Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 FA KILEHILE Ɛ MRA

Gyisɛse Kelaese—Kɛzi Ɔwɔ Kɛ Yɛkakye Ye Ɛ?

Gyisɛse Kelaese—Kɛzi Ɔwɔ Kɛ Yɛkakye Ye Ɛ?

Ɔdwu December a menli dɔɔnwo mɔɔ wɔ ewiade la nwu Gyisɛse nvoninli kɛ adɔma la. Bɛnwu ye kɛ ɔla mboane adidi ɛlɛka nu. Noko asoo ɔwɔ kɛ yɛkakye Gyisɛse kɛ adɔma ala? * Bɛmaa yɛha adenle mɔɔ hyia mɔɔ yɛbahola yɛalua zo yɛahakye ye la anwo edwɛkɛ. Yɛbahola yɛazukoa nwolɛ debie yɛavi mɔɔ dole mboaneneavolɛma bie wɔ ɛleka mɔɔ bikye Bɛtelɛhɛm wɔ kenle ko nɔsolɛ bie la anu.

Anwumabɔvolɛ bie vindele mboaneneavolɛma ne anwo ɛkɛ ne arɛlevilɛ nu. Ɔhanle ɔhilele bɛ kɛ: “Ɛnɛ kenle ye bɛwo bɛ Ngoanedievolɛ ne, mɔɔ le Awulae Kelaese ne.” Anwumabɔvolɛ ne eza hanle hilele bɛ kɛ bɛbanwu Gyisɛse kɛ ‘bɛva avuazinli bɛkyekye ɔ nwo na ɔla mboane adidi ɛlɛka nu.’ Arɛlevilɛ nu ala, anwumabɔvolɛma dɔɔnwo rale ɛkɛ na bɛbɔle ɔ bo “bɛyele Nyamenle ayɛlɛ.”

Saa ɛte kɛ anwumabɔvolɛma ɛlɛye Nyamenle ayɛlɛ a, kɛzi ɛbade nganeɛ ɛ?— Mboaneneavolɛma ne anye liele! Bɛhanle kɛ, “Bɛmaa yɛhɔ Bɛtelɛhɛm yɛhɔnlea mɔɔ ɛzi” la. Bɛhɔle la, bɛnwunle “Mɛle nee Dwosefi nee adɔma ne kɛ ɔla mboane adidi ɛlɛka nu.”

Yeangyɛ, menli rale Bɛtelɛhɛm ɛleka mɔɔ Mɛle nee Dwosefi wɔ la. Mekɛ mɔɔ mboaneneavolɛma ne hanle mɔɔ ɛzi hilele bɛ la, ɔzile bɛ muala bɛ nwo. Asoo ɔyɛ wɔ fɛ kɛ wɔnwu nwanwane ninyɛne ɛhye mɔ la?— Ɔyɛ yɛ muala mɔɔ yɛkulo Nyamenle la fɛ. Akee maa yɛnlea deɛmɔti Gyisɛse awolɛ ne maa menli dɔɔnwo anye die la. Amaa yɛayɛ zɔ la, ɔwɔ kɛ yɛsia yɛkɔ yɛ nzi mekɛ bie kolaa na bɛagya Mɛle la.

Kenle ko bie anwumabɔvolɛ bie mɔɔ bɛfɛlɛ ye Geebeleɛle la rale Mɛle ɛkɛ. Ɔbɔle ye ɛwɔkɛ kɛ ɔbawo ralɛ nrenya mɔɔ bayɛ “kpole na bɛavɛlɛ ye Anwuma Anwuma Nyamenle ne Ara” la. Geebeleɛle hanle kɛ, ‘Ɔbayɛ belemgbunli na ye belemgbunlililɛ ne ɛnrɛbɔ aze ɛlɛ.’

 Ɛnee Mɛle kulo kɛ ɔnwu kɛzi ɛhye bahola ayɛ zɔ la ɔluakɛ ɔnze nrenya. Yemɔti Geebeleɛle hanle hilele ye kɛ: “Nyamenle tumi ne baheda ɛ nwo zo,” na “bɛbavɛlɛ kakula ne Nwuanzanwuanza, yɛɛ Nyamenle Ara.” Nyamenle Ara ne mɔɔ ɔyele ye ɔvile anwuma na ɔvale ye ngoane ɔwulale Mɛle awodeɛ nu ɔmanle ɔnyinle ɔyɛle adɔma la le nwanwane debie kpole!

Wɔnwu nvoninli anzɛɛ debie mɔɔ kile kɛ “nrɛlɛbɛvolɛma” nsa ɛlɛkɔ ahɔkpɔla adɔma Gyisɛse nee mboaneneavolɛ ne mɔ ɔ?— Ɔdwu Bolonyia mekɛ a yɛta yɛnwu ninyɛne zɛhae mɔ. Noko ɔnle nɔhalɛ. “Nrɛlɛbɛvolɛma” zɔhane le nwɔlɔra kengavolɛma, bɛyɛ ninyɛne mɔɔ Nyamenle tendɛ tia la. Maa yɛnlea mɔɔ zile wɔ mekɛ mɔɔ bɛdwule ɛkɛ la. Baebolo ne ka kɛ: ‘Bɛwolole sua ne anu la bɛnwunle kakula ne nee ɔ nli Mɛle.’ Yemɔti zɔhane mekɛ ne ɛnee Gyisɛse ɛnle adɔma mɔɔ la mboane adidi ɛlɛka nu a; ɛnee ɔle kakula mɔɔ nee Dwosefi nee Mɛle wɔ sua nu a!

Kɛzi nwɔlɔra kengavolɛma ne nwunle Gyisɛse ɛ?— Ɛwɔlɔra bie lumuale hilele bɛ adenle hɔle Belemgbunli Hɛlɔdo ɛkɛ wɔ Gyɛlusalɛm, yeanva bɛ yɛangɔ Bɛtelɛhɛm. Baebolo ne ka kɛ ɛnee Hɛlɔdo kpondɛ kɛ ɔnwu Gyisɛse na ɔku ye. Akee suzu ɛhye anwo nea. Nwane a ɛsuzu kɛ ɔmanle ɛwɔlɔra ne hilele nwɔlɔra kengavolɛma ne adenle hɔle Hɛlɔdo ɛkɛ ne a?— Tɛ Gyihova, mɔɔ le nɔhalɛ Nyamenle ne la a yɛle a, emomu, ye kpɔvolɛ, Seetan Abɔnsam ɔ!

Ɛnɛ, Seetan bɔ mɔdenle maa menli dwenle Gyisɛse anwo kɛ ɔle adɔma mɔɔ ɔngola ɔnyɛ ɛhwee la. Noko anwumabɔvolɛ Geebeleɛle hanle hilele Mɛle kɛ: ‘Ɔbali belemgbunli na ye belemgbunlililɛ ne ɛnrɛbɔ aze ɛlɛ.’ Kɛkala Gyisɛse ɛlɛdi tumi wɔ anwuma kɛ Belemgbunli, na ɔnrɛhyɛ ɔbazɛkye Nyamenle agbɔvolɛ kɔsɔɔti. Yemɔ a ɔwɔ kɛ yɛkakye wɔ Gyisɛse anwo a, na yɛbɔ mɔdenle yɛka nwolɛ edwɛkɛ yɛkile awie mɔ.

^ ɛden. 3 Saa ɛlɛkenga wɔahile kakula na ɛnwu kɛ bɛyɛ ɛleka bie zɛhae (—) a, ɔlɛkile kɛ ɛgyinla na ɛmaa kakula ne ɛhile ye adwenle.