Edwɛkɛ mɔɔ wɔ ɛke la le adwelie mɔɔ Gyihova Dasevolɛ bie nee awie bahola ali. Yɛva ye kɛ Dasevolɛ bie mɔɔ bɛfɛlɛ ye Mary la ɛra raalɛ bie mɔɔ bɛfɛlɛ ye Soma la sua nu.

KƐZI ƆMAA ƆKOLA ƆBA YE ZƆ Ɛ?

Mary: Ɛnɛ melɛfa trate ɛhye meamaa awie biala mɔɔ wɔ ɛke la. Ɔti ne se, Ɛkulo kɛ Ɛnwu Nɔhalɛ ne Ɔ? Wɔ ɛdeɛ ɛne.

Soma: Ɛhye fane ɛzonlenlɛ nwo ɔ?

Mary: Ɛhɛe. Nea kpuyia nsia ne mɔɔ wɔ zolɛ la. Kpuyia ɛhye mɔ boni a—

Soma: Fa sie ɛkɛ ne ala. Mmasɛkye wɔ mekɛ wɔ me nwo.

Mary: Duzu ati a ɛlɛka ɛhye a?

Soma: Nɔhalɛ ne a le kɛ, mengola mennwu ye bɔbɔ kɛ medie Nyamenle medi a.

Mary: Ɔyɛ, meda wɔ ase kɛ wɔha wɔhile me la. Maa membiza wɔ, Asoo kɛ dahuu ɛte nganeɛ la ɛne?

Soma: Kyɛkyɛ, ɛnee mekɔ asɔne. Noko mengyakyile la ɛhyɛ.

Mary: Ɔyɛ. Maa membɔ me duma mengile wɔ. Bɛfɛlɛ me Mary.

Soma: Bɛfɛlɛ me Soma.

Mary: Ɔyɛ me fɛ kɛ menwu wɔ a, Soma.

Soma: Medame noko zɔhane ala.

Mary: Meamba ɛke kɛ meka ye kyengye kɛ ɛlie me diedi ne ɛdo nu, Soma. Noko mekulo kɛ mete edwɛkɛ bie abo. Asoo debie titile bie wɔ ɛkɛ mɔɔ ɔmmaa ɛnlie ɛnli kɛ Nyamenle wɔ ɛkɛ ɔ?

Soma: Ɛhɛe. Kale dole me mame aze wɔ ɛvolɛ 17 mɔɔ ɛze ɛhɔ la anu.

Mary: O, gyakɔ. Ɔbodale ɔ?

Soma: Ɛhɛe, ɔvi zɔhane mekɛ ne yeyɛ wuleravolɛ.

Mary: Edwɛkɛ ɛhye yɛ alɔbɔlɛ. Yemaa ɛ nwo ɛbubu wɔ.

Soma: Ɔle zɔ. Yemɔti ɔsi me nwo kɛ, saa Nyamenle wɔ ɛkɛ a, kɛzi ɔmanle ɔrale ye zɔ ɛ? Kɛmɔti a Nyamenle bamaa yɛanwu amaneɛ zɛhae ɛ?

ƆLE ƐTANE KƐ YƐBABIZA DEƐMƆTI Ɔ?

Mary: Ndelebɛbo wɔ wɔ nganeɛdelɛ nee wɔ kpuyia ne anu. Saa yɛnwu amaneɛ a, yɛkulo kɛ yɛnwu deɛmɔti. Nɔhalɛ nu, Baebolo mekɛ zo mrenya nee mraalɛ nɔhavoma bie mɔ bɔbɔ bizale bie!

Soma: Amgba?

Mary: Ɛhɛe. Ɛ nye balie kɛ mebahile wɔ nwolɛ neazo wɔ Baebolo ne anu ɔ?

Soma: Me nye balie nwolɛ.

Mary: Tie mɔɔ ngapezonli Habakɛke nɔhavo ne bizale Nyamenle, mɔɔ bɛhɛlɛ ye wɔ Habakɛke, tile 1, ngyehyɛnu 2 nee 3 la: “Menzu menvɛlɛ wɔ moalɛ ɔhɔdwu kenlenzu na wɔadie me? Anzɛɛ mendeɛdea nu kɛ, “Konle o! Konle o!” na wɔalie yɛ? Duzu ati a ɛmaa me nye nwu nvonleɛ nee ngyegyelɛ ɛ?” Edwɛkɛ ɛhye mɔ nee mɔɔ ɛta ɛbiza la le ko ɔ?

Soma: Ɛhɛe.

Mary: Nyamenle andea Habakɛke kɛ ɔbizale zɔhane edwɛkɛ ne la, yɛɛ yeanga yeangile Habakɛke kɛ ɔhyia diedi dɔɔnwo ala.

Soma: Ɔyɛ anyelielɛ.

GYIHOVA KYI AMANEƐNWUNLƐ

Mary: Baebolo ne kilehile kɛ Nyamenle nwu yɛ amaneɛnwunlɛ ne na ɔdwenle yɛ nwo.

Soma: Boni a ɛkile a?

Mary: Maa mengile wɔ neazo bie wɔ Adendulɛ 3:7. Ɛbagenga ɔ?

 Soma: Ɛhɛe. Ɔkenga kɛ: “Akee [Gyihova] zele kɛ, ‘Menwu me menli mɔɔ wɔ Yigyibiti la amaneɛnwunlɛ ne, eza mede bɛ ɛzunlɛ ne, ɔlua abodelɛ mɔɔ bɛ gyima zo neavolɛma ne ɛlɛfa ahile bɛ la.’”

