Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Bɛnyianle Nyamenle Edwɛkɛ Ne Wɔ Spain Avinli Mekɛ Nu

Bɛnyianle Nyamenle Edwɛkɛ Ne Wɔ Spain Avinli Mekɛ Nu

‘Saa melɛkɔ Spain a me nye la kɛ mebanwu bɛ, na me nee bɛ dua ekyii a bɛagyakyi me adenle bamaa meahɔ ɛkɛ.’—Wulomuma 15:24.

ƐZOANVOLƐ Pɔɔlo hɛlɛle zɔhane edwɛkɛ ne manle ɔ gɔnwo mɔ Keleseɛnema mɔɔ wɔ Wulomu wɔ ɛvolɛ kɛyɛ 56 Y.M. la. Baebolo ne ɛngile saa Pɔɔlo nyianle hɔle Spain ne a. Kɛ ɔde biala la, ɔlua Pɔɔlo anzɛɛ Keleseɛne edwɛkpatɛlɛvolɛma gyɛne mɔdenlebɔlɛ zo, ɔkadwu ɛvoya mɔɔ tɔ zo nwiɔ Y.M. la, ɛnee Nyamenle Edwɛkɛ, Baebolo ne anu edwɛkpa ne ɛdwu Spain.

Yeangyɛ, bɛnyianle Keleseɛne ɛleka ngakyile dɔɔnwo wɔ Spain. Ɔrale ye zɔ la, ɛnee ɔhyia kɛ menli mɔɔ wɔ ɛkɛ ne la nyia Baebolo mɔɔ bɛhile ɔ bo wɔ Latin nu la. Ɛnee ɛhye le zɔ, ɔluakɛ ɔkadwu ɛvoya ne mɔɔ tɔ zo nwiɔ la, ɛnee Spain wɔ Wulomu tumi bo na Latin a ɛnee bɛka ye dɔɔnwo wɔ Wulomu Maanle ne ɛleka biala a.

LATIN BAEBOLO NE MƆ BOALE

Keleseɛnema mɔɔ lumua mɔɔ bɛka Spain aneɛ la hilele Baebolo ne abo dɔɔnwo wɔ Latin nu mɔɔ bɛfɛlɛ ye kɛ Vetus Latina Hispana. Bɛvale Latin Baebolo ɛhye bɛmanle wɔ ɛvolɛ dɔɔnwo anu kolaa na Jerome awie ye Latin Vulgate mɔɔ liele duma wɔ ɛvoya ne mɔɔ tɔ zo nnu Y.M. mɔlebɛbo la.

Jerome ngilebɛbo ne mɔɔ ɔyɛle ɔwiele wɔ Bethlehem, mɔɔ wɔ Palestine la dwule Spain ndɛndɛ. Mekɛ mɔɔ Lucinius, Baebolo sukoavo bie mɔɔ lɛ ezukoa nwunle kɛ Jerome ɛlɛkile Baebolo ne abo wɔ Latin nu la, ɛnee ɔkulo kɛ ɔkɛyɛ boɛ a ɔ sa ka ngilebɛbo fofolɛ ɛhye bie ndɛndɛ. Ɔmanle kɛlɛvolɛma nsia hɔle Bethlehem na bɛnleanle zolɛ bɛhɛlɛle bie bɛrale Spain. Wɔ ɛvoya ne mɔ mɔɔ doa zo la anu, ngyikyingyikyi Vulgate ne ralile Vetus Latina Hispana ne agyakɛ anu. Latin ngilebɛbo ɛhye mɔ boale menli mɔɔ wɔ Spain la manle bɛgengale Baebolo ne na bɛdele ye edwɛkɛ ne abo. Noko mekɛ mɔɔ Wulomu Maanle tumi ne ɛlɛba ye awieleɛ la, ɛnee ɔhyia kɛ bɛnyia aneɛ fofolɛ.

