“ME NYE la kɛ.” Wɔ August 28, 1963, ɛvolɛ 50 mɔɔ ɛze ɛhɔ la, Americanli, Martin Luther King, Jr., mɔɔ li maanlema adenlenyianlɛ nyunlu la hanle zɔhane edwɛkɛ ne wɔ ye ɛdendɛlɛ mɔɔ ɛlie duma la anu. King luale zɔhane edwɛkɛ ne mɔɔ yɛ anyelielɛ la azo hanle mɔɔ ɔ nye la anzɛɛ anyelazo mɔɔ ɔlɛ kɛ, kenlebie menli nwo badɔ bɛ wɔ adwenletane nwo la anwo edwɛkɛ. Ɔhanle ye anyelazo ne ɔhilele menli dɔɔnwo wɔ United States ɛdeɛ, noko menli mɔɔ wɔ maanle dɔɔnwo anu la anye die ma mɔɔ wɔ nu la anwo.

Martin Luther King, Jr., ɛlɛmaa ye maanlema adenlenyianlɛ ɛdendɛlɛ

King manle ye ɛdendɛlɛ ne la, ye siane nsa anzi, wɔ November 20, 1963, maanle mɔɔ bo 100 la liele Maamgbole Koyɛlɛ Edwɛkɛ Mɔɔ Fane Nyeyenu Biala Mɔɔ Bɛtu Ɔ Bo la dole nu. Ɛvolɛ dɔɔnwo mɔɔ li ɔ nzi la anu bɛyɛle nwolɛ ngyehyɛleɛ ngakyile wɔ ewiade amuala. Mɔdenlebɔlɛ ɛhye mɔ kɔsɔɔti maa bɛbiza kɛ, Boni a ɛvi nu ɛra a?

Wɔ March 21, 2012, U.N. Kɛlɛhɛlɛvolɛ Kpanyinli Ban Ki-moon hanle kɛ: “Ngyehyɛleɛ nee ewiade amuala ninyɛne mɔɔ boa la wɔ ɛkɛ mɔɔ badu menli nwo adwenletane, nyeyenu, menli nwo ɛzulolɛ nee nwolɛ ngyegyelɛ gyɛne bo avi ɛkɛ a. Noko akee menli nwo adwenletane ɛlɛkɔ zo na ɔlɛmaa menli mgbe dɔɔnwo anwu amaneɛ wɔ ewiade ye anu.”

Wɔ maanle bie mɔ mɔɔ bɛho bɛtia nyeyenu nee adwenletane na bɛnyia anyuhɔlɛ bɔbɔ la anu, bɛtɛbiza kɛ: Asoo anyuhɔlɛ ne ɛmaa bɛye adwenletane bɛvi menli ahonle nu anzɛɛ ɔmmaa bɛnla ye ali ɔ? Bie mɔ die di kɛ anyuhɔlɛ ɛhye mɔ ɛmmaa bɛnyɛ nyeyenu ala, na ɔngola ɔndu adwenletane bo. Kɛmɔti ɛ? Ɔboalekɛ bɛkola bɛnwu nyeyenu na bɛdua mɛla zo bɛtwe awie anzo wɔ nwolɛ, noko adwenletane wɔ menli adwenle nee bɛ nganeɛdelɛ nu na bɛngola bɛnye bɛnvi ɛkɛ.

Ɛhye ati, ɔnle kɛ mɔdenle biala mɔɔ bɛbɔ kɛ bɛtu adwenletane bo la maa bɛgyakyi nyeyenu nyɛleɛ ala, na ɔwɔ kɛ ɔmaa menli kakyi adwenle nee nganeɛdelɛ mɔɔ bɛlɛ ye wɔ menli ekpunli bie anwo la. Bɛbahola bɛayɛ ɛhye ɔ? Saa ye zɔhane a, kɛzi bɛbayɛ ye ɛ? Bɛmaa yɛnlea edwɛkɛ mɔɔ ɛzi mɔɔ bamaa yɛanwu kɛ menli bahola ayɛ zɔ nee debie mɔɔ baboa bɛ yeamaa bɛahola bɛayɛ zɔ la.

