Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Anyelazo Maa Mɔwuamra—Ewudwazo Ne

Anyelazo Maa Mɔwuamra—Ewudwazo Ne

Ɛdie Baebolo ewudwazo ɛwɔkɛ ne ɛdi ɔ? * Saa yɛbaha a, anyelazo mɔɔ wɔ ɛkɛ ne kɛ yɛ nee yɛ alɔvolɛ mɔɔ ɛwu bɛabɔ nu bieko la yɛ anyelielɛ. Noko asoo anyelazo zɛhae bara nu? Amaa yɛabua la, ɔwɔ kɛ yɛsuzu Gyisɛse Kelaese ɛzoanvolɛ ne mɔ neazo ne anwo.

Ɛnee ɛzoanvolɛ ne mɔ lɛ diedi bɔkɔɔ kɛ mɔwuamra banyia ewudwazo. Kɛmɔti ɛ? Ɔlua ndelebɛbo nwiɔ bie ati. Mɔɔ lumua la, ɛnee bɛ anyelazo ne gyi nɔhalɛ edwɛkɛ ɛhye azo: Bɛdwazo Gyisɛse bɛvi mɔwuamra anu. Ɛzoanvolɛ ne mɔ—yɛɛ menli “mɔɔ bo 500” wɔ mekɛ ko anu—nwunle Gyisɛse mɔɔ bɛdwazo ye la. (1 Kɔlentema 15:6) Bieko, bɛlile Gyisɛse ewudwazo ne anwo daselɛ wɔ ɛleka dɔɔnwo na bɛliele bɛdole nu, kɛmɔ Edwɛkpa nna ne kile la.—Mateyu 27:62–28:20; Maake 16:1-8; Luku 24:1-53; Dwɔn 20:1–21:25.

Mɔɔ tɔ zo nwiɔ, ɛzoanvolɛ ne mɔ nwunle kɛ Gyisɛse dunwuele menli nsa—mɔɔ lumua la zile wɔ Neeyen, akee wɔ Kapɛnayɛm yɛɛ Bɛtani. (Luku 7:11-17; 8:49-56; Dwɔn 11:1-44) Ewudwazo ɛhye mɔ bie mɔɔ li awieleɛ, mɔɔ bɛha nwolɛ edwɛkɛ wɔ magazine ɛhye anu la fane abusua bie mɔɔ bɛ gɔnwo a le Gyisɛse la anwo. Bɛmaa yɛnlea mɔɔ zile la kpalɛ.

“MAME A MELE EWUDWAZO NE”

“Ɛ diema nrenya ne badwazo.” Gyisɛse hanle zɔhane edwɛkɛ ne hilele Maata, mɔɔ ɛnee ɔ diema Lazalɛse ɛwu na yeli kenle nna la. Alumua ne, Maata ande Gyisɛse edwɛkɛ ne abo. Ɔbuale kɛ: “Meze kɛ ɔbadwazo,” noko ɛnee ɔdwenle kɛ ɔbayɛ kenlebie. Nea kɛzi ɔzinle ɔ nwo wɔ mekɛ mɔɔ ɔdele kɛ Gyisɛse hanle kɛ “Mame a mele ewudwazo ne nee ngoane ne a,” na ɔnwunle kɛ Gyisɛse ɛdwazo ɔ diema nrenya ne ɛvi ewule nu la!—Dwɔn 11:23-25.

Kenle nna ne mɔɔ Lazalɛse wule la ɛnee ɔwɔ ni? Lazalɛse anga debie biala mɔɔ kile kɛ ɛnee ɔde aze wɔ ɛleka bie wɔ kenle nna ne anu a. Kyɛkyɛ, ɛnee Lazalɛse ɛnlɛ ɛkɛla mɔɔ ɛnwu ɛlɛ mɔɔ ɛhɔ anwuma a. Mekɛ mɔɔ Gyisɛse dwazole Lazalɛse la, yeanva ye yeanvi anwuma yeamba azɛlɛ ye azo, yeandwe ye yeanvi anwuma anyelielɛ ɛleka bie mɔɔ bikye Nyamenle anwo la. Yemɔti kenle nna ne ɛnee Lazalɛse wɔ ni? Nɔhalɛ nu, ɛnee yela wɔ kuma ne anu.—Nolobɔvo ne 9:5, 10.