BAEBOLO NE WƆ TABOA EKYI ZO

Wɔ ɛvoya ne mɔɔ tɔ zo nnu azo, Visigoth nee Germany aneɛ ngakyile hɔle Spain anwo zo na aneɛ fofolɛ mɔɔ le Goth la vindele ɛkɛ. Menli ɛhye mɔɔ hɔle ɛkɛ la ɛnee le Arius Keleseɛnema mɔɔ kpo Nsa-ko ngilehilelɛ ne la. Eza bɛvale bɛ Ngɛlɛlera ɛdeɛ mɔɔ bɛhile ɔ bo la bɛrale—Ulfilas Goth Baebolo ne. Bɛgengale Baebolo ne wɔ Spain kɔkpula ɛvoya ne mɔɔ tɔ zo nsia la awieleɛ, mekɛ mɔɔ Reccared, Visigoth belemgbunli ne hɔle Katɔlek asɔne na ɔgyakyile Arius asɔne ne la. Ɔmanle bɛliele Arius mbuluku kɔsɔɔti, mɔɔ Ulfilas Baebolo ne boka nwo la na bɛzɛkyele bɛ. Ɔlua ɛhye azo, debie biala mɔɔ bɛhɛlɛle ye wɔ Goth nu la minlinle wɔ Spain.

Taboa mɔɔ Baebolo tɛkese mɔɔ wɔ Latin aneɛ nu wɔ zo, wɔ ɛvoya nsia Y.M.

Taboa mɔɔ Baebolo tɛkese mɔɔ wɔ Latin aneɛ nu wɔ zo, wɔ ɛvoya nsia Y.M.

Noko akee, Nyamenle Edwɛkɛ ne hɔle zo dɛlɛle wɔ Spain wɔ mekɛ ɛhye anu. Saa ɛye Goth ɛsie ahane a, ɛnee bɛka Latin aneɛ bie dɔɔnwo wɔ Spain na nzinlii ɔmanle bɛhanle Wulomu aneɛ ngakyile dɔɔnwo wɔ Spain ɛkɛ. * Ɛnee bɛfɛlɛ Latin aneɛ ngɛlata ɛhye nuhua ne mɔɔ ɛhyɛ kpalɛ la Visigoth mɔɔ bɛhɛlɛ wɔ debie zo la, ɔluakɛ bɛhɛlɛle ye wɔ taboa ngyikyi zo. Bɛyɛle ye wɔ ɛvoya nsia nee nsuu ne anu, na edwɛkɛ mɔɔ wɔ Edwɛndolɛ nee Edwɛkpa  ne anu la wɔ bie mɔ azo. Edwɛndolɛ 16 ne amuala wɔ taboa ekyi ko azo.

Ngɛlɛlera edwɛkɛ mɔɔ bɛhɛlɛ wɔ debie zo la kile kɛ ɛnee menli kenga na bɛkɛlɛ Nyamenle Edwɛkɛ ne wɔ zɔhane mekɛ ne. Ɔda ali kɛ, kilehilevolɛma manle sukulu ngakula vale Baebolo ne zukoale ɛhɛlɛlɛ nee ɛgengalɛ. Ɛnee taboa ne mɔ mɔɔ bɛkɛlɛ zolɛ la bolɛ ɛnyɛ se kɛ nane nwoma ne mɔɔ ɛnee avinli mekɛ ne anu ɛsɔfoma fa kɛlɛ Baebolo ne la.

León Baebolo mɔɔ nvoninli dɔɔnwo wɔ nu la anu debie. Ɛnee bɛsonle bolɛ ɛdeɛ, noko Baebolo ɛhye mɔ ammaa menli asa anga Nyamenle Edwɛkɛ ne

León Baebolo mɔɔ nvoninli dɔɔnwo wɔ nu la anu debie. Ɛnee bɛsonle bolɛ ɛdeɛ, noko Baebolo ɛhye mɔ ammaa menli asa anga Nyamenle Edwɛkɛ ne

