Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ TITILE | NYAMENLE BELEMGBUNLILILƐ—KƐZI ƆBABOA WƆ Ɛ?

Kɛmɔti A Ɔwɔ Kɛ Ɛdwenle Nyamenle Belemgbunlililɛ Nwo Ɛ?

Kɛmɔti A Ɔwɔ Kɛ Ɛdwenle Nyamenle Belemgbunlililɛ Nwo Ɛ?

Menli mgbe dɔɔnwo mɔɔ wɔ ewiade la anye la Nyamenle Belemgbunlililɛ ne azo. Bɛsukoa Gyisɛse neazo ne, ɔluakɛ ɔhilehilele ye ɛdoavolɛma kɛ bɛyɛ asɔne kɛ: “Wɔ belemgbunlililɛ ɛrɛla. Bɛyɛ wɔ ɛhulolɛdeɛ wɔ azɛlɛ ye azo.”Mateyu 6:10, King James Version.

Ɔyɛ ɛzelekɛ kɛ, menli dɔɔnwo anye die Nyamenle Belemgbunlililɛ ne anwo ɛdeɛ, noko ɔzɔho kɛ asɔne dɔɔnwo ɛndwenle nwolɛ. Wɔ ɛhye anwo, tetedwɛkɛ kɛlɛvolɛ H. G. Wells hanle kɛ ɔyɛ nwanwane kɛ Gyisɛse manle “mɔɔ ɛnee ɔfɛlɛ ye Anwuma Belemgbunlililɛ ne . . . anwo ngilehilelɛ hyianle ye” noko, Wells hanle kɛ, ngilehilelɛ ɛhye “anwo ɛngyia . . . wɔ Keleseɛne asɔne dɔɔnwo ngilehilelɛ nu.”

Gyihova Alasevolɛ ɛnle kɛ zɔhane asɔne ne mɔ la, bɛtwe adwenle bɛkɔ Nyamenle Belemgbunlililɛ ne azo. Suzu nwolɛ: Bɛyɛ yɛ magazine titile, mɔɔ ɛlɛkenga ye kɛkala la wɔ aneɛ 220 anu. Asɛɛ bɛyɛ ko biala mgbe 46, ɛhye maa ɔyɛ magazine mɔɔ menli dɔɔnwo asa ka bie wɔ ewiade amuala a. Na magazine ɛhye edwɛkɛtitile a le boni? Nea ye edwɛkɛtile ne: Ɛzinzalɛ Arane Ɔbɔ Gyihova Belemgbunlililɛ Nolo.  *

Duzu ati a Gyihova Alasevolɛ bɔ mɔdenle bɔ Nyamenle Belemgbunlililɛ ne nolo a? Debie ko a le kɛ, yɛdie yɛdi kɛ Nyamenle Belemgbunlililɛ ne a le edwɛkɛ titile mɔɔ wɔ buluku mɔɔ hyia kpalɛ wɔ ewiade, mɔɔ le Baebolo ne la anu a. Bieko, yɛdie yɛdi kɛ Nyamenle Belemgbunlililɛ ne a bamaa alesama anyia ngyegyelɛ mɔɔ bɛgyi ɔ nloa ɛnɛ la sɔbelɛ kpalɛ a.

Gyihova Alasevolɛ sukoa Gyisɛse neazo ne na bɛtwe menli adwenle bɛkɔ Nyamenle Belemgbunlililɛ ne azo. Mekɛ mɔɔ ɔwɔ azɛlɛ ye azo la, ɔmanle Nyamenle Belemgbunlililɛ ne hyianle ye wɔ ye ɛbɛlabɔlɛ nu yɛɛ ye ɛzonlenlɛ gyima ne anu. (Luku 4:43) Duzu ati a ɛnee Belemgbunlililɛ ne hyia Gyisɛse kpole a? Na kɛzi ɔbaboa ɛ? Yɛsɛlɛ wɔ, suzu Baebolo mualɛ ne mɔɔ edwɛkɛ mɔɔ doa zo kilehile nu la anwo.

^ ɛden. 5 Baebolo ne kile kɛ Nyamenle duma a le Gyihova.