Amaa yeade deɛmɔti amaneɛnwunlɛ ɛbu zo nee deɛmɔti mɔdenle biala mɔɔ alesama ɛlɛbɔ la ɛnli munli la, ɔwɔ kɛ yɛnwu debie fɔɔnwo mɔɔ fa ba la. Ɔwɔ nuhua kɛ ninyɛne mɔɔ fa ba la le ngakyile yɛɛ bɛzonle ɛdeɛ, noko yɛ nye die kɛ Baebolo ne kola boa yɛ maa yɛnwu bɛ la. Wɔ edwɛkɛ ɛhye anu, yɛbazuzu ninyɛne nnu mɔɔ ɔti amaneɛnwunlɛ ɛbu zo la anwo. Yɛkulo kɛ ɛsuzu mɔɔ Baebolo ne ka la anwo kpalɛ na ɛnwu kɛzi Nyamenle Edwɛkɛ ne boa yɛ maa yɛnwu debie fɔɔnwo mɔɔ fa ngyegyelɛ ɛhye mɔɔ yɛ ɛvɛlɛ ba la.—2 Temɔte 3:16.

MƆƆ MAAMULƐ ƐTANE FA BA LA

Baebolo ne ka kɛ, “Saa amumuyɛma ɛlɛbu maanle a, menli ne su bɛ kunlu.”—Mrɛlɛbulɛ 29:2.

Menli mɔɔ ka a awie ɛnga bie mɔɔ bɛlile tumi wɔ atisesebɛ adenle zo na bɛmanle menli ne nwunle amaneɛ dɔɔnwo la anwo edwɛkɛ ɛyi tetedwɛkɛ nu. Nɔhalɛ nu, tɛ tumililɛma kɔsɔɔti a yɛle zɔ a. Bie a ɛnee bie mɔ lɛ adwenle kpalɛ kɛ bɛboa bɛ maanlema. Noko akee, saa bɛlɛdi tumi a, kɛzi menli nee bɛ ko pele tumililɛ la sɛkye bɛ mɔdenlebɔlɛ ne. Anzɛɛ bie a bɛsɛkye bɛ tumi ne bɛfa bɛkpondɛ bɛ ti anwo ninyɛne na bɛmaa menli ne anwo kyele bɛ. Henry Kissinger mɔɔ le U.S. Maanle Soanvolɛ dɛba la hanle kɛ: “Mɔdenlebɔlɛ mɔɔ anyɛ boɛ nee anyelazo mɔɔ amba nu la a wɔ tetedwɛkɛ nu a.”

Baebolo ne eza ka ye wienyi kɛ: “Meze kɛ sonla ɔdaye ɔnlɛ ɔ nwo; sonla ɔdaye ɔnlɛ ye ngoane zo tumi.” (Gyɛlɛmaya 10:23) Alesama mɔɔ tɔ sinli la ɛnlɛ nrɛlɛbɛ nee nwunu mɔɔ bɛbava bɛali bɛ edwɛkɛ nwo gyima wɔ adenle kpalɛ zo la. Saa menli ɛngola ɛngile bɛ nwo adenle a, kɛ ɔkɛyɛ na bɛahile maanle bie adenle ɛ? Ɛkola ɛnwu deɛmɔti alesama mɔɔ ɛlɛdi tumi la ɛngola ɛnye amaneɛnwunlɛ ɛnvi ɛkɛ la? Nɔhalɛ nu, fane dɔɔnwo ne ala, maamulɛ anzɛɛ tumililɛ ɛtane a fa amaneɛnwunlɛ ba a!

ADALƐ ƐZONLENLƐ TUMI

Gyisɛse hanle kɛ, “Saa bɛkulo bɛ nwo ngoko ngoko a yɛɛ awie biala kɛnwu kɛ bɛle me ɛdoavolɛma a.”—Dwɔn 13:35.

