. Saa ɛyɛ ye afoa bie anzɛɛ ɛyɛ ekyi bie a ɛnde nganeɛ ɛhye.”

DWENLE KƐZI WƆ GYIMA NE BOA AWIE MƆ LA ANWO

Mmadwenle ezukoa mɔɔ ɛnyia ye la anwo ala. Emomu, biza ɛ nwo kpuyia ɛhye mɔ: ‘Duzu ati a gyima ɛhye anwo hyia ɛ? Saa meanyɛ ye fee anzɛɛ meanyɛ ye boɛ a, duzu a bazi a? Kɛzi me gyima ne boa awie mɔ ɛ?’

Ɔle kpalɛ kɛ yɛbadwenle kpuyia ne mɔɔ li awieleɛ la anwo, ɔluakɛ saa yɛnwu kɛ yɛ gyima boa awie mɔ a, yɛnyia ahunlundwolɛ. Gyisɛse mumua ne hanle kɛ: “Nyilalɛ dɔɔnwo wɔ ɛmanlɛ nu tɛla ɛlielɛ.” (Gyima ne 20:35) Saa ɛye menli mɔɔ tɔ ninyɛne nee gyimamenlema mɔɔ yɛ gyima ne boa bɛ la ɛsie ahane a, awie mɔ noko nyia yɛ gyimayɛlɛ ne azo nvasoɛ. Bɛmɛ a le yɛ sua nu amra nee menli mɔɔ bɛhyia la.

Yɛ sua nu amra. Saa abusua tile bie yɛ gyima ɛsesebɛ fa nea ye sua nu amra a, ɔboa bɛ wɔ ndenle nwiɔ azo. Mɔɔ lumua la, ɔnea kɛ bɛ sa baha bɛ nwonane afoa nu ninyɛne​—aleɛ, tɛladeɛ, nee dabelɛ. Ɔyɛ ɛhye ɔfa ɔdi ye ɛzonlelilɛ mɔɔ Nyamenle ɛva ɛmaa ye kɛ ɔnlea “ye mbusua” ne la anwo gyima. (1 Temɔte 5:8) Mɔɔ tɔ zo nwiɔ, awie mɔɔ bɔ mɔdenle ye ezukoa la dua ye neazo zo kile kɛ gyimayɛlɛ nwo hyia kpalɛ. Shane mɔɔ yɛha ɔ nwo edwɛkɛ la hanle kɛ, “Me papa bɔ mɔdenle yɛ neazo kpalɛ wɔ gyimayɛlɛ nwo. Ɔle nrenya mɔɔ di nɔhalɛ mɔɔ yeva ye ngoane mekɛ muala yeyɛ gyima kɛ kapentanli. Ye neazo ne ɛmaa mezukoa kɛ mebava me sa meayɛ gyima, meayɛ debie mɔɔ baboa awie mɔ la.”

Menli mɔɔ bɛhyia la. Ɛzoanvolɛ Pɔɔlo dule Keleseɛnema folɛ kɛ bɛyɛ “gyima, amaa [bɛanyia] . . . bie [bɛaboa] bɛdabɛ mɔɔ bɛhyia la.” (Ɛfɛsɛsema 4:28) Nɔhalɛ nu, saa yɛyɛ gyima yɛnea yɛ nwo nee yɛ abusua a, eza ɔbamaa yɛahola yɛaboa menli mɔɔ ɛnlɛ bie la. (Mrɛlɛbulɛ 3:27) Yemɔti gyimayɛlɛ kola boa yɛ maa yɛnyia ɛmanlɛ nu anyelielɛ.

 YƐ DƆƆNWO

Wɔ Gyisɛse Boka Zo Edwɛkɛhanlɛ ne anu, ɔhanle kɛ: “Saa awie dua ye tumi zo ahye wɔ mialera nu kɛ ɛ nee ye ɛhɔ adenle kilomita ko a, ɛ nee ye ɛhɔ nwiɔ.” (Mateyu 5:41) Kɛ ɔkɛyɛ na wɔava ngyinlazo mɔɔ wɔ edwɛkɛ ɛhye anu la wɔali gyima wɔ wɔ gyima nwo ɛ? Kɛ anrɛɛ ɛbayɛ ekyi bie ala la, kpondɛ adenle dua zo yɛ dɔɔnwo tɛla mɔɔ bɛkpondɛ kɛ ɛyɛ la. Fa bodane bie sie ɛ nye zo; yɛ wɔ adwenle kɛ ɛbayɛ wɔ gyima ne kpalɛ anzɛɛ ɛbayɛ ye ndɛndɛ wɔadɛla mɔɔ bɛkpondɛ la. Maa ɛ nye ɛlie wɔ gyima nwo edwɛkɛ ekyi bie bɔbɔ anwo.

