Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ TITILE | DUZU A BAEBOLO NE KA A?

Edwɛkpa Maa Alesama Kɔsɔɔti

Edwɛkpa Maa Alesama Kɔsɔɔti

Gyisɛse ewudwazo ne manle ye ɛdoavolɛma nyianle diedi na bɛbɔle mɔdenle. Ɛzoanvolɛ Pɔɔlo dule adenle hɔle Ehyea Ekyi nee Mɛdetɛlenia ɛleka dɔɔnwo, ɔhyehyɛle asafo na ɔmanle Keleseɛnema anwosesebɛ kɛ bɛgyinla kpundii wɔ ɛbɛlabɔlɛ nwo ngyegyelɛ nee dwazotia mɔɔ basabasayɛlɛma fa ba bɛ nwo zo la anloa. Ngyegyelɛ ɛhye mɔ amuala anzi, Keleseɛnezonlenlɛ hɔle zolɛ na ɔdɛlɛle.

Bɛdole Pɔɔlo mumua ne efiade. Noko akee, mekɛ mɔɔ ɔwɔ ɛkɛ ne bɔbɔ la ɔhɛlɛle ngɛlata ɔvale ɔmanle Keleseɛne asafo ne anwosesebɛ na ɔdule bɛ folɛ. Ɔbɔle esiane kpole mɔɔ bahola azi la anwo kɔkɔ—ɛkpɔkyelɛ. Kɛmɔ Nyamenle sunsum ne hilele Pɔɔlo adenle la ati, ɔnwunle ye ɔdole ɛkɛ ne kɛ “bɛdi anwo ɛzulolɛ” bara bɛ avinli na bɛaha “edwɛkɛ adalɛ” bɛava bɛahwe “diedima ne bie mɔ ahɔli bɛ nzi.”—Gyima ne 20:29, 30.

Ɔkadwu ɛvoya ne mɔɔ lumua awieleɛ la, ɛnee ɛkpɔkyelɛ ne ɛbɔ ɔ bo. Zɔhane mekɛ ne anu, Gyisɛse mɔɔ bɛdwazo ye bɛvi ewule nu la manle ɛzoanvolɛ Dwɔn nwunle Yekile, mɔɔ le debie mɔɔ bazi kenlebie anwo sɛkɛlɛneɛ la. Kɛmɔ Dwɔn hɛlɛle la, dwazotiama anzɛɛ adalɛ kilehilevolɛma ɛnrɛhola ɛnrɛzi Nyamenle adenle bɔkɔɔ kɛ bɛnrɛmaa ye mɔlebɛbo bodane mɔɔ wɔ ɛkɛ maa azɛlɛ nee alesama la ɛnrɛra nu. “Menli ngakyile, mbusua ekpunli ekpunli, aneɛ ngakyile nee maanle maanle kɔsɔɔti” bade Nyamenle Belemgbunlililɛ ne anwo edwɛkpa ne. (Yekile 14:6) Paladaese bazia ara azɛlɛ ye azo, na awie biala mɔɔ kulo kɛ yɛ Nyamenle ɛhulolɛdeɛ la bahola anyia nuhua kyɛfoa!

Asoo ɛhye le “edwɛkpa” maa wɔ? Saa ye zɔhane a, ɛnee sukoa nrɛlaleɛ mɔɔ Nyamenle lɛ maa alesama mɔɔ wɔ Baebolo ne anu nee kɛzi ɔbahola yeaboa wɔ ɛnɛ nee kenlebie la anwo debie dɔɔnwo.

Ɛbahola wɔagenga Baebolo ne wɔ Intanɛte zo wɔ www.jw.org. Wɔ zɔhane Intanɛte address ɛleka ne, ɛbahola wɔazukoa brohyua mɔɔ le kɛ Edwɛkpa Mɔɔ Vi Nyamenle Ɛkɛ! yɛɛ buluku ne mɔɔ se, Duzu A Baebolo ne Kilehile Amgba A? wɔ yɛ aneɛ nu nee mbuluku gyɛne mɔɔ ka deɛmɔti yɛkola yɛdie Baebolo ne yɛdi yɛɛ kɛzi yɛbahola yɛava ye folɛdulɛ kpalɛ ne yɛali gyima wɔ yɛ abusua nee yɛ ɛbɛlabɔlɛ nu la wɔ ɛkɛ. Saa ɛkpondɛ edwɛkɛ dɔɔnwo noko a, ɛbahola wɔabiza Gyihova Alasevolɛ.

Ɔgyi Gyima ne, Ɛfɛsɛsema, Felepaema, Kɔlɔsaema, Faelimɔn, 1 Dwɔn, Yekile. azo