Asɔne biala anu mgbanyima ka ɛlɔlɛ nee koyɛlɛ nwo edwɛkɛ. Noko, bɛngola bɛmboa bɛ menli ne bɛmmaa bɛnye adwenletane bɛnvi ɛkɛ. Emomu, kɛ anrɛɛ ɛzonlenlɛ baboa yeamaa bɛanyia ɛlɔlɛ la, ɔta ɔfa mgbakyemgbakye nu, kyengyeyɛlɛ nee konle ɔba menli nee maanlema avinli. Wɔ ye buluku ne mɔɔ se, Christianity and the World Religions la anu, ɛzonlenlɛ nwo kilehilevolɛ Hans Küng hɛlɛle kɛ: “Maanyɛlɛ tumi ɛpelelɛ mɔɔ ɛnle kpalɛ fee na bɛyɛ kyengye wɔ nu la a le kɛ ɛzonlenlɛ a gyi ɔ nzi a.”

Bieko, ɛzonlenlɛ dɔɔnwo anu ɛsɔfoma ɛlie nla mɔɔ lumua agyalɛ nyunlu, agyalɛ nzi nla, mrenya mɔɔ fa mrenya nee mraalɛ mɔɔ fa mraalɛ la ɛdo nu  wienyi. Ɛhye ɛva ewule, ɛkolɛyelɛ, ɛnrenzɛlɛ mɔɔ bɛ nye ɛnla yɛɛ agyalɛ nee mbusua ɛzɛkyelɛ ɛra na yehɔ nyanelilɛ nee alɔbɔlɛlilɛ dɔɔnwo anu.

SONLA SINLIDƆLƐ NEE ATIAKUNLUWƆZO ƐTANE

“Sonla ɔdaye ye atiakunluwɔzo ɛtane ne a sɔ ye nea na ɔtwe ye ɔfi Nyamenle anwo a. Saa ye munzule atiakunluwɔzo ne nrenzɛ a ɔwo ɛtane, yɛɛ ɛtane wie nyi a ɔwie ewule.”—Gyemise 1:14, 15.

Kɛmɔ bɛva sinlidɔlɛ bɛwo yɛ kɔsɔɔti la ati, ɛtane nee nvonleɛ wɔ yɛ nwo na ɔwɔ kɛ yɛko yɛtia “nwonane ne atiakunluwɔzo.” (Ɛfɛsɛsema 2:3) Saa atiakunluwɔzo ɛtane ne ka yɛ kɛ yɛyɛ debie ɛtane bie a, ɔnyɛ se kɛ yɛbayɛ zɔ. Saa yɛdi atiakunluwɔzo ɛtane nzi a ɔfa esiane dɔɔnwo ɔba.

Buluku kɛlɛvolɛ P. D. Mehta hɛlɛle kɛ: “Amaneɛ dɔɔnwo mɔɔ yɛnwu ye la gyi atiakunluwɔzo, mɔdenle mɔɔ yɛbɔ yɛkpondɛ anyelielɛ na yɛfa yɛ nwo yɛwula nu yɛkɔ moa yɛɛ kɛzi yɛfa anyebolo yɛkpondɛ ninyɛne ɛhye mɔ la azo.” Atiakunluwɔzo nee ninyɛne ngakyile mɔɔ ɛha bɛ nwo—nza, nyile, kyakyadolɛ, nla, nee mɔɔ bokɛboka nwo la—ɛzɛkye “maanlema mɔɔ bɛbu bɛ la” na yemaa bɛ mbusua, bɛ gɔnwo mɔ nee awie mɔ ɛnwu amaneɛ. Kɛmɔ alesama tɔ sinli la ati, yɛ nee mɔɔ Baebolo ne ka la yɛ adwenle kɛ: “Awie biala mɔɔ kola nwu debie la ze ye wienyi kɛ kɛkala abɔdeɛ muala kponle wɔ aleɛabo gyima biala anu.”—Wulomuma 8:22, The New Testament in Modern English, J. B. Phillips.

SUNSUM ƐTANE TUMI

Baebolo ne maa ɔda ali kɛ Seetan a le “ɛtane ewiade ɛhye nyamenle” a na ɔlɛ ɔ sa zo sunsum ɛtane mɔɔ bɛ ti yɛ se la.—2 Kɔlentema 4:4; Yekile 12:9.

