Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ TITILE | ASOO ƐWU A ƐNEE YEWIE?

Ewule Bɔlɔ Ne

Ewule Bɔlɔ Ne

Ewule le edwɛkɛ mɔɔ maa sonla yɛ basaa. Menli dɔɔnwo ɛngulo kɛ bɛka nwolɛ edwɛkɛ. Noko ɔngyɛ ɛnee bie ɛdo bɛ. Ewule bɔlɔ ne noko anwo yɛ ndɛ yɛɛ ɔyɛ nyane.

Debie biala ɛmmaa yɛngola yɛnziezie yɛ nwo kpalɛ yɛmmaa awovolɛ, bokavolɛ anzɛɛ kakula bie ewule. Esiane bahola azi arɛlevilɛ nu anzɛɛ mekɛ tendenle bie anzi. Kɛzi ɔde biala la, yɛnriandi ewule a ɔnyɛ boɛ, yɛɛ ɔsi a ɔmaa yɛ nye zo ta yɛ.

Antonio, mɔɔ kale hunle ye papa la ka kɛ: “Ɔle kɛ awie ɛdo wɔ anlenkɛ nu na yeva wɔ sanvɛ ne yehɔ la. Ɛkɔ sua ne anu a ɔnyɛ boɛ wɔ mekɛ ekyi bɔbɔ anu. Mɔɔ ɛha ala a le mɔɔ ɛkakye la. Kɛ yera ye la ɛne. Ɛbayɛ wɔ adwenle kɛ ɔnle zɔ ɛdeɛ—kɛmɔ ɔzɔho kɛ ɔle nzisi la ati—noko ɛngola ɛnyɛ nwolɛ ɛhwee.”

Mekɛ mɔɔ Dorothy ahu wule wɔ mekɛ mɔɔ ɛnee yeli ɛvolɛ 47 la, ɔbɔle kpɔkɛ kɛ ɔbakpondɛ nwolɛ mualɛ. Kɛmɔ ɔnea Sunday sukulu zo la ati, ɛnee ɔte nganeɛ kɛ awie wu a ɔtɛwiele. Noko yeannyia mualɛ fɔɔnwo biala. Ɔbizale ye Angelekan ɛsɔfo ne kɛ, “Yɛwu a yɛkɔ ni?” Ɔbuale kɛ, “Awie biala ɛnze. Ɔwɔ kɛ yɛkendɛ na yɛanwu ye.”

Asoo kyesɛ “yɛkendɛ na yɛanwu ye”? Asoo yɛbahola yɛalua adenle bie azo yɛanwu ye kɛ amgba ɛwu a ɛnee yewie?