BAEBOLO NE BOALE BƐ MANLE BƐLILE ADWENLETANE ZO

“Me nwo ɛdɔ me wɔ adwenletane nwo.”—Linda

Linda: Bɛwole me wɔ South Africa. Ɛnee mebu South Africama mɔɔ bɛnle alɔfolɛ la kɛ bɛwɔ yɛ bo, bɛnze nwoma, ɔnle kɛ medie bɛ medi, na bɛsonle alɔfolɛ ne mɔ ala. Ɛnee adwenletane ɛha me nwo noko ɛnee mennwu ye. Noko akee, mekɛ mɔɔ membɔle ɔ bo kɛ mesukoa Baebolo ne la zɔhane subane ne bɔle ɔ bo kɛ ɔkakyi. Menwunle ye kɛ “Nyamenle bu menli kɔsɔɔti kɛ bɛsɛ” na ahonle ne hyia dɔɔnwo tɛla awie anwo nane nee aneɛ mɔɔ yɛka la. (Gyima ne 10:34, 35; Mrɛlɛbulɛ 17:3) Ngɛlɛlera mɔɔ wɔ Felepaema 2:3 boale me manle menwunle kɛ saa mebu awie biala kɛ ɔsonle bolɛ ɔtɛla me a, mebahola meali adwenletane zo. Baebolo ngyinlazo ɛhye mɔ mɔɔ meva mebɔ me ɛbɛla la ɛboa ɛmaa me nye ɛlie awie mɔ anwo ɔnva nwo kɛzi bɛ nwo nane de la. Akee me nwo ɛdɔ me wɔ adwenletane nwo.

“Menwunle kɛzi Nyamenle bu menli la.”—Michael

Michael: Australia ɛleka mɔɔ bɛtetele me la ɛnee asɛɛ alɔfolɛ ngome a wɔ ɛkɛ a, na menyianle  Asiama anwo adwenletane, titile Chinama. Saa melɛka kale na menwu awie mɔɔ ɔvi Asia a, meka me neanleɛ ne aze na metea nu meka edwɛkɛ ɛtane mɔɔ le kɛ “Kɔ sua nu Asianli!” Nzinlii mɔɔ membɔle ɔ bo kɛ mesukoa Baebolo ne la, menwunle kɛzi Nyamenle bu menli la. Ɔnva nwo ɛleka mɔɔ bɛvi anzɛɛ kɛzi bɛde la ɔkulo bɛ edwɛkɛ. Ɛhye hanle me ahonle na ɔmanle me ɛkpɔlɛ ne hakyile ɛhulolɛ. Nzenzaleɛ zɛhae yɛ nwanwane. Ɛnɛ, me nye die kɛ me nee menli ngakyile mɔɔ vi maanle ngakyile nu tu la. Ɛhye ɛmaa me adwenle nu ɛbuke wɔ ɛbɛlabɔlɛ nu na ɔmaa me nye die kpole.

‘Mengakyile me adwenle na yɛdɛnlanle anzondwolɛ nu.’—Sandra

Sandra: Ɛnee me mame vi Umunede mɔɔ wɔ Delta State, Nigeria la. Noko, ɛnee me papa abusua ne vi Edo State na bɛka Esan aneɛ. Ɔlua ɛhye ati, me papa abusua ne nyianle me mame anwo adwenletane kɔkpula kenle mɔɔ ɔwule la. Yemɔti menganle ndane kɛ me nee awie biala mɔɔ ka Esan aneɛ la ɛnrɛli yɛɛ menrɛgya awie biala mɔɔ vi Edo State la ɛlɛ. Noko mekɛ mɔɔ membɔle ɔ bo kɛ mesukoa Baebolo ne la menwunle ninyɛne wɔ adenle fofolɛ zo. Kɛmɔ Baebolo ne se Nyamenle bu menli kɔsɔɔti kɛ bɛsɛ na awie biala mɔɔ sulo ye la ɔdie ye ɔto nu la ati, kɛ ɔkɛyɛ na meakpɔ menli ɔlua aneɛ mɔɔ bɛka la ati ɛ? Mengakyile me adwenle na me nee me papa abusua ne dɛnlanle anzondwolɛ nu. Baebolo ngyinlazo mɔɔ meva mebɔ me ɛbɛla la ɛmaa menyia anzondwolɛ. Yemaa mekola me nee awie mɔ tu ɔnva nwo ɛleka mɔɔ bɛvi, menli holɛ mɔɔ bɛde, aneɛ mɔɔ bɛka anzɛɛ maanle mɔɔ bɛvi nu la. Na nrenya mɔɔ mengyale ye la ɛ? Ɔvi Edo State yɛɛ ɔka Esan aneɛ!

Duzu ati a Baebolo ne ɛhola ɛboa menli ɛhye mɔ nee menli gyɛne dɔɔnwo ɛmaa bɛli ɛkpɔlɛ nee adwenletane mɔɔ wɔ bɛ ahonle nu la azo ɛ? Ɔboalekɛ Baebolo ne le Nyamenle Edwɛkɛ. Nuhua tumi ne maa awie kola kakyi kɛzi ɔdwenle na ɔte nganeɛ wɔ awie mɔ anwo la. Bieko, Baebolo ne maa yɛnwu mɔɔ hyia na adwenletane kɔsɔɔti avi ɛkɛ la.

