Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐBƐLABƆLƐ NU EDWƐKƐ

Menyia Anwosesebɛ Wɔ Me Bɛtɛɛyɛlɛ Nu

Menyia Anwosesebɛ Wɔ Me Bɛtɛɛyɛlɛ Nu

Saa awie nwu me nwonane bɛtɛɛ ne mɔɔ le kilo 29 la wɔ ehwili nu a, ɔnrɛdwenle kɛ me nwo yɛ se. Noko me nwonane ne yɛ bɛtɛɛ a, menyia anwosesebɛ na mekɔ zo. Maa mengile kɛzi anwosesebɛ nee bɛtɛɛyɛlɛ kɔ zo wɔ me ɛbɛlabɔlɛ nu la.

Ɛnee meli ɛvolɛ nna

Ɛnee meli ɛvolɛ nna

Saa medwenle me ngakula nu a mekakye kɛzi ɛnee yɛ nye die wɔ namule bie mɔɔ wɔ France nyiakɛ, ɛleka mɔɔ ɛnee me awovolɛ de la. Me papa yɛle debie mɔɔ metɛnla nu a ɔkɔ ɔ nyunlu ɔba ɔ nzi la manle me, na ɛnee me nye die kɛ mebanriandi mealuolua tola ne anu. Wɔ 1966 ne anu, Gyihova Alasevolɛ rale yɛ sua nu ɛkɛ na bɛ nee me papa lile adwelie dɔɔnwo. Siane nsuu anzi, ɔbɔle kpɔkɛ kɛ ɔbayɛ Dasevolɛ. Yeangyɛ, me mame noko doale ye, na bɛtetele me wɔ abusua mɔɔ anyelielɛ wɔ nu la anu.

Mekɛ mɔɔ yɛziale yɛhɔle Spain, maanle mɔɔ me awovolɛ vi nu la anzi mekɛ ekyi bie anu, yɛɛ me ngyegyelɛ ne bɔle ɔ bo a. Mɔlebɛbo ne ɛnee mete kɛ me sa nee me gyakɛ kpɔkɛ yɛ me nyane kpalɛ. Yɛhɔle dɔketama dɔɔnwo ɛkɛ wɔ ɛvolɛ nwiɔ anzi la, yɛnyianle awie mɔɔ ɛlie duma kɛ ɔze eselemu nwo ayile la, na ɔhanle ye alɔbɔlɛ nu kɛ, “Yekpa nwolɛ.” Me mame bɔle ɔ bo kɛ ɔsu. Mendele edwɛkɛ ɛzulolɛ mɔɔ le kɛ “ngakula ewule mɔɔ ɔnlɛ ye ayile” yɛɛ “ngakula eselemu,” * wɔ zɔhane sua ne mɔɔ nuhua yɛ ɛyɛlɛ na ɛkɛ ne yɛ ɛzulolɛ la anu. Kɛmɔ ɛnee mele kakula raalɛ mɔɔ menyia ɛvolɛ bulu la ati meande ɔ bo, noko ɛnee meze kɛ ɔnle edwɛkɛ kpalɛ.

Dɔketa ne zuzule kɛ yɛhɔkpondɛ ayileyɛlɛ wɔ ɛleka mɔɔ bɛnea ngakula la. Mengɔle ɛkɛ la, sua ne anwo bɔbɔ manle me rɛle bɔle. Ɛnee bɛle kyengye wɔ bɛnwonililɛ nwo: Mraalɛ mɔɔ wɔ ɛkɛ la pepɛle me enrinli ne na bɛvale tɛladeɛ dɛba bie bɛwulale me. Mekɛ mɔɔ melɛsu la menzuzule nwolɛ kɛ, ‘Kɛ ɔkɛyɛ na meahola meadɛnla ɛke ɛ?’