 Kakye kɛ, Gyisɛse vale ewule dole nafelɛ nwo na ewudwazo a bɛbalua zo bɛadwazo bɛ a. Ɔhanle kɛ: “‘Yɛ gɔnwo Lazalɛse ɛlafe, na mekɔ meahɔdunwue ye.’ Ɛdoavolɛma ne buale kɛ, ‘Awulae, saa yelafe a, ɛnee ɔbadunwue!’ Gyisɛse ɛnee kpondɛ aze kɛ Lazalɛse ɛwu, na bɛmɛ bɛdwenlenle nafelɛ kpalɛ nwo. Yemɔti Gyisɛse hanle ye wienyi hilele bɛ kɛ, ‘Lazalɛse ɛwu.’” (Dwɔn 11:11-14) Gyisɛse dwazole Lazalɛse na ɔmanle ɔrale ngoane nu bieko na ɔ nee ye abusua ne ziale bɔle nu. Nea ahyɛlɛdeɛ nwanwane kokye mɔɔ Gyisɛse vale manle zɔhane abusua ne a!

Menli mɔɔ Gyisɛse dwazole bɛ wɔ azɛlɛ ye azo la le ninyɛne mɔɔ ɔbayɛ ye kenlebie kɛ Nyamenle Belemgbunlililɛ ne azo Belemgbunli la anwo neazo. * Saa Gyisɛse vi anwuma ɛlɛdi tumi wɔ azɛlɛ ye azo a, ɔbamaa alesama kɔsɔɔti mɔɔ bɛla wɔ ewule nu la adwazo ara ngoane nu. Yemɔti a ɔhanle kɛ: “Mame a mele ewudwazo ne la.” Dwenle kɛzi ɛnwu wɔ alɔvolɛ bieko a ɛ nye balie la anwo nea! Eza dwenle kɛzi bɛdabɛ mɔɔ bɛbadwazo bɛ anye balie la noko anwo nea!—Luku 8:56.

Dwenle kɛzi ɛnwu wɔ alɔvolɛ bieko a ɛ nye balie la anwo nea!

DAHUU NGOANE NWO DIEDI

Gyisɛse hanle hilele Maata kɛ: “Mɔɔ kɛlie me kɛli la, saa ɔwu bɔbɔ a ɔkɛnyia ngoane; yɛɛ mɔɔ de aze na ɔdie me ɔdi la ɛnrɛwu ɛlɛ.” (Dwɔn 11:25, 26) Menli mɔɔ Gyisɛse badwazo bɛ wɔ ye ɛvolɛ apenle ko tumililɛ ne anu la banyia dahuu ngoane nwo anyelazo—mekɛ tendenle ala mɔɔ bɛdie ye bɛdi la.

“Mɔɔ kɛlie me kɛli la, saa ɔwu bɔbɔ a ɔkɛnyia ngoane.”—Dwɔn 11:25.

Gyisɛse hanle ewudwazo ne anwo edwɛkɛ kɛnlɛma zɔhane wiele la, ɔbizale Maata kɛ: “‘Ɛdie ɛhye ɛdi ɔ?’ Maata buale kɛ: ‘Ɛhɛe, Awulae! Medie medi kɛ wɔmɔ a ɛle Mɛzaya ne, Nyamenle Ara ne.’” (Dwɔn 11:26, 27) Na ɛdawɔ noko ɛ—ɛkulo kɛ ɛnyia ewudwazo ne anu diedi kɛ Maata la ɔ? Mɔɔ lumua la a le kɛ ɛbanyia bodane mɔɔ Nyamenle lɛ maa alesama la anwo ndelebɛbo. (Dwɔn 17:3; 1 Temɔte 2:4) Ndelebɛbo zɛhae bamaa wɔanyia diedi. Duzu ati a ɛmbiza Gyihova Alasevolɛ ɛmmaa bɛngile wɔ mɔɔ Baebolo ne kilehile wɔ edwɛkɛ ɛhye anwo la ɛ? Bɛ nye balie kɛ bɛ nee wɔ bazuzu ewudwazo anyelazo kɛnlɛma ne anwo. ▪

^ ɛden. 2 Nea edwɛkɛ “Ɛwu A Ɛnee Ɔtɛwiele!” mɔɔ wɔ mukelɛ 6 la.

^ ɛden. 9 Saa ɛkpondɛ kɛ ɛnwu Baebolo ne ɛwɔkɛ mɔɔ fane kenlebie ewudwazo ne anwo edwɛkɛ dɔɔnwo a, nea Duzu A Baebolo ne Kilehile Amgba A? buluku ne mɔɔ Gyihova Alasevolɛ ɛyɛ la tile 7. Bie noko wɔ www.jw.org.