Mary: Mo. Kɛmɔ ngɛlɛlera ɛhye kile la, saa menli nwu amaneɛ a, Nyamenle nwu ye ɔ?

Soma: Ɛhɛe, ɔzɔho kɛ ɔnwu ye.

Mary: Ɔnnwu mɔɔ kɛzi la ala. Nea ngyehyɛnu ne foa mɔɔ li amozi la. Nyamenle hanle kɛ: ‘Menwu abodelɛ mɔɔ bɛlɛfa bɛahile bɛ la.’ Asoo ɛhye kile kɛ ɔle Nyamenle mɔɔ ɔndwenle yɛ nwo?

Soma: Kyɛkyɛ, ɔnle zɔ.

Mary: Nɔhalɛ nu, ɛbahola wɔanwu debie, noko kɛ ɔbaha wɔ yeamaa wɔayɛ nwolɛ debie la le ngakyile kolaa.

Soma: Ɔle zɔ.

Mary: Mekɛ mɔɔ ɛhye wɔ yɛ adwenle nu la, maa yɛgenga neazo bieko wɔ mekɛ mɔɔ ɛnee Nyamenle menli ɛlɛnwu amaneɛ la. Bɛhɛlɛle ye wɔ Ayezaya 63:9. Ngyehyɛnu ne foa mɔɔ lumua la ka kɛ: “Bɛ nyanelilɛ kɔsɔɔti yɛle ye nyanelilɛ.” Ɛbaha kɛ Nyamenle menli nyanelilɛ ne gyegyele ye ɔ?

Soma: Ɛhɛe, ɔkile zɔ.

Mary: Soma, nɔhalɛ ne a le kɛ, Nyamenle dwenle yɛ nwo kpole, na ɔngulo kɛ ɔnwu kɛ yɛlɛdi nyane. Saa yɛlɛdi nyane a, ɔdi yɛ nyane ne bie.

KƐMƆTI A YEHYƐ A?

Mary: Saa mebahɔ a, debie ko wɔ ɛkɛ mɔɔ mekulo kɛ meka nwolɛ edwɛkɛ mekile wɔ a.

Soma: Yoo mede.

Mary: Suzu mɔɔ Baebolo ne ka ye wɔ Nyamenle tumi ne anwo la anwo nea. Ngyehyɛnu mɔɔ wɔ me ti anu la a le Gyɛlɛmaya 10:12. Ɛbagenga ɔ?

Soma: Ɛhɛe. Ɔkenga kɛ: ‘Ɔvale ye tumi a ɔbɔle azɛlɛ ye a, ɔvale ye nrɛlɛbɛ a ɔbɔle ewiade a, ɔvale ye ndelebɛbo a ɔbɔle anwomanyunlu a.’

Mary: Mo. Maa yɛdwenle ngyehyɛnu ɛhye anwo ekyii. Ɛnee ɔhyia kɛ Nyamenle nyia tumi na yeahola yeabɔ ewiade nee debie biala mɔɔ wɔ nu la ɔ?

Soma: Ɛhɛe.

Mary: Saa Nyamenle lɛ tumi ɔfa ɔbɔ debie biala mɔɔ yɛnwu ye la a, asoo yɛ nye ɛnla kɛ ɔlɛ tumi wɔ ye abɔdeɛ nwo zo?

Soma: Ɔle zɔ.

Mary: Dwenle wɔ mame anwo bieko nea. Duzu ati a ɛnwu kɛ ɔlɛdi nyane a ɔgyegye wɔ ɛ?

Soma: Ɔboalekɛ mekulo ye edwɛkɛ. Me mame ɔ.

Mary: Saa ɛlɛ tumi mɔɔ bamaa wɔayɛ ye ayile ɛnɛ a, anrɛɛ ɛbayɛ zɔ ɔ?

Soma: Ɛhɛe.

Mary: Dwenle mɔɔ ɛhye kile la anwo nea. Baebolo ne kilehile kɛ Nyamenle nwu yɛ amaneɛnwunlɛ, ɔte nganeɛ ɔmaa yɛ, yɛɛ ɔlɛ tumi kpole. Asoo ɛkola ɛnwu kɛzi ɔhyia kɛ Nyamenle komo ɔ nwo zo na yeamba yɛ amaneɛnwunlɛ ne anvi ɛkɛ ne ndɛndɛ la?

Soma: Metɛdwenlenle nwolɛ zɔhane ɛlɛ.

Mary: Asoo ɔbayɛ kɛ adwenle kpalɛ bie ati a ɔtɛyɛle nwolɛ debie na yɛ ngyegyelɛ ne abo apɛ a? *

Soma: Hmm, medie medi kɛ ɔbahola yeayɛ.

Mary: Mede kɛ awie ɛlɛfɛlɛ wɔ, yemɔti mebara mekɛ fofolɛ, na yɛazuzu edwɛkɛ ɛhye anwo yɛahɔ moa.

Soma: Mo. Me nye balie nwolɛ. *

Baebolo nu edwɛkɛ titile bie wɔ ɛkɛ mɔɔ kye wɔ adwenle ɔ? Ɛkulo kɛ ɛnwu Gyihova Alasevolɛ diedi anzɛɛ nyɛleɛ bie anwo debie dɔɔnwo ɔ? Saa ye zɔhane a, yɛ ye ndɛndɛ ka kile Gyihova Alasevolɛ ne mɔ anu ko. Ɔ nye balie kɛ ɔ nee wɔ bazuzu zɔhane edwɛkɛ ne anwo.

^ ɛden. 64 Edwɛkɛ ɛhye bie mɔɔ bara kenlebie la bazuzu deɛmɔti Nyamenle maa amaneɛnwunlɛ nwo adenle la anwo.