Saa ɛyɛ dɔɔnwo a, ɔmaa ɛ nye die wɔ gyima ne anwo kpalɛ. Kɛmɔti ɛ? Ɔluakɛ ɛdawɔ a ɛlɛ ɛ nwo a. Ɛlɛyɛ dɔɔnwo ɔluakɛ ɛkulo ye zɔ, tɛ kɛ awie gyi ɛ kɔme zo la ati ɔ. (Faelimɔn 14) Wɔ ɛhye anwo, bie a yɛbahakye ngyinlazo ne mɔɔ wɔ Mrɛlɛbulɛ 12:24 la: “Sonla mɔɔ kola gyima yɛ la sie maanle, yɛɛ mgbovonle yɛ mianlera nu gyima.” Nɔhalɛ nu, yɛ nuhua ekyi bie a bɛbamaa yeayɛ kanranli anzɛɛ mianlera nu gyima a. Noko akee, awie mɔɔ yɛ gyima ekyi bie la bade nganeɛ kɛ ɔwɔ akɛlɛzonlenlɛ bo, mɔɔ dahuu awie mɔ gyi ɔ kɔme zo a. Noko awie mɔɔ yɛ dɔɔnwo ɔluakɛ ɔkulo kɛ ɔyɛ zɔ la te nganeɛ kɛ ɔdaye a ɔlɛ ɔ nwo a. Ɔdi ɔ ti anwo.

GYIMA LƐ YE MEKƐ

Gyimayɛlɛ nwo hyia, noko ɔwɔ kɛ yɛkakye kɛ ngoane hyia tɛla gyima. Nɔhalɛ nu, Baebolo ne si mɔdenlebɔlɛ nwo adua. (Mrɛlɛbulɛ 13:4) Noko ɔmmaa yɛ anwosesebɛ kɛ yɛyɛ menli mɔɔ gyima ɛli yɛ adwenle a. Nolobɔvo ne 4:6 se: “Ɔle kpalɛ kɛ ɛkɛnyia ekyi na ɛkɛnyia anzondwolɛ tɛla kɛ ɛkɛva ɛ sa nwiɔ ɛkɛhu ɛ nwo ɛvɛlɛ na ɛkɛpele kɛ ɛkye anwoma.” Boni a ɔkile a? Saa awie mɔɔ fa ɔ ti mi ye gyima nu la maa ye gyima sɛkye ye mekɛ nee ye anwosesebɛ kɔsɔɔti a, ɔ nye ɛnrɛlie wɔ ye ɛvɛlɛ nwo ɛlɛ. Wɔ adenle ɛhye azo, ye gyima bayɛ debie mɔɔ nvasoɛ ɛnle zo kɛ asɛɛ ‘ɔlɛpele yeahye anwoma’ la.

Baebolo ne kola boa yɛ maa yɛnyia gyima nwo adwenle kpalɛ. Ɔka kɛ yɛyɛ gyima ɛdeɛ, noko eza ɔtu yɛ folɛ kɛ ‘yɛnwu ninyɛne mɔɔ nwolɛ hyia’ la. (Felepaema 1:10) Ninyɛne mɔɔ anwo hyia la a le boni mɔ? Bɛmɛ a le kɛ yɛbanyia mekɛ yɛamaa yɛ abusua nee yɛ gɔnwo mɔ. Mɔɔ hyia kpalɛ bɔbɔ la a le sunsum nu ninyɛne, mɔɔ le kɛ yɛkenga Nyamenle Edwɛkɛ ne na yɛadwenledwenle nwolɛ la.

Ɔda ali kɛ menli mɔɔ yɛ bɛ debie biala pɛpɛɛpɛ la anye die bɛ gyima nwo kpalɛ. William mɔɔ yɛha ɔ nwo edwɛkɛ la se, “Me gyimamenle yɛle gyima mɔɔ bɛyɛ ye pɛpɛɛpɛ la anwo neazo kpalɛ. Ɔyɛ gyima ɛsesebɛ, yɛɛ ɔ nee menli mɔɔ ɔ nee bɛ di gua la avinli le kɛnlɛma ɔlua gyima kpalɛ mɔɔ ɔyɛ la ati. Noko saa ɔkpɔne gyima a, ɔze kɛzi ɔfa ye gyima ne ɔsie ahane na ɔfa ye adwenle ɔsie ye abusua nee ye ɛzonlenlɛ zo la azo. Na ɛze ɔ? Ɔboka menli mɔɔ anye die kpalɛ mɔɔ meze bɛ la anwo!”