 NYAMENLE BELEMGBUNLILILƐ NE BAYE ADWENLETANE KƆSƆƆTI AVI ƐKƐ

Baebolo ne anwo ndelebɛbo kola boa maa bɛdi nganeɛ ɛtane zo na bɛye bɛfi ɛkɛ ne ɛdeɛ, noko ninyɛne nwiɔ wɔ ɛkɛ mɔɔ ɔwɔ kɛ bɛdi nwolɛ gyima na adwenletane avi ɛkɛ bɔkɔɔ a. Mɔɔ lumua la, ɛtane nee sonla sinlidɔlɛ wɔ ɛkɛ. Baebolo ne ka ye wienyi kɛ: “Ɛtane ɛmkpa sonla nwo.” (1 Arelemgbunli 8:46) Yemɔti mɔdenle biala mɔɔ yɛbabɔ la anzi, yɛyia ngyegyelɛ ko ne ala mɔɔ ɛzoanvolɛ Pɔɔlo hanle nwolɛ edwɛkɛ la kɛ: “Mɔɔ mekulo kɛ meyɛ kpalɛ la, ɛnee ɛtane ala a gyi me nye zo a.” (Wulomuma 7:21) Ɛhye ati, ɔvi mekɛ mɔɔ kɔ mekɛ la, yɛ sinlidɔlɛ ne bamaa yɛanyia “adwenletane” na yɛayɛ nyeyenu.Maake 7:21.

Mɔɔ tɔ zo nwiɔ a le Seetan Abɔnsam tumi ne. Baebolo ne ka ɔ nwo edwɛkɛ kɛ “ɔle kɔdiawu” na ɔka kɛ ‘ɔlɛbɛlɛbɛla ewiade amra amuala.’ (Dwɔn 8:44; Yekile 12:9) Ɛhye ati a adwenletane ɛbu zolɛ na alesama ɛngola ɛnye kyengyeyɛlɛ, nyeyenu, menli dɔɔnwo ɛhunlɛ yɛɛ nyeyenu gyɛne mɔɔ bɛyɛ wɔ menli, ɛzonlenlɛ nee ninyɛne ngakyile nwo ɛnvi ɛkɛ la.

Yemɔti, kolaa na adwenletane avi ɛkɛ ne bɔkɔɔ la, ɔwɔ kɛ ɛtane, sinlidɔlɛ yɛɛ Seetan Abɔnsam tumi ne fi ɛkɛ. Baebolo ne kile kɛ Nyamenle Belemgbunlililɛ ne bali ninyɛne ɛhye mɔ anwo gyima.

Gyisɛse Kelaese hanle hilele ye ɛdoavolɛma ne kɛ bɛzɛlɛ Nyamenle kɛ: “Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la.” (Mateyu 6:10) Nyamenle Belemgbunlililɛ ne ala a bamaa nzisi kɔsɔɔti—mɔɔ kyengyeyɛlɛ nee adwenletane boka nwo la avi ɛkɛ a.

Saa Nyamenle Belemgbunlililɛ ne ba na ɔdi azɛlɛ ye azo tumi a, ɔbahye Seetan yeagua “ye anga,” anzɛɛ yeazi ye adenle bɔkɔɔ mɔɔ ɔnrɛnyia adenle ‘ɔnrɛbɛlɛbɛla maanle maanle ne bieko’ la. (Yekile 20:2, 3) Akee yɛbanyia “ewiade fofolɛ” anzɛɛ alesama abusua “mɔɔ pɛlepɛlelilɛ wɔ nu la.” *2 Pita 3:13.

Menli mɔɔ badɛnla zɔhane tenlene ewiade ne anu la bali munli mɔɔ ɛtane biala ɛnle bɛ nwo a. (Wulomuma 8:21) Bɛbayɛ Nyamenle Belemgbunlililɛ ne anu menli, na “bɛnrɛboda anzɛɛ bɛnrɛhu awie.” Kɛmɔti ɛ? “Ɔluakɛ [Gyihova] anwo adwenle bayi azɛlɛ ye tɛkɛɛ kɛ nzule mɔɔ wɔ nyevile nu la.” (Ayezaya 11:9) Zɔhane mekɛ ne, alesama kɔsɔɔti bazukoa Gyihova Nyamenle ndenle na bɛazukoa ye ɛlɔlɛ subane ne. Ɛhye bahile kɛ amgba adwenletane kɔsɔɔti ɛra awieleɛ, “ɔluakɛ Nyamenle bua menli kɔsɔɔti ndɛne wɔ adenle ko ne ala azo.”Wulomuma 2:11.

^ ɛden. 17 Saa ɛkpondɛ kɛ ɛte Nyamenle Belemgbunlililɛ ne nee mɔɔ ɔnrɛhyɛ biala ɔbayɛ la anwo edwɛkɛ dɔɔnwo a, nea Duzu A Baebolo ne Kilehile Amgba A?, buluku ne mɔɔ Gyihova Alasevolɛ ɛyɛ la tile 3, 8 yɛɛ 9.