Baebolo ko mɔɔ nvoninli wɔ nu mɔɔ ye bolɛ ɛnyɛ se la wɔ San Isidoro asɔne ne anu wɔ León, mɔɔ wɔ Spain la. Bɛyɛle ye 960 Y.M., ngɛlata 516 a wɔ nu a na ye kpole le enkyi 18 yɛɛ enkyi 13 yɛɛ nuhua ɛlomboɛ kɛyɛ kilo 18. Bieko mɔɔ kɛkala wɔ Vatican Mbulukuzielɛleka ne la a le Ripoll Baebolo ne, mɔɔ bɛyɛle ye kɛyɛ 1020 Y.M. la. Ɔle Baebolo mɔɔ nvoninli dɔɔnwo wɔ nu tɛla biala wɔ Avinli Mekɛ ne anu a. Amaa bɛahola bɛayɛ zɛhae nvoninli ɛhye mɔ la, ɔwɔ kɛ ɛsɔfo bie fa kenle mumua ko kɛlɛ ngɛlɛlerakpɔkɛ ko anzɛɛ dapɛne mumua ko kɛlɛ edwɛkɛtile bie. Ɛnee zɔhane Baebolo ne mɔ sonle bolɛ ɛdeɛ, noko bɛamboa bɛammaa menli asa anga Nyamenle Edwɛkɛ ne.

BAEBOLO NE WƆ ARAB ANEƐ NU

Ɔkadwu ɛvoya mɔtwɛ ne azo la, aneɛ fofolɛ bɔle ɔ bo wɔ Spain ɔlua Ngɛnlamoma mɔɔ hɔle ɛkɛ ne la ati. Ɛleka mɔɔ Ngɛnlamoma ne dɛnlanle la, bɛhanle Arab aneɛ bɛdɛlale Latin yemɔti ɛnee ɔhyia kɛ bɛnyia Baebolo wɔ aneɛ fofolɛ ɛhye anu.

Ɔvi ɛvoya nnu kɔdwu mɔtwɛ Y.M. azo, Latin nee Arab aneɛ nu Baebolo boale menli mɔɔ wɔ Spain la manle bɛgengale Nyamenle Edwɛkɛ ne

Baebolo dɔɔnwo mɔɔ bɛhilele ɔ bo wɔ Arab aneɛ nu—titile Edwɛkpa ne—le mɔɔ bɛvale bɛmanle wɔ Spain avinli mekɛ ne anu. Ɔda ali kɛ, wɔ ɛvoya mɔtwɛ ne anu, John, ɛsɔfo kpanyinli mɔɔ wɔ Seville la hilele Baebolo ne amuala abo wɔ Arab aneɛ nu. Ɔyɛ alɔbɔlɛ kɛ mɔɔ bɛhile ɔ bo wɔ Arab aneɛ nu la anu dɔɔnwo ɛminli. Bɛva Edwɛkpa ne mɔɔ bɛhilele ɔ bo wɔ Arab aneɛ nu wɔ ɛvoya bulu ne avinli la ko bɛzie asɔne sua kpole mɔɔ wɔ León, mɔɔ wɔ Spain la anu.

Edwɛkpa ne mɔɔ bɛhile ɔ bo wɔ Arab aneɛ nu wɔ ɛvoya bulu Y.M. la

Edwɛkpa ne mɔɔ bɛhile ɔ bo wɔ Arab aneɛ nu wɔ ɛvoya bulu Y.M. la

 BƐNYIANLE BIE WƆ SPAIN ANEƐ NU

Avinli Mekɛ ne ɛlɛba awieleɛ la anu, Castilia anzɛɛ Spain aneɛ ne bɔle ɔ bo kɛ ɔnyia anyuhɔlɛ wɔ Spain ɛkɛ. Ɛnee aneɛ fofolɛ ɛhye hyia na bɛabɔ Nyamenle Edwɛkɛ ne nolo. * Baebolo ne mɔɔ bɛhilele ɔ bo wɔ Spain aneɛ nu la vindele wɔ La Fazienda de Ultra Mar (Gyima Mɔɔ Vi Nyevile Nzi) ne anu wɔ ɛvoya 13 ne mɔlebɛbo. Edwɛkɛ mɔɔ boka ɛhye anwo la a le adenle bie mɔɔ bɛdule bɛhɔle Yizilayɛ nee Pentateuch ne anu edwɛkɛ yɛɛ mbuluku gyɛne mɔɔ wɔ Hibulu Ngɛlɛlera ne nee Edwɛkpa ne yɛɛ Ngɛlata ne mɔ anu la.