MENWUNLE KƐ GYIHOVA ƐLƐBOA ME

Kɛmɔ me awovolɛ tetele me kɛ menzonle Gyihova la ati, memkpole kɛ mebava me nwo meawula Katɔlek nyɛleɛ nu wɔ ɛkɛ ne. Ɛnee mraalɛ ne mɔ ɛnde deɛmɔti menva me nwo menwula nu la abo. Menzɛlɛle Gyihova kɛ ɔmmakpo me, na yeangyɛ mendele nganeɛ kɛ yeva ɔ sa yedo me nwo zo, kɛ selɛ mɔɔ lɛ ɛlɔlɛ la.

Bɛmanle me awovolɛ adenle kɛ ɔdwu Folɛ a bɛkola bɛfa mekɛ ekyi bɛbakpɔla me. Bɛvale Baebolo mbuluku bɛrɛlɛle me kɛ megenga na menyia diedi kpole. Ɛnee bɛmmaa ngakula ɛnva bɛ mbuluku ɛmba ɛkɛ, noko mraalɛ ne mɔ manle menvale me ɛdeɛ ne yɛɛ  Baebolo ne menziele, na ɛnee mekenga ye alehyenlɛ biala. Menganle anyelazo mɔɔ melɛ kɛ mebadɛnla azɛlɛ ye azo Paladaese nu dahuu, mɔɔ awie biala anwo ɛnrɛdo ye la anwo edwɛkɛ noko mengilele mbɛlɛra gyɛne mɔɔ wɔ ɛkɛ la. (Yekile 21:3, 4) Ɔyɛ a me nwo yɛ me koonwu na medi nyane ɛdeɛ, noko ɛnee ɔyɛ me fɛ kɛ diedi nee anwodozo mɔɔ melɛ wɔ Gyihova anu ɛlɛyɛ kpole la.

Menlile siane nsia wɔ ɛkɛ la, dɔketama ne manle mengɔle sua nu. Me ewule ne azo ande, noko ɛnee ɔyɛ me fɛ kɛ mezia mehɔ me awovolɛ anwo ɛkɛ la. Me agbɔkɛ nu yɛle bɛtɛɛ kpalɛ, na mendele nyane kpole. Melɛnyi la ɛnee menlɛ anwosesebɛ fee. Noko, menlile ɛvolɛ 14 la, bɛzɔnenle me, na membɔle kpɔkɛ kɛ mebabɔ mɔdenle biala meazonle me anwuma Selɛ ne. Noko akee, ɔdwu mekɛ ne bie a ɔmaa me rɛle bɔ. Meyɛ asɔne kɛ, “Kɛmɔti a ɛhye ɛdo me a? Mesɛlɛ wɔ, yɛ me ayile. Ɛnwu kɛzi melɛfɛ la ɔ?”

Mendwule mgbanyinli ɛleka la ɔyɛle se ɔmanle me kpalɛ. Ɛnee medie meto nu kɛ menrɛde kpɔkɛ. Ɛnee mefa me nwo meto me gɔnwo mɔ anwo a ɔnyɛ boɛ—bɛte kpɔkɛ kpalɛ yɛɛ bɛ nye die. Mendele nganeɛ kɛ me nwo ɛngyia, na ɛnee mese nyiane. Noko akee, me abusua ne nee me gɔnwo mɔ boale me. Mekakye Alicia a ɛnee me nye ɛlie—ɔtɛla me ɛvolɛ 20—na ɔrayɛle me gɔnwo kpalɛ. Ɔboale me kɛ menye me adwenle menvi me ewule ne azo na memaa me nye ɛlie awie mɔ anwo tɛla kɛ mebadwenle me ngyegyelɛ ne anwo la.