Sunsum ɛtane ɛhye mɔ anye bolo di menli nwo zo na bɛbɛlɛbɛla bɛ kɛmɔ Seetan yɛ la. Ɛzoanvolɛ Pɔɔlo liele ɛhye dole nu wɔ mekɛ mɔɔ ɔhanle kɛ: “Tɛ menli a yɛ nee bɛ ɛlɛko a; sunsum nu tumivolɛma, ewiade arelemgbunli anzɛɛ maanlebuvolɛma, ewiade amra mɔɔ sie ɛnɛ mekɛ ye awozinli nu amra, yɛɛ sunsum nu anwuma ɛlɔnema amumuyɛ yɛɛ yɛ nee bɛ ɛlɛko a.”—Ɛfɛsɛsema 6:12.

Sunsum ɛtane ɛhye mɔ anye die kɛ bɛbagyegye menli ɛdeɛ, noko tɛ ɛhye a le bɛ bodane titile a. Bɛlɛ ɛhulolɛ kɛ bɛbahwe menli bɛavi Anwuma Anwumanli Nyamenle, Gyihova anwo. (Edwɛndolɛ 83:18) Nyɛleɛ mɔɔ le kɛ nwɔlɔra ɛgengalɛ, ngonyia, ayɛnebɛla yɛɛ abisadeɛ la a le ninyɛne mɔɔ sunsum ɛtane ne mɔ dua zo di menli nwo zo tumi a. Ɛhye ati a Gyihova boa yɛ maa yɛnwu zɔhane esiane ne mɔ na ɔbɔ menli kɔsɔɔti mɔɔ dwazo tia Seetan nee sunsum ɛtane ne mɔ anwo bane la.—Gyemise 4:7.

YƐDE “AWIELEƐ MEKƐ NE” ANU

Baebolo ne hanle dole ɛkɛ wɔ ɛvolɛ kɛyɛ apenle nwiɔ, mɔɔ ɛze ɛhɔ la anu kɛ: “Mekpondɛ kɛ ɛnwu ye kɛ, awieleɛ mekɛ ne anu, anwongyelelɛ dɔɔnwo bara.”

Ɔhɔle zo ɔhilele mɔɔ bamaa anwongyelelɛ dɔɔnwo ara la anu kɛ: “Menli bayɛ angomedi nee ezukoa nwo anyebolo, bɛbamemaa bɛ nwo zo na bɛazua anyetele; . . . bɛ ti bayɛ se, bɛnrɛze anwunvɔne, bɛbabɔ nzekue, bɛbali mgbonde, bɛbava ɛya mgbane mgbane na bɛahyi kpalɛ, bɛbaye bɛ gɔnwo mɔ bamaa, bɛbayɛ mgbaha na bɛ ti anu ayɛ bɛ fɛ; bɛbahulo anyelielɛ bɛadɛla Nyamenle.” Nɔhalɛ nu, debie titile mɔɔ ɔti amaneɛnwunlɛ dɔɔnwo wɔ ɛkɛ ɛnɛ la a le kɛ yɛde “awieleɛ mekɛ ne” anu.—2 Temɔte 3:1-4.

Kɛmɔ ninyɛne ɛhye mɔ mɔɔ yɛzuzu nwolɛ kile la, asoo ɔmmaa yɛnnwu ye wienyi kɛ alesama bɔ mɔdenle biala a, bɛnrɛhola bɛnrɛye amaneɛnwunlɛ bɛnrɛvi ɛkɛ ɔ? Ɛnee nienwu a yɛbanyia moalɛ yɛavi a? Ɔwɔ kɛ yɛfa yɛ nye yɛto yɛ Bɔvolɛ ne, mɔɔ ɛbɔ ɛwɔkɛ kɛ “ɔbazɛkye Abɔnsam gyima biala mɔɔ yeli” nee menli mɔɔ li ɔ nzi la. (1 Dwɔn 3:8) Edwɛkɛ ne mɔɔ doa zo la bazuzu mɔɔ Nyamenle bayɛ na yeaye amaneɛnwunlɛ kɔsɔɔti yeavi ɛkɛ la anwo.