Belemgbunli Alfonso X boale manle bɛhilele Baebolo ne abo wɔ Spain aneɛ nu

Belemgbunli Alfonso X boale manle bɛhilele Baebolo ne abo wɔ Spain aneɛ nu

Asɔne mgbanyima anye anlie ngilebɛbo ɛhye anwo. Wɔ 1234, Tarragona Ayiama ne hanle kɛ bɛva Baebolo mbuluku kɔsɔɔti mɔɔ bɛyɛ wɔ bɛ aneɛ nu la bɛmaa ɛsɔfoma ne ɛyela bɛ. Ɔyɛ anyelielɛ kɛ mɛla ɛhye ammaa bɛangyakyi Baebolo ne abo ɛhilelɛ. Belemgbunli Alfonso X (1252-1284), mɔɔ bɛbu ye kɛ ɔdaye a ɔhɛlɛle Spain aneɛ ne la ɛnee kulo kɛ bɛkile Ngɛlɛlera ne abo wɔ aneɛ fofolɛ ne anu yemɔti ɔboale. Ninyɛne mɔɔ bɛhilele ɔ bo wɔ Spain aneɛ nu wɔ mekɛ ɛhye anu la bie a le mɔɔ bɛfɛlɛ ye Kolaa-Alfonso Baebolo ne yɛɛ Alfonso Baebolo ne mɔɔ bɛyɛle ye ɔ nzi mekɛ ekyi bie anu, mɔɔ bɛhilele ɔ bo wɔ Spain aneɛ nu bɛdɛlale biala la.

Kolaa-Alfonso (bɛne zo) yɛɛ Alfonso (fema zo) Baebolo, ɛvoya 13 ne anu mukelɛ ne mɔ

Kolaa-Alfonso (bɛne zo) yɛɛ Alfonso (fema zo) Baebolo, ɛvoya 13 ne anu mukelɛ ne mɔ

Gyima nwiɔ ɛhye boale manle Spain aneɛ ne mɔɔ le fofolɛ la gyinlanle na ɔnyianle anyuhɔlɛ. Nwomanli Thomas Montgomery ka Kolaa-Alfonso Baebolo ne anwo edwɛkɛ kɛ: “Ahenle mɔɔ hilele Baebolo ɛhye abo la yɛle gyima kɛnlɛma manle aneɛ ne anu lale ɛkɛ. . . . Aneɛ ne abo ɛdelɛ ɛnyɛ se na ɛnee ɛhye hyia wɔ Baebolo mɔɔ bɛyɛ bɛmaa menli mɔɔ bɛnde Latin kpalɛ la.”

Noko akee, bɛhilele zɔhane Spain aneɛ Baebolo ne mɔɔ lumua la abo bɛvile Latin Vulgate ne anu na tɛ mɔlebɛbo aneɛ ne. Ɔvi ɛvoya 14 ne mɔɔ kɔ la, Dwuu nwomama hilele Hibulu Ngɛlɛlera ne abo dɔɔnwo vile Hibulu nu rale Spain aneɛ nu. Zɔhane mekɛ ne, ɛnee Spain a le Europe ɛleka mɔɔ Dwuuma dɔɔnwo wɔ a, na ɛnee Dwuuma mɔɔ kile edwɛkɛ bo la kola nyia Hibulu bɛsanloangɛlɛlera kpalɛ ne fa yɛ bɛ gyima. *

Neazo kɛnlɛma ko a le Alba Baebolo ne mɔɔ bɛhɛlɛle bɛwiele wɔ ɛvoya ne mɔɔ tɔ zo 15 la. Dehelɛ titile bie mɔɔ vi Spain mɔɔ bɛfɛlɛ ye Luis de Guzmán la, manle Rabi Moisés Arragel hilele Baebolo ne abo wɔ castizo Spain aneɛ (tagyee) ne anu. Ɔhilele ninyɛne nwiɔ mɔɔ ɔti ɔhanle kɛ bɛhile fofolɛ ɛhye abo la. Mɔɔ lumua, ɔhanle kɛ: “Baebolo ne mɔɔ yɛlɛ ye ɛnɛ wɔ Wulomu aneɛ nu la ɛnle kpalɛ,” yɛɛ mɔɔ tɔ zo nwiɔ, “Yɛ nuhua bie mɔ kulo nwolɛ edwɛkɛ ngyikyi ne amaa yɛade ɛleka mɔɔ ɔyɛ se la abo.” Ye edwɛkɛ ne maa yɛnwu kɛ ye mekɛ zo amra anye die kɛ bɛbagenga Baebolo ne na bɛade ɔ bo kpalɛ. Eza ɔkile kɛ bɛhilele Ngɛlɛlera ne abo wɔ aneɛ mɔɔ menli ka la anu na menli dɔɔnwo nyianle bie wɔ Spain.

