Bɛtani le namule ekyi bie mɔɔ ɛvi ɛkɛ mɔɔ kɔ Gyɛlusalɛm le mayɛlɛ nwiɔ la. (Dwɔn 11:18) Ɔhale mekɛ ekyi na Gyisɛse awu la esiane bie zile wɔ ɛkɛ. Lazalɛse, mɔɔ le Gyisɛse agɔnwo kpalɛ la, anwo dole ye kpole arɛlevilɛ nu na ɔwule.

Mekɛ mɔɔ Gyisɛse dele edwɛkɛ ne la, ɔhanle ɔhilele ye ɛdoavolɛma kɛ Lazalɛse ɛlafe, na ɔkulo kɛ ɔkɔtunwue ye. (Dwɔn 11:11) Noko Gyisɛse ɛdoavolɛma ne ande ye edwɛkɛ ne abo, yemɔti Gyisɛse hanle hilele bɛ wienyi kɛ: “Lazalɛse ɛwu.”—Dwɔn 11:14.

Bɛziele ye na ɔlile kenle nna la, Gyisɛse hɔle Bɛtani kɛ ɔkakyekye Maata, mɔɔ ɔ diema a ɛwu la arɛle. Maata hanle kɛ: “Saa ɛwɔ ɛke a, anrɛɛ me diema nrenya ne anwu!” (Dwɔn 11:17, 21) Gyisɛse zele ye kɛ: “Mame a mele ewudwazo ne nee ngoane ne a. Mɔɔ kɛlie me kɛli la, saa ɔwu bɔbɔ a ɔkɛnyia ngoane.”—Dwɔn 11:25.

“Lazalɛse, dwazo bɛla!”

Amaa yeahile kɛ zɔhane edwɛkɛ ne ɛnle ɛwɔkɛ mgbane la, Gyisɛse hɔle nla ne anwo na ɔdeanle nu kpole kɛ: “Lazalɛse, dwazo bɛla!” (Dwɔn 11:43) Menli mɔɔ gyigyi ɛkɛ ne la nwunle azibɛnwo debie, nrenya ne mɔɔ ɛwu la vindele rale.

Ɛnee Gyisɛse ɛlumua ɛdwazo menli nwiɔ. Mekɛ bie ɔdwazole kakula bɛlɛra bie—Gyeeyaelɛse ara raalɛ ne. Kolaa na yeadwazo ye la, ɔhanle kɛ ɔlɛdafe.—Luku 8:52.

Yɛ ye nzonlɛ kɛ wɔ Lazalɛse nee Gyeeyaelɛse ara raalɛ ne ewule ne anwo, Gyisɛse vale ewule dole nafelɛ nwo. Ndotonwo ɛhye fɛta. Kɛmɔti ɛ? Awie da a ɔnde ɛhwee na ɔmaa ɔda ali kɛ ɔlɛdie ɔ menle wɔ nyane nee amaneɛnwunlɛ nwo. (Nolobɔvo ne 9:5; nea ɛlɛka  “Ewule Le Kɛ Nafelɛ Botoo.”) Gyisɛse alumua ɛdoavolɛma dele mɔwuamra nɔhalɛ gyinlabelɛ ne abo wienyi. Encyclopedia of Religion and Ethics ka kɛ, “Gyisɛse ɛdoavolɛma  nwunle ewule kɛ nafelɛ, yɛɛ azie zo kɛ ɛleka mɔɔ menli mɔɔ ɛwu wɔ diedi nu die bɛ menle la.” *

Ɔle arɛlekyekyelɛ ɔmaa yɛ kɛ yɛkɛnwu kɛ mɔwuamra ɛla wɔ ewule nu yɛɛ bɛnde nyane biala. Ɛhye ati ewule ɛnle feabo yɛɛ ɔnle kɛ ɔmaa ɛzulolɛ ka yɛ.

“SAA SONLA WU A, ƆKƐDƐNLA NGOANE NU BIEKO Ɔ?”

Ɔdwu nɔsolɛ a yɛ nye die kɛ yɛbala kpalɛ ɛdeɛ, noko nwane a kulo kɛ ɔda dahuu a? Anyelazo boni a yɛlɛ kɛ mɔwuamra mɔɔ bɛla wɔ ewule nu la bɛadwazo ara ngoane nu—kɛmɔ Lazalɛse nee Gyeeyaelɛse ara raalɛ ne yɛle la a?

Mekɛ mɔɔ tete selɛ Dwobu dele nganeɛ kɛ ɔka ekyii ɔwu la ɔbizale nwolɛ kpuyia. Ɔbizale kɛ: “Saa sonla wu a, ɔkɛdɛnla ngoane nu bieko ɔ?”—Dwobu 14:14.

