Baebolo ne le buluku mɔɔ ɛbu zo kpalɛ wɔ ewiade ye anu a. Duzu ati ɔ? Debie ko a le kɛ nuhua edwɛkɛ yɛ anyelielɛ. Ɔka menli nwo edwɛkɛ mɔɔ le nɔhalɛ nee kɛzi bɛ nee bɛ nwo yɛɛ Nyamenle lile adwelie la anwo edwɛkɛ. Edwɛkɛ ɛhye mɔ maa yɛsukoa debie kpalɛ wɔ adenle sikalɛ mɔɔ nuhua la ɛkɛ mɔɔ bɛkola bɛkile ɔ bo bɛkɔ aneɛ mɔɔ bo ɛya dɔɔnwo anu bɛmaa menli mɔɔ wɔ ɛleka biala anzɛɛ mekɛ biala anu te ɔ bo la. Baebolo ngyinlazo ne mɔ noko yɛ gyima dahuu.

Mɔɔ hyia kpalɛ la, Baebolo ne ɛngile kɛ ɔle buluku mɔɔ fane Nyamenle anwo ala a, na eza ɔle buluku mɔɔ vi Nyamenle ɛkɛ a. Ɔda Nyamenle duma, ye subane nee ye bodane mɔɔ ɛngakyi mɔɔ ɔvale ɔbɔle azɛlɛ ne nee alesama la ali. Baebolo ne eza ka mɔɔ hɔle zo wɔ kpalɛ nee ɛtane avinli mekɛ tendenle la anwo edwɛkɛ: ɛzelekɛ edwɛkɛ mɔɔ zile aleɛabo mɔɔ ye awieleɛ bayɛ anyelielɛ la. Yɛfa adwenle kpalɛ yɛsukoa Baebolo ne a ɔmaa yɛnyia diedi nee anyelazo.

Yɛnrɛnwu edwɛkɛ mɔɔ wɔ Baebolo ne anu la wɔ ɛleka gyɛne biala. Kɛ neazo la, Baebolo ne ka nɔhalɛ mɔɔ fane edwɛkɛ ɛhye mɔ anwo la kile yɛ:

  • Ɛleka mɔɔ yɛvi nee deɛmɔti yɛnwu amaneɛ la

  • Ngyehyɛleɛ mɔɔ Nyamenle yɛle liele alesama

  • Mɔɔ Gyisɛse ɛyɛ ɛmaa yɛ la

  • Azɛlɛ ne nee alesama kenlebie

Kɛmɔti a ɛnva mekɛ ekyi ɛnnea mukelɛ mɔɔ doɔdoa zo la anu na ɛnnwu mɔɔ Baebolo ne ka la ɛ?