Nwane mɔ a bahɔ anwuma a, na duzu ati ɔ?

Menli dɔɔnwo kulo kɛ bɛkɔ anwuma. Gyisɛse hanle kɛ ye ɛdoavolɛma mɔɔ bɛdi nɔhalɛ la bahɔ ɛkɛ. Kolaa na yeawu la, ɔbɔle ɛwɔkɛ kɛ ɔbaziezie ɛleka yeamaa bɛ wɔ ye anwuma Selɛ ne ɛkɛ.​—Kenga Dwɔn 14:2.

Duzu ati a bɛbadwazo menli bɛavi azɛlɛ ye azo bɛamaa bɛahɔ anwuma ɛ? Duzu a bɛbayɛ ye wɔ ɛkɛ a? Gyisɛse hanle hilele ye ɛdoavolɛma kɛ bɛbayɛ arelemgbunli. Bɛbali tumi wɔ azɛlɛ ye azo.​—Kenga Luku 22:28-30; Yekile 5:10.

Asoo kpalɛma kɔsɔɔti bahɔ anwuma?

Wɔ maanle dɔɔnwo anu, menli ekyi bie ala a di tumi a. Kɛmɔ Gyisɛse badwazo menli yeamaa bɛahɔ anwuma amaa bɛali tumi wɔ azɛlɛ ye azo la ati, yɛ nye la kɛ menli ekyi bie a bɛbakpa bɛ a. (Luku 12:32) Baebolo ne kile menli dodo mɔɔ nee Gyisɛse bali tumi la wienyi.​—Kenga Yekile 14:1.

Gyisɛse ɛziezie ɛleka wɔ anwuma ɛmaa ye ɛdoavolɛma bie mɔ. Ɛze mɔɔ bɛbayɛ wɔ ɛkɛ la ɔ?

Tɛ menli mɔɔ bahɔ anwuma la angomekye a banyia nyilalɛ a. Menli mɔɔ di nɔhalɛ mɔɔ bayɛ Gyisɛse Belemgbunlililɛ ne maanlema la badɛnla aze dahuu wɔ paladaese mɔɔ bazia ara azɛlɛ ye azo bieko la anu. (Dwɔn 3:16) Bie mɔ banyia ngoane wɔ ewiade ɛtane ɛhye ɛzɛkyelɛ ne anu na bɛahɔ Paladaese. Bɛbadwazo bie mɔ na bɛahɔ ɛkɛ.​—Kenga Edwɛndolɛ 37:29; Dwɔn 5:28, 29.