Mekɛ mɔɔ ɔlɛtendɛ yeahile Tumivolɛ Bedevinli Nyamenle ne la, Dwobu buale ye kpuyia ne kɛ: “Ɛbavɛlɛ, na mebalie wɔ zo; ɛ nwo balɔ ɛ sa anloa gyima.” (Dwobu 14:15) Ɛnee Dwobu die di kɛ Gyihova anwo balɔ kenle mɔɔ Ɔbadwazo Ye sonvolɛ ne mɔɔ di nɔhalɛ la. Ɛnee Dwobu ɛlɛdwenle debie mgbane nwo ɔ? Kyɛkyɛ.

Menli mɔɔ Gyisɛse dwazole bɛ la manle ɔlale ali wienyi kɛ Nyamenle manle Gyisɛse tumi wɔ ewule nwo zo. Nɔhalɛ nu, Baebolo ne ka kɛ kɛkala Gyisɛse lɛ “Ewule nee Ɛbolɔ sanvɛ ne.” (Yekile 1:18) Yemɔti kɛmɔ Gyisɛse nyianle tumi dwazole Lazalɛse la, ɔbadwazo menli wɔ kenlebie.

Baebolo ne ka ewudwazo ɛwɔkɛ ɛhye anwo edwɛkɛ fane dɔɔnwo. Anwumabɔvolɛ bie hanle hilele ngapezonli Daneɛle kɛ: “Ɛbawu, na awieleɛ mekɛ ne dwu a, ɛbagyinla ɛleka mɔɔ bɛhyehyɛ bɛmaa wɔ la.” (Daneɛle 12:13) Gyisɛse hanle hilele Sadusiima, mɔɔ le Dwuu mgbanyima mɔɔ bɛnlie ewudwazo ne bɛnli la kɛ: “Bɛvo kpole! Ɔboalekɛ bɛnze Nyamenle Edwɛkɛ ne anzɛɛ Nyamenle tumi ne kɛ si de la.” (Mateyu 22:23, 29) Ɛzoanvolɛ Pɔɔlo hanle kɛ: ‘Me anyelazo mɔɔ melɛ wɔ Nyamenle anu la a le kɛ ɛtanevolɛma nee kpalɛyɛlɛma badwazo ara ngoane nu.’—Gyima ne 24:15.

MEKƐ BONI A BƐBADWAZO MƆWUAMRA A?

Mekɛ boni a ɛtanevolɛma nee kpalɛyɛlɛma ewudwazo ɛhye bara zo a? Anwumabɔvolɛ ne hanle hilele tenlenenli Daneɛle kɛ ɔbadwazo wɔ “awieleɛ mekɛ ne” anu. Maata noko liele lile kɛ ɔ diema nrenya, Lazalɛse, ‘badwazo ara ngoane nu wɔ mekɛ ne mɔɔ li awieleɛ la anu.’—Dwɔn 11:24.

Baebolo ne kile kɛ “awieleɛ mekɛ” ɛhye a Kelaese Belemgbunlililɛ tumi ne babɔ ɔ bo a. Pɔɔlo hɛlɛle kɛ: “Ɔluakɛ ɔwɔ kɛ Kelaese di belemgbunli kɔkpula kɛ Nyamenle kɛli ye agbɔvolɛ amuala anwo zo konim na ɔkɛva bɛ ɔkɛwula ɔ gyakɛ abo la. Kpɔvolɛ mɔɔ li amozi mɔɔ bɛbazɛkye ye la a le ewule.” (1 Kɔlentema 15:25, 26) Ɛhye a le adwenle titile mɔɔ ɔti ɔwɔ kɛ yɛsɛlɛ kɛ Nyamenle Belemgbunlililɛ ne ɛrɛla na bɛyɛ Nyamenle ɛhulolɛdeɛ wɔ azɛlɛ ye azo la. *

Kɛmɔ Dwobu nwunle ye bɔkɔɔ la, ɔle Nyamenle ɛhulolɛdeɛ kɛ ɔbadwazo mɔwuamra. Saa zɔhane mekɛ ne dwu a, bɛbadu ewule bo bɔkɔɔ. Na awie biala ɛnrɛbiza ye bieko kɛ, ‘Asoo ɛwu a ɛnee yewie?’

^ ɛden. 8 Nrelenza edwɛkɛkpɔkɛ mɔɔ bɛhile ɔ bo “azie zo” la vi Giliki edwɛkɛkpɔkɛ mɔɔ kile “ɛleka mɔɔ bɛda” la.

^ ɛden. 18 Ɛkulo kɛ ɛsukoa Nyamenle Belemgbunlililɛ ne anwo ninyɛne dɔɔnwo a, nea Duzu A Baebolo ne Kilehile Amgba A? buluku ne mɔɔ Gyihova Alasevolɛ ɛyɛ la tile 8.