Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ TITILE | ƐBAHOLA WƆABIKYE NYAMENLE

Ɛ Nee Nyamenle Tendɛ Ɔ?

Ɛ Nee Nyamenle Tendɛ Ɔ?

Saa agɔnwolɛma kpalɛ nwu bɛ nwo a bɛtendɛ anzɛɛ bɛdua moba, e-mail, video, anzɛɛ kɛlata zo bɛtendɛ fane dɔɔnwo. Yemɔti, saa yɛbahola yɛabikye Nyamenle kpalɛ a, ɔwɔ kɛ yɛ nee ye tendɛ dahuu. Noko, kɛ ɔkɛyɛ na yɛayɛ zɔ ɛ?

Yɛkola yɛdua asɔneyɛlɛ zo yɛ nee Gyihova tendɛ. Noko akee, asɔneyɛlɛ mɔɔ yɛfa yɛado Nyamenle anyunlu la ɛnle kɛ edwɛkɛ bie mɔɔ yɛ nee yɛ tipɛne bie di nwolɛ adwelie la. Ɔwɔ kɛ yɛnwu ye kɛ, saa yɛyɛ asɔne a, ɛnee yɛlɛtendɛ yɛahile yɛ Bɔvolɛ, mɔɔ le Anwuma Anwumanli ne la. Ɔwɔ kɛ ɛhye ka yɛ maa yɛfa ɛbulɛ kpole yɛyɛ asɔne. Saa Nyamenle badie yɛ asɔneyɛlɛ a, ɔwɔ kɛ yɛyɛ ninyɛne bie mɔ. Nuhua nsa a wɔ ɛke la.

Mɔɔ lumua la, ɔwɔ kɛ yɛfa yɛ asɔneyɛlɛ yɛto Gyihova Nyamenle angomekye anyunlu, ɔnle kɛ yɛfa yɛto Gyisɛse, “anwodelɛnli”, anzɛɛ abaaba bie anyunlu. (Adendulɛ 20:4, 5) Baebolo ne ka ye wienyi kɛ: “Wɔ debie biala anu bɛyɛ moyɛlɛ nzɛlɛlɛ na bɛva mɔɔ bɛhyia nwolɛ la bɛdo Nyamenle anyunlu.” (Felepaema 4:6) Mɔɔ tɔ zo nwiɔ, ɔwɔ kɛ yɛyɛ asɔne wɔ Nyamenle Ara, Gyisɛse Kelaese duma nu. Gyisɛse hilehilele nu kɛ, “awie biala ɛnrɛhola Selɛ ne ɛkɛ ne kɔ kyesɛ ɔdua me nwo zo.” (Dwɔn 14:6) Mɔɔ tɔ zo nsa, ɔwɔ kɛ yɛ asɔneyɛlɛ nee Nyamenle ɛhulolɛdeɛ yia. Baebolo ne ka kɛ: “Yɛdie yɛdi kɛ saa yɛdua ye ɛhulolɛ zo yɛbiza ye debie biala a ɔtie yɛ.” *1 Dwɔn 5:14.

Agɔnwolɛma kpalɛ tendɛ fane dɔɔnwo

Nɔhalɛ nu, saa sonla ko ala a tendɛ a agɔnwolɛvalɛ kpalɛ ɛnrɛhyɛ. Kɛmɔ agɔnwolɛma nwiɔ kulo kɛ bɛtendɛ la, ɔwɔ kɛ yɛmaa Nyamenle tendɛ kile yɛ, yɛɛ ɔtendɛ ɔkile yɛ a, ɔwɔ kɛ yɛtie ye. Ɛze kɛzi Nyamenle tendɛ kile yɛ la ɔ?

Ɛnɛ, Gyihova Nyamenle dua ye Edwɛkɛ, Baebolo ne azo “tendɛ” kile yɛ. (2 Temɔte 3:16, 17) Kɛmɔti a yɛka ye zɔ ɛ? Neazo ɛne: Fa ye kɛ ɛ gɔnwo kpalɛ bie ɛhɛlɛ wɔ kɛlata. Ɛkenga ɛwie a, bie a ɛbava anyelielɛ wɔaha wɔahile menli kɛ, “Kɛkala a mede edwɛkɛ bie mevi me gɔnwo ne ɛkɛ a!” Noko, yeadendɛ yeangile wɔ, ɔhɛlɛle wɔ kɛlata. Zɔhane ala a ɛkenga Baebolo ne a, ɛnee ɛlɛmaa Gyihova adendɛ ahile wɔ a. Ɛhye ati, Gina, mɔɔ yɛlumuale yɛhanle ɔ nwo edwɛkɛ la se, “Mesuzu kɛ saa mekpondɛ kɛ Nyamenle yɛ me gɔnwo a, ɔwɔ kɛ meneɛnlea ye ‘kɛlata’ mɔɔ yehɛlɛ yɛ la anu—Baebolo ne.” Ɔtoa zo kɛ, “Baebolo ne mɔɔ mekenga ye dahuu la ɛmaa mebikye Nyamenle.” Asoo ɛkenga ye Edwɛkɛ, Baebolo ne dahuu na ɛmaa Gyihova tendɛ kile wɔ alehyenlɛ biala ɔ? Ɛyɛ ye zɔ a, ɔbamaa wɔade nganeɛ kɛ wɔbikye Nyamenle kpalɛ.

^ ɛden. 5 Saa ɛkulo kɛ ɛnwu kɛzi yɛkola yɛbikye Nyamenle wɔ asɔneyɛlɛ nu a, nea Duzu A Baebolo ne Kilehile Amgba A? buluku ne, mɔɔ Gyihova Alasevolɛ ɛyɛ la tile 17.