Ɔlua menli mɔɔ kile edwɛkɛ bo yɛɛ kɛlɛvolɛma mɔɔ wɔ avinli mekɛ ne anu moalɛ zo, menli mɔɔ hɔle sukulu wɔ Spain la kola kenga Baebolo  ne wɔ bɛ aneɛ nu mɔɔ ngyegyelɛ kpole biala ɛnle nwo a. Ɔlua ɛhye ati, tetedwɛkɛ kɛlɛvolɛ Juan Orts González hanle kɛ “ɛnee Spain amra ze Baebolo ne anu kpalɛ tɛla Germany anzɛɛ England amra kolaa na Luther ara.”

“Ɛnee Spain amra ze Baebolo ne anu kpalɛ tɛla Germany anzɛɛ England amra kolaa na Luther ara.” —Tetedwɛkɛ kɛlɛvolɛ Juan Orts González

Noko akee, ɔkadwu ɛvoya 15 ne awieleɛ la, Spain Edwɛkɛlilɛma ne duale kɛ ɔnle kɛ awie biala nyia Ngɛlɛlera ne wɔ aneɛ biala anu. Bɛvale bɛ sa bɛdole Baebolo ne azo mekɛ tendenle wɔ Spain. Ɛvoya nsa pɛle nu kolaa na bɛamaa nwolɛ adenle. Wɔ zɔhane mekɛ ne mɔɔ yɛ se la anu, menli mɔɔ kile edwɛkɛ bo mɔɔ lɛ akɛnrasesebɛ la yɛle bie fofolɛ wɔ maanle gyɛne zo wɔ Spain aneɛ nu na bɛveale bɛ nwo bɛvale bɛrale Spain. *

Kɛmɔ Spain avinli mekɛ ne anu Baebolo tetedwɛkɛ kile la, dwazotiama bɔle mɔdenle kɛ bɛsisi Nyamenle Edwɛkɛ ne azo wɔ ndenle dɔɔnwo anu. Noko akee, bɛangola bɛangeda Tumivolɛ Bedevinli ne edwɛkɛ ne azo.—Edwɛndolɛ 83:1; 94:20.

Mɔdenle mɔɔ nwomama dɔɔnwo bɔle la boale manle menli dɔɔnwo nyianle Baebolo ne wɔ Spain avinli mekɛ ne anu. Menli mɔɔ kile edwɛkɛ bo ɛnɛ la ɛzukoa menli mɔɔ lumua hilele Ngɛlɛlera ne abo wɔ Latin, Goth, Arab, nee Spain aneɛ nu la. Ɔlua ɛhye azo, ɛnɛ, menli mɔɔ ka Spain aneɛ la kola kenga Nyamenle Edwɛkɛ ne wɔ aneɛ mɔɔ ka bɛ ahonle la anu.

^ ɛden. 10 Castilia, Catolonia, Galicia nee Portuguese aneɛ boka nwo.

^ ɛden. 17 Ɛnɛ, menli kɛyɛ mgbe 540 ka Spain aneɛ.

^ ɛden. 20 Nea edwɛkɛ “The Divine Name and Alfonso de Zamora’s Quest for Textual Accuracy,” mɔɔ wɔ December 1, 2011, Nrelenza magazine ɛdeɛ ne anu la.

^ ɛden. 23 Nea edwɛkɛ “Casiodoro de Reina’s Fight for a Spanish Bible,” mɔɔ wɔ June 1, 1996, Nrelenza magazine ɛdeɛ ne anu la.