MENWUNLE MƆƆ MEYƐ A ME NYE BALIE LA

Menyianle ɛvolɛ 18 la, me ewule ne anu mianle na ɛnee ɔyɛ me ɛvɛlɛ kɛ mebahɔ Keleseɛne nyianu la. Noko, ɛnee mefa “mekɛ mɔɔ menyia” wɔ sua nu la mesukoa Baebolo ne kpalɛ. Dwobu buluku ne nee Edwɛndolɛ ne boale me manle mendele ɔ bo kɛ kɛkala, bie a Gyihova Nyamenle ɛnrɛbɔ yɛ nwo bane wɔ debie biala anu, noko ɔmaa yɛnyia anyelazo mɔɔ yɛhyia la. Asɔne mɔɔ ɛnee meta meyɛ la manle menyianle “tumi bedevinli ne” yɛɛ ‘Nyamenle anzondwolɛ ne mɔɔ bo ndelebɛbo muala azo la.’—2 Kɔlentema 4:7; Felepaema 4:6, 7.

Menyianle ɛvolɛ 22 la, ɛnee ɔwɔ kɛ metɛnla ehwili nu. Ɛnee mesulo kɛ menli ɛnrɛnwu me na ehwili mɔɔ raalɛ mɔɔ ɛnde kpɔkɛ de nu ala a bɛbanwu ye a. Noko, ehwili ne manle menyianle fanwodi, na ɔmanle “amowa” ne hakyile nyilalɛ. Me gɔnwo bie mɔɔ bɛfɛlɛ ye Isabel la zuzule kɛ menva menyɛ me bodane kɛ mebava dɔnehwele 60 me nee ye ayɛ edwɛkɛhanlɛ gyima ne wɔ siane ko anu.

Alumua ne, ɛnee medwenle kɛ ɔlɛdi nwɔhoa. Noko menzɛlɛle Gyihova moalɛ, na ɔlua me abusua ne nee me gɔnwo mɔ moalɛ zo, menyɛle zɔ. Zɔhane siane ne mɔɔ alagye ɛnle nu la pɛle nu ndɛndɛ, na menwunle kɛ mehola meli ɛzulolɛ nee nyianezelɛ zo konim. Me nye liele nwolɛ kpole yemɔti wɔ 1996 ne anu, menzile kpɔkɛ kɛ mebayɛ dahuu adekpakyelɛnli—na meava mekɛ dodo bie meahɔ daselɛlilɛ siane biala. Ɔle kpɔkɛ kpalɛ mɔɔ menzile la anu ko, ɔmanle membikyele Nyamenle na bɔbɔ menyianle anwosesebɛ. Daselɛlilɛ mɔɔ ɛnee mekɔ la maa mekola meka me diedi ne anwo edwɛkɛ mekile menli dɔɔnwo na ɔboa bie mɔ ɔmaa bɛyɛ Nyamenle agɔnwo mɔ.

GYIHOVA SƆ ME NU

Wɔ 2011 wawaa mekɛ nu, menyianle kale esiane na me gyakɛ amu nwiɔ bubule. Mekɛ mɔɔ mela asopiti ɛkpa ne azo na melɛte nyane la, menyɛle asɔne ɛsesebɛ wɔ me ti anu kɛ: “Gyihova mesɛlɛ wɔ, mmagyakyi me!” Yeangyɛ biala, raalɛ bie mɔɔ bikye me ɛkpa ne la bizale me kɛ, “Ɛle Gyihova Dasevolɛ ɔ?” Ɛnee menlɛ anwosesebɛ mɔɔ mekola metendɛ a, yemɔti menvale me ti menliele zolɛ. Ɔhanle kɛ, “Meze bɛ! Meta mekenga bɛ magazine ne mɔ.” Zɔhane edwɛkɛ ne kyekyele me rɛle kpole. Mekɛ mɔɔ me nwo yɛ alɔbɔlɛ bɔbɔ la, mekola medi daselɛ memaa Gyihova. Enililɛ boni a le ɛhye!

