Kɛ ɔkɛyɛ na agyalɛ ayɛ anyelielɛ ɛ?

Folɛdulɛ mɔɔ Baebolo ne fa maa mɔɔ kile kɛzi agyalɛ bayɛ anyelielɛ la boa, ɔluakɛ ɔvi Ahenle mɔɔ hyehyɛle agyalɛ, mɔɔ le Gyihova Nyamenle la ɛkɛ. Ɔkile yɛ kɛ yɛnyia subane mɔɔ bamaa agyalɛ ayɛ anyelielɛ la na ɔbɔ yɛ kɔkɔ wɔ subane mɔɔ bahola azɛkye agyalɛ la anwo. Eza ɔmaa yɛnwu adwelielilɛ mɔɔ bamaa anyelielɛ ara agyalɛ nu la.—Kenga Kɔlɔsaema 3:8-10, 12-14.

Ɔwɔ kɛ kunlima nee yelɛma nyia ɛbulɛ maa bɛ nwo na bɛdi bɛ nwo eni. Saa bɛ mu nwiɔ bɛdie gyima mɔɔ Nyamenle ɛva ɛmaa bɛ wɔ agyalɛ ne anu la bɛto nu a, bɛ nye balie.—Kenga Kɔlɔsaema 3:18, 19.

Duzu a maa agyalɛ kyɛ a?

Saa agyalɛma kulo bɛ nwo a, bɛbahola bɛadɛnla bɛabɔ nu. Nyamenle ɛhile yɛ kɛzi ɔwɔ kɛ yɛnyia ɛlɔlɛ la. Ɔ nee ɔ Ra, Gyisɛse ɛyɛ anwofamaa ɛlɔlɛ nwo neazo.—Kenga 1 Dwɔn 4:7, 8, 19.

Saa kunlima nee yelɛma bu agyalɛ kɛ ɔle Nyamenle ngyehyɛleɛ a, bɛbabɔ nu bɛadɛnla. Nyamenle bɔle agyalɛ kɛ ɔdɛnla ɛkɛ ne dahuu amaa mbusua anyia anwobanebɔlɛ. Agyalɛ bahola ahyɛ, ɔluakɛ Nyamenle bɔle nrenya nee raalɛ kɛ bɛboa bɛ nwo wɔ nwonane nee nganeɛdelɛ nu. Eza ɔbɔle bɛ wɔ ye subane zo, mɔɔ maa bɛkola bɛsukoa ye ɛlɔlɛ ne la.—Kenga Mɔlebɛbo 1:27; 2:18, 24.