Gyisɛse mekɛ zo, kɛzi ɛnee bɛye ɛzonlenlɛ sua ne anwo ndoboa ɛ?

Ɛnee ɛzonlenlɛ sua ndoboa ɛlɛka ne gyi Mraalɛ Alie nwo ɛkɛ. The Temple—Its Ministry and Services buluku ne ka kɛ: “Ɛnea nwolɛ a abenlana ekyi bie la ɛkɛ, na ye bane ne anwo yɛɛ nlɛka bulu nee nsa anzɛɛ ‘aweɛne’ mɔɔ bɛfa ezukoa bɛgua nu la gyigyi a.”

Ɛnee bɛfɛlɛ nlɛka ne mɔ aweɛne ɔluakɛ bɛ anwuma le ekyi yɛɛ bɛ aze tɛlɛ. Ɛnee asolo ɛlɛka biala nee afɔlebɔlɛ mɔɔ bɛfa ye ezukoa bɛgua nu a, na ɛnee bɛfa ezukoa mɔɔ bɛnyia bɛfi nu la bɛyɛ debie fɔɔnwo bie. Ɛnee Gyisɛse wɔ Mraalɛ Alie nwo ɛkɛ wɔ mekɛ mɔɔ ɔnwunle kɛ menli dɔɔnwo, mɔɔ kunlavolɛ raalɛ ehyianli bie boka nwo ɛlɛye ndoboa la.—Luku 21:1, 2.

Ɛnee nlɛka nwiɔ wɔ ɛkɛ mɔɔ bɛfa bɛtua ɛzonlenlɛ sua adwule—bɛfa ko bɛtua ɛvolɛ ne anu ɛdeɛ yɛɛ bɛfa ko bɛtua ɛvolɛ ne mɔɔ ɛpɛ nu la. Ɛnee bɛfa nlɛka 3 kɔdwu 7 bɛdie bolɛ mɔɔ bɛpɛ bɛmaa abubule, mɔlɔnoma, ɛyɛne, ayile evuanlɛ yɛɛ nvutuke ahyɛnze ne mɔ la. Saa ahenle mɔɔ ɛlɛbɔ afɔle ne la lɛ ezukoa mɔɔ tɛla bolɛ mɔɔ bɛhile la a, ɔfa mɔɔ ɛbo zo la ɔgua nlɛka mɔɔ ɛha la anu. Ɛnee bɛfa ɛtane afɔlebɔlɛ ezukoa mɔɔ kɛha la bɛgua ɛlɛka 8 ne anu. Nlɛka 9 kɔdwu 12 anu ezukoa ne vi fɔlɛlilɛ afɔlebɔlɛ, nloma afɔlebɔlɛ, Nazalaema afɔlebɔlɛ yɛɛ kokobɛvolɛma afɔlebɔlɛ ne mɔ anu. Ɛnee bɛfa ɛlɛka 13 ne bɛdie ndoboa mɔɔ vi ahonle nu la.

Asoo Baebolo kɛlɛvolɛ Luku hɛlɛle tetedwɛkɛ kpalɛ?

Luku hɛlɛle Edwɛkpa ne mɔɔ ye duma la zo la yɛɛ Ɛzoanvolɛma Gyima ne. Luku ka kɛ ɔnleɛnleanle “ninyɛne ɛhye mɔ anu boɛ, ɔvi bɛ mɔlebɛbo ne,” noko nwomama bie mɔ su mɔɔ ɔhɛlɛle la anwo kpolera. (Luku 1:3) Asoo mɔɔ ɔhɛlɛle la le nɔhalɛ?

Luku hanle tetedwɛkɛ mɔɔ daselɛlilɛ wɔ nwolɛ la. Kɛ neazo la, wɔ aneɛ mɔɔ ɔvale ɔhɛlɛle la anu. Ɔbobɔle Wulomu mgbanyinli amodinli mɔɔ vea la. Ɛnɛ, bɛfɛlɛ bɛ mgbanyima wɔ Felepae; Tɛsalonaeka yɛɛ Ɛfɛsɛse. (Gyima ne 16:20, 17:6; 19:31) Luku vɛlɛle Hɛlɔdo Antepase amɛnlado, yɛɛ Sɛgyeɛse Pɔɔlɛse amɛnlado wɔ Saepelɛse.—Gyima ne 13:1, 7; 28:7.

Amodinli mɔɔ Luku vale lile gyima kpalɛ la fɛta ɔluakɛ saa bɛkakyi kɛzi Wulomu azɛlɛsinli bie de la a, ahenle mɔɔ nea zolɛ la amodinli kakyi. Bruce Metzger mɔɔ le Baebolo nwomanli la ka kɛ, “Mekɛ biala, zɛhae edwɛkɛ ne mɔɔ wɔ Gyima ne anu la fɛta maa ɛleka nee mekɛ mɔɔ bɛlɛka nwolɛ edwɛkɛ la.” Nwomanli William Ramsay ka kɛ Luku “le tetedwɛkɛ kɛlɛvolɛ mɔɔ bɔ mɔdenle kpalɛ.”