Mendele kpɔkɛ ekyii la, menzile kpɔkɛ kɛ mebali daselɛ dɔɔnwo. Me mame pianle me ehwili ne kpɔsale asopiti ɛleka mɔɔ bɛto menli wɔ ɛkɛ la, na ɛnee bɛva debie bɛkyekye me gyakɛ nwiɔ ne. Alehyenlɛ biala, yɛkɔkpɔla wuleravolɛma ekyi, yɛbiza kɛzi bɛ nwo de la, na yɛmaa bɛ Baebolo mbuluku. Ɛnee zɔhane ɛkpɔlalɛ ne mɔ yɛ ɛvɛlɛ, noko Gyihova manle menyianle anwosesebɛ mɔɔ mehyia la.

Me nee me awovolɛ wɔ 2003

Me nee me awovolɛ wɔ 2003

Ɛvolɛ ekyi mɔɔ ɛze ɛhɔ la, me amaneɛnwunlɛ nee nyanelilɛ ɛyɛ kpole yɛɛ me papa mɔɔ ɛwu la ɛmaa  akee yebo zolɛ. Noko, mebɔ mɔdenle kɛ mebanyia adwenle kpalɛ. Adenle boni azo? Mekɛ biala mɔɔ ɔkɛyɛ boɛ la, mebɔ mɔdenle mekɔ me gɔnwo mɔ nee me nwo amra ɛkɛ, na ɛhye maa meye me adwenle mefi me ngyegyelɛ ne azo. Saa ɔka me ngome a, mekenga debie, mesukoa Baebolo ne, anzɛɛ medua fonu zo medi awie mɔ daselɛ.

Meta mekeda me nye na mebuke me “nvɛnzɛlɛ” ne menea ewiade fofolɛ ne mɔɔ Nyamenle ɛbɔ nwolɛ ɛwɔkɛ la anu

Eza mebɔ mɔdenle memaa me nye die ninyɛne ngyikyi nwo, mɔɔ le kɛ anwoma mɔɔ bɔ me nyunlu anzɛɛ felawɔse evuanlɛ la. Ninyɛne ɛhye mɔ maa menyia anyezɔlɛ. Ɛzelekɛ noko boa kpalɛ. Kenle ko bie mɔɔ yɛhɔle daselɛlilɛ la, me gɔnwo ne mɔɔ ɛnee ɔlɛpia me ehwili ne la gyinlanle kɛ ɔkɛlɛ debie. Arɛlevilɛ nu ala ehwili ne telele na ɔhɔzile kale bie mɔɔ gyi ɛkɛ la anu. Ɔzinle yɛ nwo, noko mekɛ mɔɔ yɛnwunle kɛ debie biala mɔɔ yɛ ɛzulolɛ anzi la, yɛzelele kpalɛ.

Ninyɛne dɔɔnwo wɔ ɛkɛ mɔɔ mengola menyɛ a. Mebu bɛ kɛ ninyɛne mɔɔ mebayɛ ye kenlebie la. Meta mekeda me nye na mebuke me “nvɛnzɛlɛ” ne menea ewiade fofolɛ ne mɔɔ Nyamenle ɛbɔ nwolɛ ɛwɔkɛ la anu. (2 Pita 3:13) Mefa ye kɛ mede kpɔkɛ, melua na melɛdie me nye kpalɛ la. Mefa anyelielɛ metie Belemgbunli Devidi edwɛkɛ ne kɛ: “Fa ɛ nye to Gyihova anwo zo; nyia akɛnrasesebɛ na si wɔ ahonle.” (Edwɛndolɛ 27:14, NW) Me nwonane ɛyɛ bɛtɛɛ ɛdeɛ, noko Gyihova ɛmaa menyia anwosesebɛ. Melɛkɔ zo meanyia anwosesebɛ wɔ me bɛtɛɛyɛlɛ nu.

^ ɛden. 6 Ngakula eselemu le ewule mɔɔ ɔnlɛ ye ayile mɔɔ ka ngakula a. Nwonane ne anwosesebɛ mɔɔ ɔfa ɔgyinla ewule nloa la sɛkye nwonane ne, na ɔmaa debie nwu bɛ agbɔkɛ nu na ɔfofo bɛ.